ނިރުބަވެރި އިސްރާއީލުން އދ. ގެ އިންސާނީ އެހީދޭ ޖަމިއްޔާ ބޭރުކޮށްލުމުން ނިރުބަވެރިން ހިފާފައިވާ ފަލަސްތީނުގެ ބިންތަކުގެ މީހުން ބަނޑަށް ޖެހޭނެ ކަމަށް އޮފިޝަލުން ބުނަން ފަށައިފިއެވެ.

މި މައްސަލައިގައި ފަލަސްތީނުގެ ރެފިއުޖީންނާ ބެހޭ އދ. ގެ އެޖެންސީ (ޔޫއެންއާރުޑަބްލިއުއޭ) ގެ ވެރިޔާވެސް ވަނީ ކަންބޮޑުވުން ފާޅުކުރައްވާފައެވެ. އެގޮތުން އޭނާ ވަނީ އިސްރާއީލުން އެ ޖަމިއްޔާ މަނާކުރުމުގެ ސަބަބުން ޣައްޒާގައި އިންސާނީ މަސައްކަތްތައް ނާކާމިޔާބުވެ، އެތަނުގައި އިސްރާއީލާއި ހަމާސްގެ ހަނގުރާމަ ހުއްޓާލުމަށް ބުރޫއަރާނެ ކަމަށް އިންޒާރު ދެއްވާފަ އެވެ.

ޔޫއެންއާރްޑަބްލިއުއޭގެ ކޮމިޝަނަރ ޖެނެރަލް ފިލިޕް ލަޒާރީނީ އަންގާރަ ދުވަހު ސަލާމަތީ މަޖިލީހަށް ވިދާޅުވީ ބުރާސްފަތި ދުވަހުން ފެށިގެން އަމަލުކުރަން ފަށާ މި މަނާކުރުމަކީ އިސްރާއީލުން ހިފާފައިވާ ފަލަސްތީނުގެ ސަރަހައްދުގައި މިފަދަ މުހިންމު ދަނޑިވަޅެއްގައި ނުތަނަވަސްކަން އިތުރުވެ މާޔޫސްކަން އިތުރުކޮށްދޭނެ ކަމެއް ކަމަށެވެ.

ފިލިޕް ލަޒާރީނީ ވިދާޅުވީ ނިރުބަވެރިންގެ މި ފިޔަވަޅާއެކު 15 މަހަށް ވުރެ ގިނަ ދުވަހަށް ދެމިގެންދިޔަ ހަނގުރާމައިގެ ސަބަބުން ގެއްލުން ލިބިފައިވާ ފަރާތްތަކަށް ލިބުނު ގެއްލުމުން އަރައިގަނެ ހަމައަކަށް އަންނަން ކުރާ މަސައްކަތްތަކަށް ބުރޫއަރާނެ ކަމަށެވެ. އަދި އޭނާ ވިދާޅުވީ މިކަމުގެ ސަބަބުން ބައިނަލްއަގްވާމީ މުޖުތަމައުގެ އިތުބާރު ގެއްލި ސުލްހައާއި ސަލާމަތުގެ ފުރުސަތުތަކަށް ނުރައްކާވާނެ ކަމަށެވެ.

ނިރުބަވެރި އިސްރާއީލުގެ މުހިންމު އެކުވެރިއެއް ކަމަށްވާ އެމެރިކާއިން ވަނީ ޔޫއެންއާރްޑަބްލިއުއޭ މަނާކޮށް، ޔޫއެންއާރްޑަބްލިއުއޭއާ ގުޅުން ކަނޑާލުމަށް އިސްރާއީލުން ނިންމި "ސިޔާސަތުގެ ނިންމުމަށް" ތާއީދުކޮށްފަ އެވެ.