އަލަށް ފެށުނު 2026 ވަނަ އަހަރު ފާހަގަކުރުމުގެ ގޮތުން މާލޭގައި ބޭއްވި ކުލަގަދަ ޑްރޯން ޝޯއަށް 1.5 މިލިއަން ދިވެހި ރުފިޔާ ޚަރަދުވެފައިވާ ކަމަށް ވިޒިޓް މޯލްޑިވްސް ކޯޕަރޭޝަނުން ހާމަކޮށްފިއެވެ.

ވިޒިޓް މޯލްޑިވްސްއިން ހާމަކުރިގޮތުގައި، ޑިފެންސް މިނިސްޓްރީގެ ހުއްދައާއެކު ކުރިއަށް ގެންދިޔަ މި ހަރަކާތަށް ޖުމްލަ 100،000 އެމެރިކާ ޑޮލަރު ޚަރަދުވިއެވެ. އެއީ ދިވެހި ފައިސާއިން ބަލާނަމަ 1،542،000 ރުފިޔާއެވެ. 600 އަށްވުރެ ގިނަ ޑްރޯން ބޭނުންކޮށްގެން ކުރިއަށް ގެންދިޔަ މި 'ޕައިރޯ ޑްރޯން' ޝޯއަށް އާންމުންގެ ބޮޑު ތަރުހީބެއް ލިބުނުއިރު، މި ޝޯގެ ޚާއްސަ ކަމަކީ ކުޑަ ކުއްޖަކު ކިޔައިދޭ ވާހަކައެއްގެ ސިފައިގައި މުޅި ޝޯ ފަރުމާކޮށްފައި އޮތުމެވެ.

މިފަހަކަށް އައިސް ސަރުކާރުން ބާއްވާ ބޮޑެތި ހަފްލާތަކުގައި ޑްރޯން ޝޯތައް ދަނީ ހިމަނަމުންނެވެ. އެގޮތުން ވެލާނާ އިންޓަނޭޝަނަލް އެއާޕޯޓުގެ އައު ޓާމިނަލް ⁶ ބޭއްވި ރަސްމިއްޔާތުގައި ވެސް ބޮޑު ޑްރޯން ޝޯއެއް ބޭއްވިއެވެ. އެ ރޭ މާލެ އާއި އެއާޕޯޓު ހިމެނޭހެން 19 ސަރަހައްދެއްގައި ހަވާ އެރުވި އިރު، އޭގެ ތެރެއިން ބައެއް ޚަރަދުތަކަށް އެކަނިވެސް 18.9 މިލިއަން ރުފިޔާ ހޭދަވިކަން ފާހަގަކުރެވެއެވެ. ނަމަވެސް ބައެއް ނޫސްރިޕޯޓްތަކުން ބުނާގޮތުގައި މި ރަސްމިއްޔާތުގެ ބައެއް ޚަރަދުތައް ސަރުކާރުން ސިއްރުކޮށްފައިވާތީ އާއަހަރު ފާހަގަކުރުމަށް ބޭއްވި ހަރަކާތުގެ ޖުމްލަ ޚަރަދު އެނގޭކަށް ނެތެވެ.

ސަރުކާރުން ކުރަމުންދާ މިފަދަ ހާލަތާ ނުބައްދަލު ޚަރަދުތަކާގުޅިގެން އިދިކޮޅު ފަރާތްތަކުން ދަނީ މިކަމުގެ ކަންބޮޑުވުން ފާޅުކޮށް ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.

އިދިކޮޅު ފަރާތްތަކުން ވިދާޅުވާގޮތުގައި ރާއްޖޭގެ ދަރަނީގެ ހާލަތު އިންތިހާއަށް ގޯސްވެ، ބައިނަލްއަގުވާމީ މާލީ އިދާރާތަކުން ޚަރަދު ކުޑަކުރުމަށް ތަކުރާރުކޮށް ލަފާދެމުންދާ ދަނޑިވަޅެއްގައި، މުނިފޫހިފިލުވުމުގެ މިފަދަ ކަންކަމަށް މިލިއަނުން ޚަރަދު ކުރުމަކީ ވަރަށްވެސް ޒިންމާދާރުކަން ކުޑަ އަމަލެކެވެ.