ރިޔާސީ އިންތިހާބުގެ ކެމްޕެއިން ތެރޭގައި މަސްވެރިންގެ ވޯޓު ހޯދުމަށް ރައީސް ޑރ. މުހައްމަދު މުއިއްޒު ވެވަޑައިގެންނެވި އެންމެ ބޮޑު އެއް ވައުދަކީ ބޮޑު ކަންނެލި ކިލޯއެއްގެ އަގު 80 ރުފިޔާ އާއި 100 ރުފިޔާ އާ ދެމެދުގައި ހިފެހެއްޓުމެވެ.

ނަމަވެސް، ސަރުކާރަށް ދެ އަހަރު ފުރިގެން ދިޔައިރު ފެންނަނީ މުޅިން ތަފާތު މަންޒަރެކެވެ. މިފްކޯއިން މިހާރު ކަންނެލި ގަންނަން ފަށާފައިވަނީ ކިލޯއަކަށް އެންމެ 20 ރުފިޔާ އާއި 25 ރުފިޔާ އާ ދެމެދުގެ އަގެއްގައެވެ. މިއީ ރައީސް ވީ ވައުދާ އަޅާބަލާއިރު އެތައް ގުނައެއް ދަށް، އަދި މަސްވެރިންގެ އުންމީދުތަކަށް ދިން ވަރުގަދަ ހަމަލާއެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.

ސަރުކާރުގެ މި އަމަލަކީ މަސްވެރިންނަށް ވީ އިހާނެތިކަމެއްގެ ގޮތުގައި މަސްވެރި އާއިލާތަކުން ދަނީ ތުހުމަތު ކުރަމުންނެވެ. ޚާއްސަކޮށް، ބޭސް ރޭޓުގައި ތެލާއި އައިސް ފޯރުކޮށްދިނުމުގެ ވައުދު ފަދަ އަސާސީ ކަންކަން ފުއްދައިނުދީ، މަސްވެރިންގެ ޝަކުވާތަކަށް ބީރު ކަންފަތެއް ދިނުމަކީ ސަރުކާރުގެ އިޚުލާސްތެރިކަމެއް ނެތްކަން ހާމަވާ ކަމެކެވެ. މަސްވެރިންގެ ދުވަހު މާލެ ފަޅުތެރޭގައި ކުރި ސުލްހަވެރި އިހުތިޖާޖު ބާރުގެ ބޭނުންކޮށްގެން ހުއްޓުވުމަކީ ޑިމޮކްރެޓިކް ހަމަތަކާ ޚިލާފު، އަދި މަސްވެރިންގެ އަޑު ކަނޑުވާލަން ކުރި ނާތަހުޒީބު އަމަލެއްގެ ގޮތުގައި ފާޑުކިޔުންތެރިން ފާހަގަކުރެއެވެ.

މީގެ އިތުރުން، މިފްކޯއިން މަސް ގަންނަން ފެށި ނަމަވެސް އެކަން ކުރަނީ މަސްވެރިންގެ ކަންބޮޑުވުންތަކަށް ހަގީގީ ހައްލެއް ހޯދައިދިނުމުގެ ބަދަލުގައި، އާ ތާރީހުތަކެއް ދީގެން ވަގުތީ އުކުޅެއްގެ ގޮތުގައި ކަމަށް މަސްވެރިން ބުނެއެވެ.

ސަރުކާރުގެ މި ސިޔާސަތުތަކުގެ ސަބަބުން މަސްވެރިކަމުގެ ސިނާއަތަށް އޮތް އިތުބާރު ގެއްލި، ރާއްޖޭގެ އިގްތިސާދުގެ މައިނާރަށް އިއާދަނުކުރެވޭ ފަދަ ގެއްލުންތަކެއް ލިބިދާނެ ކަމުގެ ބިރު ވަނީ ހީވެފައެވެ. ރައީސް މުއިއްޒުގެ "މަސްވެރިންގެ ސަރުކާރު" މިހާރު ސިފަވަމުންދަނީ ވައުދުތަކަށް ފުރަގަސްދީ، މަސްވެރިން ބިކަކުރަމުންދާ ސަރުކާރެއްގެ ގޮތުގައެވެ.