އިރާނުގެ މަސްރަހު ގޯސްވެ، އެމެރިކާގެ ހަމަލާއެއް އަތުވެދާނެކަމުގެ ބިރު ބޮޑުވުމާ ގުޅިގެން، އެ ގައުމުގެ އެންމެ މަތީ ވެރިޔާ އަލީ ޚާމަނާއީ ރައްކާތެރި ބަންކަރަކަށް ބަދަލުވެވަޑައިގެންފިއެވެ.

ރިޕޯޓްތައް ބުނާގޮތުން ޚާމަނާއީ މިހާރު ހުންނެވީ ހަނގުރާމައިގެ ހާލަތްތަކުގައި ބޭނުންކުރުމަށް ތައްޔާރުކޮށްފައިވާ ހާއްސަ ބަންކަރެއްގައެވެ. އަދި އޭނާގެ ދުވަހުން ދުވަހަށް ކުރަންޖެހޭ މަސައްކަތްތަކާއި މުއާމަލާތްތައް ބެލެހެއްޓުމާ އޭނާގެ ތިންވަނަ ދަރިކަލުން، މަސްއޫދު ޚާމަނާއީ މިހާރު ވަނީ ހަވާލުވެވަޑައިގެންފައެވެ.

މި ނުތަނަވަސްކަން އިތުރުވެފައިވަނީ، އިރާނުގެ ފައިސާގެ އަގު ދަށަށް ދިއުމާ ގުޅިގެން މިދިޔަ ޑިސެމްބަރު 28 އިން ފެށިގެން އެ ގައުމުގައި ކުރިއަށްދާ މުޒާހަރާތަކާ ގުޅިގެންނެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ އިރާނަށް ވަރުގަދަ އިންޒާރުތަކެއް ދެއްވާފައެވެ. ޓްރަމްޕް ވިދާޅުވި ގޮތުގައި އެމެރިކާގެ ބޮޑު ކަނޑުގެ ފައުޖެއް ނުވަތަ "އާމާޑާ" އެއް މިހާރު ދަނީ އިރާނާ ދިމާލަށް ދަތުރުކުރަމުންނެވެ. މީގެ ތެރޭގައި މަތިންދާބޯޓު އުފުލާ މަނަވަރު، ޔޫއެސްއެސް އަބްރަހަމް ލިންކަން ވެސް ހިމެނެއެވެ.

ޓްރަމްޕް ވަނީ ބާރުގެ ބޭނުންކުރުމުގައި ދެ "ރަތް ރޮނގު" ކަނޑައަޅުއްވާފައެވެ. އެއީ ސުލްހަވެރި މުޒާހަރާގެ ބައިވެރިން މެރުމާއި، ހައްޔަރުކުރެވޭ މީހުން ގިނަ އަދަދަކަށް މެރުމެވެ. އިރާނުން 800 މީހުންގެ މަރުގެ އަދަބު ހުއްޓާލި ނަމަވެސް، ޓްރަމްޕް އަދިވެސް ހުންނެވީ އިރާނުން ކަންކަން ކުރަމުންދާ ގޮތާމެދު ވަރަށް ބޮޑަށް ހިތްޕުޅާނުވެފައެވެ.

އިރާނުގެ ފަރާތުން ވާހަކަ ދެއްކެވި އޮފިޝަލަކު ވިދާޅުވި ގޮތުގައި، އެމެރިކާގެ ކޮންމެ ފަދަ ހަމަލާއެއް ވެސް ބަލާނީ މުޅި ގައުމަށް ދެމޭ ހަމަލާއެއްގެ ގޮތުގައެވެ. އަދި އެމެރިކާއިން އިރާނުގެ އިސްތިގުލާލަށް އަރައިގަންނަ ނަމަ، އެންމެ ހަރުކަށި ފިޔަވަޅު އަޅާނެ ކަމަށް އޭނާ އިންޒާރު ދިނެވެ. މީގެ އިތުރުން، އިރާނުގެ ސަރުކާރު ޓީވީން ވަނީ 2024 ވަނަ އަހަރު ޓްރަމްޕަށް ދިން ހަމަލާގެ މަންޒަރުތައް ދައްކައި، "މިފަހަރު އުންޑައެއް ނުކަތާނެ" ކަމަށް ބުނެ ބިރުވެރި އިންޒާރެއް ދީފައެވެ.