ހއ. ދިއްދޫއަށް ދެން ވަޑައިގަންނަވާނީ އެ ރަށުގައި އަޅާ އެއަރޕޯޓު ހުޅުއްވައިދެއްވަން އެ އެއަރޕޯޓަށް ޖައްސާ ބޯޓުގައިކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިރޭ އެ ރަށު ރައްޔިތުންނާއެކު ބޭއްވެވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، ބިން ހިއްކުމުގެ މަސައްކަތާއެކު އެއަރޕޯޓުގެ މަސައްކަތް މި އަހަރުގެ ތެރޭގައި ބާރު ސްޕީޑުގައި ކުރިއަށް ގެންގޮސްދެއްވާނެކަމަށެވެ.

އެމަނިކުފާނު ވިދާޅުވީ، ދިއްދޫ އެއަރޕޯޓުގެ މަސައްކަތަކީ އެ އަތޮޅުގެ މެދު ރާސްތާ އަދި ދުރު ރާސްތާގެ ތަރައްގީގައި ވެސް ކަނޑާއަޅާފައިވާ މުހިންމު މަޝްރޫއެއް ކަމަށެވެ. އަދި އެ މަސައްކަތަކީ ވަރަށްވެސް އިސްކަމެއް ދެއްވައިގެން ކުރިއަށް ގެންގޮސްދެއްވާނެ މަސައްކަތެއް ކަމަށާއި އެކަން ބާރު ސްޕީޑުގައި ފެށުމަށް މިހާރު ކަންކަން ތަރުތީބު ކުރެވިފައިވާކަމަށް ރައީސް ވިދާޅުވި އެވެ.

އެގޮތުން އެމްޓީސީސީއާ ބައެއް މަސައްކަތް އަދި ބޭރުގެ ފަރާތަކާއި އެކީގައި ފްރޭމްވޯކް އެގްރީމެންޓެއްގައި ސޮއިކުރެވި ގިނަ މަސައްކަތްތަކެއް ފެށިފައިވާ ކަމަށް ރައީސް ވިދާޅުވިއެވެ.

"ބިން ހިއްކުން ނިންމާ ދެން ކުރަން ޖެހޭ ޝޯވ ޕްރޮޓެކްޝަން އަދި ރަންވޭ، މަސައްކަތަކާއި އެއާޕޯޓުގެ އިމާރާތްތަކާއެކު ފެށޭ ހިސާބުން، ބާރު ސްޕީޑްގައި ގެންގޮސް ނިންމަދޭނަމޭ، ނިންމާ ދެން އިރާދަކުރެއްވިއްޔާ އަޅުގަނޑު މިރަށަށް އަންނާނީ އެ އެއާޕޯޓަށް ޖައްސާ މަތިންދާބޯޓުގައި އެއާޕޯޓް ހުޅުވަން.،" ރައީސް ވިދާޅުވިއެވެ.

ރައީސްގެ ވައުދުތަކުގެ ތެރޭގައި ހިމެނޭ ދިއްދޫ އެއަރޕޯޓުގެ މަސައްކަތް މިދިޔަ އަހަރު އެމްޓީސީސީއާ ވަނީ ހަވާލު ކޮށްފައެވެ.