އިސްރާއީލާ ފަލަސްތީނާ މެދު ކުރަމުން ދިޔަ ހަނގުރާމަ ހުއްޓާލައި ސުލްހަ ގާއިމުކުރުމާއެކު ޣައްޒާގެ އުތުރަށް ހިޖުރަކުރި މީހުންގެ އަދަދު ތިން ލައްކައަށް އަރައިފިއެވެ.

އޮފިޝަލުންނާ ހަވާލަދީ ބޭރުގެ މީޑިޔާތަކުން ރިޕޯޓުކުރާ ގޮތުގައި ހަނގުރާމައިގެ ދުވަސްވަރު ނިރުބަވެރި އިސްރާއީލުން ވަނީ ޣައްޒާގެ އުތުރުގެ އެކި ހިސާބުތަކުން މީހުން ނެރެފައެވެ. އެތައް ހާސް ބައެއްގެ ގެދޮރު ހަލާކުކޮށްފައިވާއިރު މިހާރުވެސް ގިނަ މީހުން ތިބީ ވަންނާނެ ބޯހިޔާވަހިކަމެއް ނެތިއެވެ.

ޣައްޒާގައި ހުންނަ އަލްޖަޒީރާގެ އޮފީހުން ރިޕޯޓްކުރާ ގޮތުގައި ފަލަސްތީނުގެ ރައްޔިތުންގެ ތެރެއިން މިހާރު އުތުރަށް އެނބުރި ދިޔަ މީހުންނަށް "ވީރާނާވެފައިވާ އިމާރާތްތައް ނޫން އެހެން އެއްޗެއް" ނުފެނެއެވެ.

މީޑިޔާ ރިޕޯޓަރުންނާއި ޣައްޒާގައި މިހާރު ހަރަކާތްތެރިވާ މިނިވަން ނޫސްވެރިން ބުނާ ގޮތުގައި އިސްރާއީލުން ހިފާފައިވާ ހުޅަނގު އައްސޭރީގައި ފަލަސްތީނުގެ ރައްޔިތުންނަށް މިހާރުވެސް ދަނީ ފިއްތުންތައް ކުރިމަތިކުރުވަމުންނެވެ. އަދި މިކަމަށް "ނިމުމެއް ނެތް" ކަމަށް ވެސް ބައެއް ފަރާތްތަކުން ދަނީ ބުނަމުންނެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި އޮކްޓޯބަރު 7، 2023 އިން ފެށިގެން މިހާތަނަށް 47،317 ފަލަސްތީނު މީހުން މަރުވެ 111،494 މީހުން ވަނީ ޒަހަމްވެފައެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި މަދުވެގެން 1،139 މީހުން މަރުވެ 200 އަށް ވުރެ ގިނަ މީހުން އަޅުވެތިކޮށްފައިވެ އެވެ.