ދުވަހަކުވެސް ޑައިޓު ކޯކު ބޭނުން ކުރުން ހުއްޓާނުލާނެ ކަމަށް މަޝްހޫރު ވިޔަފާރިވެރިޔާ ސީއީއޯ އީލަން މަސްކު ބުނެފިއެވެ.

އޭނާ މިހެން ބުނެފައިވަނީ ކޯކު ބުއިން ހުއްޓާލަން މަސައްކަތް ކުރުމުން އޭނާއަށް ދިމާވި މައްސަލަތައް ހިއްސާ ކުރަމުންނެވެ.

އެގޮތުން އޭނާ ބުނެފައިވަނީ ޑައިޓު ކޯކު ބުއިން ހުއްޓާލުމުގެ ބޭނުމުގައި އެއް މަސް ވަންދެން ކޯކު ނުބޮއެ ހުރި ކަމަށެވެ. ނަމަވެސް އެކަމުގެ ސަބަބުން އޭނާގެ ސިއްހަތަކަށް އެއްވެސް އަސަރެއް ނުކުރާ ކަމަށާއި، އޭނާގެ މޫޑަށް ބޮޑެތި ބަދަލުތަކެއް އައިސް އަބަދު ހިތްހަމަ ނުޖެހިފައި ހުރެވޭ ކަން އޭނާ ވަނީ ފާހަގަ ކޮށްފައެވެ.

އޭނާ އިތުރަށް ބުނެފައިވަނީ ކޯކު ބުއިން ހުއްޓާލުމުން އޭނާއަށް އުފާވެރިކަން ލިބިދޭ މާއްދާ ގެއްލުނު ކަމަށެވެ.

އެލޮން މަސްކުގެ މި ޕޯސްޓަށް ބެލުންތެރިންގެ ތަފާތު ރިއެކްޝަންތަކެއް ވަނީ ލިބިފައެވެ. އެގޮތުން އެއްބަޔަކަށް މަސްކުގެ އިހުސާސްތައް ދެނެގަނެވުނު އިރު އަނެއް ބަޔަކު ވަނީ އެހާ ގިނައިން ޑައިޓު ކޯކު ބޭނުން ކުރުމުން ލިބޭ ގެއްލުންތައް ހިއްސާ ކޮށްފައެވެ.

މަސްކު ވަނީ މީގެ ކުރިން އެތައް ފަހަރަކު އޭނާ ޑައިޓު ކޯކަށް އެޑިކްޓު ވެފައިވާކަން ސޯޝަލް މީޑިއާ ޕްލެޓްފޯމުތަކުގައި ހިއްސާ ކޮށްފައެވެ.