ދަތުގައި ރިއްސުމަކީ އޭގެ ސަބަބުން ހަށިގަނޑުގައި ވަރަށް ބޮޑަށް ވޭން އަޅާ ކަމެކެވެ. މިކަން ދިމާވުމަށް މެދުވެރިވާ ވަރަށް ގިނަ ސަބަބުތައް ވެއެވެ. އޭގެ ތެރޭގައި ހިރުގަނޑުގެ ބަލިތައް ޖެހުމާއި، ދަތް ހަލާކުވުމާއި، އިންފެކްޝަން އުފެދުން ހިމެނެއެވެ. މިކަމުގެ ސަބަބުން ދުވަހުގެ މަސައްކަތްތަކަށް ވަރަށް ބުރޫ އަރާ ފަހަރުވެސް އާދެއެވެ. ތިރީގައި މި ހިމަނާލަނީ ދަތުގައި ރިއްސާނަމަ ގޭގަައި ދެވޭނެ ބައެއް ފަރުވާތަކެވެ.

ކަރަންފޫ ތެޔޮ ބޭނުން ކުރުން

މިއީ މިކަމުގެ ފަރުވާއަކަށް ޒަމާނުއްސުރެ މީހުން ބޭނުން ކުރަމުން އައިސްފައިވާ އެއްޗެކެވެ. ކަރަންފުލަކީ އޭގައި އިއުޖިނޮލް ނަމަކަށް ކިޔާ މާއްދާއެއް އެކުލެވޭ އެއްޗެކެވެ. މި މާއްދާއަކީ ގުދުރަތީ އެނެސްތެޓިކެއްގެ ގޮތުގައި އާއި ޖަރާސީމާ ދެކޮޅަށް މަސައްކަތް ކުރާ އެއްޗެއްގެ ގޮތުގައި ހަރަކާތްތެރިވާ މާއްދާއެކެވެ. އެހެންވެ މި ބޭނުން ކުރުމުން ދުޅަވުން ކުޑަކޮށްދީ، ދަތުގެ ރިހުންވެސް ކުޑަކޮށްދެއެވެ.

ބޭނުން ކުރާނެ ގޮތް:

މި ބޭނުން ކުރުމަށް ކަފަ ކޮޅެއްގައި ކަރަންފޫ ތެޔޮކޮޅެއް ހާކާލުމަށްފަހު ތަދުވާ ތަނުގައި ރަނގަޅަށް އުނގުޅާލާނީއެވެ. އަދި 5 ވަރަަކަށް މިނެޓު މަޑުކޮށްލުމަށްފަހު ތާފެނާ ފެނުން އަނގަ ރަނގަޅަށް ދޮވެލާނީއެވެ. ކަރަންފޫ ތެޔޮ ނެތްނަމަ ކަރަންފުލެއް ހަފައިގެން ކެއުމުންވެސް ތަދު ރަނގަޅު ވެދާނެއެވެ.

ލޮނު ފެނުން އަނގަ ދޮވެލުން



ލޮނު ފެނުން އަނގަތެރެ ރަނގަަޅަށް ދޮވެލުމުންވެސް ދަތުގެ ރިހުން ރަނގަޅުވެއެވެ. ލޮނަކީ ގުދުރަތީ ޑިސްއިންފެކްޓެންޓެއް ކަމުން މި ބޭނުން ކުރުމުން ދުޅަވުން ކުޑަވެ، އަނގައިގައި ޖަރާސީމު ހުންނަ ވަރުވެސް މަދުވެއެވެ. އަދި އިންފެކްޝަން ރަނގަޅުވެ، ދަތުގެ ރިހުންވެސް ރަނގަޅު ވެއެވެ.

ބޭނުން ކުރާނެ ގޮތް:

މި ތައްޔާރު ކުރުމަށްޓަަކައި ތާފެނާ ފެން ތައްޓެއްގެ ތެރެއަށް ބައި ސައިސަމުސާ ލޮނު އަޅާފައި ރަނގަަޅަށް އެއްކޮށްލާނީއެވެ. އަދި އެއަށްފަހު އެ ފެން އަނގަޔަށް އެޅުމަށްފަހު 30 ސިކުންތު ވަންދެން އަނގަ ދޮންނާނީއެވެ. އަދި އަނގައިގައި ހުރި ފެން އުކާލުމަށްފަހު ފެންތަށީގައި ހުރި ފެން ހުސްވަންދެން މިކަން ތަކުރާރު ކުރާނީއެވެ.

މަސްދަރު: އީޓައިމްސް