އެޕަލް އިން އިންޑިޔާގައި ހުޅުވާ ފުރަތަމަ އޮންލައިން ސްޓޯރ މިއަންނަ ހަފްތާގައި ހުޅުވުމަށް ނިންމައިފި ކަމަށް އެޕަލް އިން އިއުލާންކޮށްފިއެވެ.

އިންޑިޔާ އަކީ ދުނިޔޭގައި ސްމާޓް ފޯން އެންމެ އަވަހަށް ހިނގާ މާކެޓް އޮންނަ ގައުމަކަށް ވުމުން، މިއީ އެޕަލްގެ ސޭލްސް އިތުރުކުރުމަށް އޮތް އުންމީދެއްކަމަށް އެޕަލް އިން ފާހަގަ ކުރެއެވެ.

މިކަމާ ބެހޭގޮތުން އެޕަލް ގެ ސިއީއޯ ޓިމް ކޫކް ގެ ޓްވީޓް ގައި، އިންޑިޔާގައި ތިބި އެޕަލްގެ ކަސްޓަމަރުންނަށް އިތުރު ހިދުމަތްތައް ފޯރުކޮށްދެވޭނެ ކަމަށް ފާހަގަ ކޮށްފައިވެއެވެ.

1.4 ބިލިއަން މީހުންގެ އާބާދިއެއްގެ މައްޗަށް އެކުލެވޭ އިންޑިޔާ އަކީ މިހާރު ގިނަ ޓެކް ކުންފުނިތަކުގެ އަމާޒެވެ. އިންޑިޔާ އަކީ ފަހުގެ ޓެކްނޮލޮޖީ އަށް ލޯބިކުރާ ގިނަބަޔަކު އުޅޭގައުމެކެވެ.

މިމަހުގެ 23 ގައި އެޕަލްގެ އޮންލައިން ސްޓޯރ އިންޑިޔާގައި ހުޅުވުމަށް ހަމަޖެހިފައިވާކަން، އެޕަލް އިން މިއަދު އިއުލާން ކޮށްފައިވެއެވެ.