ކެންސަރު ބައްޔަކީ ވަރަށް ނުރައްކާތެރި ބައްޔަކަށްވީއިރު، މިއީ ދުނިޔޭގައި މީހުން އެންމެ ގިނައިން މަރުވާ ސަބަބުތަކުގެ ތެރެއިން އެއް ސަބަބެވެ. އެހެންކަމުން މި ބަލިން ރައްކާތެރިވެ، ދުޅަހެޔޮ ސިއްހަތެއްގައި ހުރުމަށްޓަަކައި ކޮންމެ މީހަކުވެސް މަސައްކަތް ކުރަން ޖެހެއެވެ.

ތިރީގައި މި ހިމަނާލަނީ ކެންސަރު ބަލިން ރައްކާތެރި ވުމަށްޓަކައި ކުރަންވީ 3 ކަމެވެ.

ދުންފަތުގެ އިސްތިއުމާލު ކުރުން ހުއްޓާލުން

ދުންފަތުގެ އިސްތިއުމާލު ކުރުމަކީ ކެންސަރު ބަލި ޖެހުމަށް މެދުވެރިވާ އެންމެ މައިގަނޑު ސަބަބުތަކުގެ ތެރެއިން އެއް ސަބަބެވެ. ވީމާ ދުންފަތުގެ އިސްތިއުމާލު ހުއްޓާލުމުން ކެންސަރު ޖެހުމުގެ ނުރައްކާ ބޮޑުތަން ކުޑަކުރެވޭނެއެވެ.

ހަށިގަނޑުގެ ބަރުދަން ލުއި ކުރުން

މީހާ މާ ބޮޑަށް ފަލަވެ، ހަށިގަނޑުގެ ބަރުދަން އިތުރުވުމަކީވެސް ކެންސަރު ބަލި ޖެހުމަށް މެދުވެރިވާ ސަބަބެކެވެ. ވީމާ ގަވާއިދުން ކަސްރަތު ކޮށް، ދުޅަހެޔޮ ކާނާކައި، ބަރުދަން ފައިދާހުރި މިންވަރެއްގައި ބެހެއްޓުމަކީ ވަރަށް މުހިންމު ކަމެކެވެ. ހަށިގަނޑުގެ ބަރުދަން ހެޔޮ މިނެއްގައި ބެހެއްޓުމުން ކެންސަރު ޖެހުމުގެ ނުރައްކާ ކުޑަކުރެވޭނެއެވެ.

އިރުގެ އަލިން ރައްކާތެރިވުން

އިރުގެ އަލީގައި ގިނަ ވަގުތު ހޭދަކުރުމަކީ ހަމުގެ ކެންސަރު ޖެހުމުގެ ނުރައްކާ އިތުރުވާ އެއް ސަބަބެވެ. ވީމާ ކެންސަރު ބަލިން ރައްކާތެރި ވާން ބޭނުންވާނަމަ އިރުގެ އަލިން ރައްކާތެރިވުމަށް ސަންސްކްރީން ބޭނުންކުރުމާއި، އިރުގެ އަލި ގަދަ ވަގުތުތަކުގައި ހިޔަލުގައި ހުރުމަށް ސަމާލުކަން ދިނުމަކީ މުހިންމު ކަމެކެވެ.