ޖައްވުގައި ގާއިމްކޮށްފައިވާ ސްޓާލިންކްގެ ސެޓެލައިޓުތަކުން ފޯނަށް އިންޓަނެޓު ހިދުމަތް ދިނުމުގެ ބީޓާ ޓެސްޓުތައް ފަށަން އުޅޭ ކަމަށް އެލޮން މަސްކު ބުނެފިއެވެ.

މިކަމާ ބެހޭ ޕޯސްޓެއް އެކްސްގައި ހިއްސާ ކުރަމުން އެލޮން މަސްކު ބުނެފައިވަނީ މި ޕްރޮޖެކްޓުގެ ބީޓާ ޓެސްޓުތައް ތިން ދުވަސްތެރޭ ފަށާނެ ކަމަށެވެ. އެގޮތުން މި ޓެސްޓުތައް ފަށަން ހަމަޖެހިފައިވަނީ މި ޖެނުއަރީ މަހު 27 ގައެވެ.

އެކްސްގަސި ހިއްސާ ކޮށްފައިވާ ޕޯސްޓުގައި ބުނެފައިވަނީ މި ސެޓެލައިޓުތައް މަސައްކަތް ކުރާނީ ޖައްވުގައިވާ ސެލް ޓަވަރުތަކެއްގެ ގޮތުގައި ކަމަށެވެ. އަދި މީގެ ސަބަބުން ބިމުގައިވާ ޓަވަރުތަކުގެ ސިގްނަލްތައް ބޭނުން ނުކޮށް، މި ސެޓަލައިޓުތަކުގެ އެހީގައި އިންޓަނެޓު ހިދުމަތާއި ފޯނުގެ ހިދުމަތްތައް ކުރިއަށް ދާނެ ކަމަށް ޕޯސްޓުގައި ވެއެވެ.

މިއީ ސްޓާލައިޓުގެ އެންމެ ބޮޑު އެއް ޕްރޮޖެކްޓު ކަމުގައި ވީއިރު، މި ޕްރޮޖެކްޓު ކާމިޔާބު ކުރެވިއްޖެނަމަ، އެ ސެޓެލައިޓުތަކުގެ ޒަރިއްޔާއިން ދުނިޔޭގެ ކޮންމެ ހިސާބެއްގައިވާ މީހަކާވެސް ގުޅާލެވޭނެއެވެ. އެގޮތުން ސެލް ހިދުމަތްތައް ނުވަތަ ރޭންޖު ނުލިބޭ ހިސާބުތަކުގައިވާ މީހުންނާވެސް މި ސެޓެލައިޓުގެ ޒަރިއްޔާއިން ގުޅާލެވޭނެ ކަމަށް ރިޕޯޓުތަކުގައި ވެއެވެ.

މި ޕްރޮޖެކްޓުގެ މައިގަނޑު މަގްސަދަކީ ދުނިޔޭގެ އެކި ކަންކޮޅުތަކުގައިވާ "ޑެޑް ޒޯނު" ތައް ނައްތާލައި، ދުނިޔޭގެ ކޮންމެ ތަނެއްގައި ހުއްޓަސް އެހީތެެރިކަމަށް އެދި ގޮވާލެވޭނެ ގޮތެއް ހޯދުމެވެ. އެހެންކަމުން މި ޕްރޮޖެކްޓު ކާމިޔާބު ވެއްޖެނަމަ ދުނިޔޭގެ ކޮންމެ ހިސާބެއްގައި ހުރިކަމުގައި ވީނަމަވެސް ފަސޭހަކަމާއެކު އެހީއަށް އެދި ގުޅާލެވޭނެއެވެ. އަދި މިކަމަށް ވަކި ހާއްސަ ހާޑްވެއާއެއްގެ ފޯނެއްވެސް ބޭނުމެއް ނުވާނެ ކަމަށް ރިޕޯޓުތަކުގައި ވެއެވެ.

ސްޓާލިންކުން މިހާރު ދަނީ މުޅި ދުނިޔެއަށް އަވަސް އަދި ޔަގީން އިންޓަރނެޓްގެ ޚިދުމަތް ފޯރުކޮށްދެމުންނެވެ.