ހއ. އިހަވަންދޫގައި ގާއިމުކުރާ ފިޝަރީޒް ކޮމްޕްލެކްސްގެ ބިންގާ މަސްވެރިކަމާ ބެހޭ ވަޒީރު އަހުމަދު ޝިޔާމް އަޅުއްވައިދެއްވައިފިއެވެ.

މި ކޮމްޕްލެކްސްގެ ބިންގާ އަޅާފައި މިވަނީ ރައީސް ޑރ. މުހައްމަދު މުއިއްޒު ހއ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން މިއަދު އިހަވަންދު އަށް ވަޑައިގަތުމާ އެކީގައެވެ. މި ރަސްމިއްޔާތުގައި މިފްކޯގެ އިސް ވެރިން ވެސް ބައިވެރިވެވަޑައިގަތެވެ.

ސަރުކާރުން ބުނީ މި ކޮމްޕްލެކްސްގައި 1،000 ޓަނުގެ ކޯލްޑް ސްޓޯރޭޖަކާއި، 50 ޓަނުގެ ބްރައިން ފްރީޒިން ފެސިލިޓީއެއް ގާއިމުކުރާނެ ކަމަށެވެ. މީގެއިތުރުން އޮފީސް އިމާރާތަކާއި އިންޖީނުގެއެއް، ވެހިކަލް ވޯކްޝޮޕަކާއި ގުދަނެއް ވެސް ކޮމްޕްލެކްސްގައި ހިމެނޭނެ އެވެ.

130 މީޓަރުގެ ދިގު މަގަތު ފާލަމަކާއި، 3.5 މީޓަރުގެ ފުންމިނުގައި ބަނދަރެއް އަދި ތިން ޕޮއިންޓުން މަސްކިރޭ ޖެޓީއެއްވެސް މި މަޝްރޫޢުގެ ދަށުން ތަރައްގީ ކުރާނެ ކަމަށް ސަރުކާރުން ބުނެއެވެ.

އިހަވަންދޫގައި ގާއިމުކުރާ މި ފިޝަރީޒް ކޮމްޕްލެލްސް އަކީ ސަރުކާރާއި އިސްލާމިކް ޑިވެލޮޕްމަންޓް ބޭންކް (އައިޑީބީ) ގުޅިގެން ކުރިއަށް ގެންދާ މަޝްރޫޢެކެވެ. މި މަޝްރޫޢުގެ ސަބަބުން ބޮޑުތިލަދުންމަތީގެ މަސްވެރިންނަށް ތެޔޮ އަދި އައިސް ހޯދުމަށް ދުރަށް ދަތުރު ކުރަން ޖެހޭ ދަތުރުތައް ނިމުމަކަށް އައިސް، ޚަރަދުތައް ވެސް ކުޑަވެގެންދާނެ ކަމަށް މިނިސްޓްރީން ބުންޏެވެ.

އިހަވަންދޫގައި ގާއިމުކުރާ ފިޝަރީޒް ކޮމްޕްލެލްސްގެ ސަބަބުން އިހަވަންދޫގައި 150 އަށް ވުރެ ގިނަ ވަޒީފާގެ ފުރުސަތު ވެސް އުފެދިގެން ދާނެ އެވެ.