ނިރުބަވެރި އިސްރާއީލުން ޣައްޒާގެ ހަނގުރާމަ ހުއްޓާލުމުގެ އެއްބަސްވުން ތަންފީޒު ކުރުން ލަސްކުރާ ކަމަށް ފަލަސްތީނުގެ ދިފާއުގައި ހަރަކާތްތެރިވާ ހަމާސްއިން ތުހުމަތު ކޮށްފިއެވެ.

ހަމާސްއިން މި ތުހުމަތުތައް ކޮށްފައި ވަނީ ހަނގުރާމަ ހުއްޓާލުމުގެ އެއްބަސްވުމުގެ ޝަރުތުތަކާ ހިލާފަށް އިސްރާއީލުގެ ސިފައިން ޣައްޒާގެ އުތުރުގައި ތިބި ފަލަސްތީނުގެ ރައްޔިތުންނަށް ހަމަލާދީ އަނެއްކާވެސް ހަނގުރާމައިގެ ޖަރީމާތައް ހިންގަމުންދާތީއެވެ.

އިސްރާއީލުގެ ލާއިންސާނީ ބޮޑުވަޒީރު ބެންޖަމިން ނަތަންޔާހޫ ބުނީ ފަލަސްތީނުގެ ރައްޔިތުން އެނބުރި ޣައްޒާގެ އުތުރަށް ދިއުމަށް އިސްރާއީލުން ހުރަސްއަޅަނީ ހަމާސްގެ އަސީރުންގެ ގޮތުގައި ތިބި އާންމުން ދޫކޮށްލުން ލަސްވުމާ ގުޅިގެން ކަމަށެވެ.

މި މައްސަލަ ކުރިމަތިވީ ދެފަރާތުގެ މެދުގައި ހަނގުރާމަ ހުއްޓާލުމުގެ އެއްބަސްވުން ކުރިޔަށްދާތާ ދެވަނަ ހަފްތާއަށް އަޅާފައިވަނިކޮށެވެ. މިއެއްބަސްވުމުގެ ދަށުން މިދިޔަ ހޮނިހިރު ދުވަހު އިސްރާއީލުގެ ހަތަރު ސިފައިންނާއި ފަލަސްތީނުގެ 200 މީހުން ވަނީ ބަދަލުކޮށްފައެވެ.

ނިރުބަވެރިން ހިފާފައިވާ ހުޅަނގު އައްސޭރީގައި އިސްރާއީލުގެ ސިފައިން ހަމަނުޖެހުން ހިންގަމުންދާއިރު އެ ސިފައިން ދަނީ ޖެނިން ސިޓީއާއި އެ ސިޓީގެ ކައިރީގައި ބޮޑު އަސްކަރީ އޮޕަރޭޝަނެއްވެސް ހިންގަމުންނެވެ. މި އޮފަރޭޝަންގައި މަރުވި މީހުންގެ ތެރޭގައި ދެ އަހަރުގެ އަންހެން ކުއްޖަކު ވެސް ހިމެނެ އެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި އޮކްޓޯބަރު 7، 2023 އިން ފެށިގެން މަދުވެގެން 47،283 ފަލަސްތީނު މީހުން މަރުވެ 111،472 މީހުން ވަނީ ޒަހަމްވެފައެވެ.