އާ ޤާނޫނުގެ ދަށުން ޓޫރިޒަމް ދާއިރާއިން ފާއިތުވި އެއް މަސްދުވަހުގެ ތެރޭގައި 25 މިލިއަން ޑޮލަރު މާރުކޮށްފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ، ހއ،. ހޯރަފުއްޓަށް ވަޑައިގެން މިރޭ އެ ރަށު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

އެމަނިކުފާނުގެ ވާހަކަފުޅުގައި ވިދާޅުވީ، ޓޫރިޒަމް ދާއިރާއިން ލިބޭ ޑޮލަރު މަރުކަޒީ ބެންކަށް މާރުކުރަންޖެހޭގޮތަށް ހެދި ގާނޫނަށް މަދު ރިސޯޓަކުން ފިޔަވައި އަމަލުކުރަމުން ދާކަމަށެވެ. އަދި އެއް މަސްދުވަހުގެ ތެރޭގައި 25 މިލިއަން ޑޮލަރު ބެންކުތަކަށް މާރުކޮށްފައިވާކަމަށް ގަވަރުނަރު މައުލޫމާތު ދެއްވާފައިވާކަމަށް ރައީސް ވަނީ ވިދާޅުވެފައެވެ.

އެމަނިކުފާނު ވިދާޅުވީ، މިވަގުތު ބައެއް ރިސޯޓުތަކުން އެ ގާނޫނަށް އަމަލު ނުކުރިނަމަވެސް، އެއްވެސް ފަރާތެއް އެކަމުގައި އިސްތިސްނާވިޔަ ނުދެއްވާނެކަމަށެވެ.

"އެ ގާނޫނަށް ފޯލްވާ އެ ގާނޫނުގެ ދަށުން ޑޮލަރު މާރުކުރަންޖެހޭ ހަމަ އެއްވެސް ވިޔަފާރިވެރިޔަކަށް އޭގެން އަޅުގަނޑުމެން އިސްތިސްނާއެއް ނުދޭނަން. ކޮންމެ ރިސޯޓެއްކަމުގައި ވިޔަސް އަދި އެގާނޫނުގެ ދަށުން ޑޮލަރު މާރުކުރަންޖެހޭ ކޮންމެ ފަރާތެއްކަމަށް ވިޔަސް ހަމަޖެހޭނީ އެކަން ކުރައްވަން." ރައީސްގެ ވާހަކަފުޅުގައި ވިދާޅުވިއެވެ.

ބޭރުފައިސާއިން އާމްދަނީ ލިބޭ ވިޔަފާރިތަކުން ކޮންމެ ޓްއަރިސްޓެއްގެ ބޮލަކަށް 500 ޑޮލަރު ނޫނީ އާމްދަނީގެ 20 އިންސައްތަ މާރުކުރަންޖެހޭގޮތަށް ކަނޑައަޅާފައިވާ ގާނޫނު ރައީސް ތަސްދީގު ކުރެއްވީ މިދިޔަ އަހަރުގެ ޑިސެންބަރު 14 ގައެވެ. އެ ގާނޫނަށް އަމަލުކުރަން ފެށުމާއެކު ބައެއް ވިޔަފާރިވެރިން އެކަމުގެ ކަންބޮޑުވުން ފާޅުކުރިނަމަވެސް އެކަމުގައި ގިނަ ވިޔަފާރިވެރިން އެއްބާރުލުން ދެމުންދާކަމަށް އެމްއެމްއޭއިން ބުނެއެވެ.