ޗައިނާއިން އެއްފަހަރާ 1,000 އަށްވުރެ ގިނަ މިސައިލާއި ފަޒާގެ އެކި ތަކެތި ދެނެގަނެ، އެ ތަކެތީގެ މިސްރާބު ބެލުމުގެ ޤާބިލުކަން ލިބިގެންވާ އާދަޔާޚިލާފު "ޕްލޭނެޓަރީ ޑިފެންސް ރޭޑާ" އެއް އުފައްދައި، އޭގެ ފުރަތަމަ ޕްރޮޓޯޓައިޕް ދައްކާލައިފިއެވެ.

"ސްޑް-އެރޭ" ރޭޑާ ޓެކްނޮލޮޖީއާއި އާޓިފިޝަލް އިންޓެލިޖެންސް ބޭނުންކޮށްގެން ފަރުމާކޮށްފައިވާ މި ނިޒާމަކީ، އެތައް ހާސް ކިލޯމީޓަރެއްގެ ދުރުން ދުނިޔެއަށް އަންނަ ނުރައްކާތައް ދެނެގަތުމުގެ ބާރު ލިބިފައިވާ ނިޒާމެކެވެ. މީގެ ތެރޭގައި އެއް ބައްރުން އަނެއް ބައްރަށް ފޮނުވާލާ މިސައިލްތަކާއި، ދުނިޔެއާ ކައިރިން ދަތުރުކުރާ ނުރައްކާތެރި އެސްޓެރޮއިޑްތައް ހިމެނެއެވެ.

މި އާ ނިޒާމަކީ ދުނިޔޭގެ ރައްކާތެރިކަމަށްޓަކައި ޗައިނާއިން ކުރިއަށްގެންދާ "ސްޕޭސް ޝީލްޑް" ނުވަތަ ފަޒާގެ އައްޑަނަ މަޝްރޫޢުގެ މުހިންމު ބައެކެވެ.

ގަޑިއަކު އެތައް ހާސް ކިލޯމީޓަރެއްގެ ބާރުމިނުގައި ދަތުރުކުރާ ތަކެތި މޮނިޓަރުކުރުމަށް ފުން ފަޒާގެ ސެންސަރުތައް މި ނިޒާމުގައި ބޭނުންކުރެއެވެ. މި ރޭޑާގެ އެންމެ ޚާއްޞަ އެއް ސިފައަކީ ވަރަށް ފުޅާ ދާއިރާއެއްގައި ތަކެތި ދެނެގަތުމުގެ ކުޅަދާނަކަމާއި، މިލިސިކުންތެއްގެ ތެރޭގައި ރައްދު ދިނުމުގެ ބާރު ލިބިފައިވުމެވެ. މިއީ ފަޒާގެ ދިފާޢީ ޓެކްނޮލޮޖީގެ މުޅިން އާ މަރުޙަލާއެއްގެ ގޮތުގައި މާހިރުން ސިފަކުރެއެވެ.

ސައިންސްވެރިން "އިންސާނީ ތާރީޚުގައި މިހާތަނަށް އުފައްދާ އެންމެ ވަރުގަދަ ރޭޑާ ނެޓްވޯކް" ގެ ގޮތުގައި ނަންދީފައިވާ މި މަޝްރޫޢަކީ ޗައިނާގެ މުސްތަޤުބަލުގެ ޕްލޭނެޓަރީ ޑިފެންސް ގްރިޑްގެ މައިބަދައެވެ. މި ނިޒާމުގެ ތެރެއިން ފަޒާގެ މޮނިޓަރިންގއާއި، މިސައިލްތައް ހުއްޓުވުމާއި، އަދި އޭއައި ބޭނުންކޮށްގެން ކުރިއާލާ އިންޒާރު ދިނުން އެއް ވިއުގައަކުން ގުޅާލެވޭނެއެވެ. މި އީޖާދާއެކު ޗައިނާއިން ވަނީ ދުނިޔޭގެ ފަޒާގެ ދިފާޢީ ނިޒާމުގައި ބޮޑު ކުރިއެރުމެއް ހޯދާފައެވެ.