ރާއްޖޭގައި ފުޅާވަމުން އަންނަ އޮންލައިން ޖުވާކުޅުމުގެ މައްސަލައަށް ދާއިމީ ހައްލެއް ހޯދުމަށްޓަކައި، ހަމައެކަނި ގާނޫނެއް ފާސްކުރުމުގެ ބަދަލުގައި، ބޭންކިން ނިޒާމުގެ ތެރެއިން އެފަދަ ސައިޓުތަކަށް ފައިސާ ފޮނުވުން ބަންދުކުރުން ފަދަ އަމަލީ ފިޔަވަޅުތަކެއް އަޅަންޖެހޭ ކަމަށް ކުރީގެ ޕްރޮސިކިއުޓަރ ޖެނެރަލް އަލްއުސްތާޒު ޙުސައިން ޝަމީމް ވިދާޅުވެއްޖެއެވެ.

ޝަމީމް މިހެން ވިދާޅުވީ، ޖުވާކުޅުމާއި ޖުވާކުޅޭ ތަންތަން ހިންގުމަކީ ޖިނާއީ ކުށެއްގެ ގޮތުގައި ކަނޑައެޅުމަށްޓަކައި ގާނޫނުލްއުގޫބާތަށް އިސްލާހު ގެނައުމުގެ ބިލެއް، ހިތަދޫ މެދު ދާއިރާގެ މެންބަރު އަހުމަދު އަޒާން މަރުޒޫގު 3 ޖަނަވަރީ 2026 ގައި ރައްޔިތުންގެ މަޖިލީހަށް ހުށަހަޅުއްވާފައިވާ ދަނޑިވަޅެއްގައެވެ.

މިކަމާ ގުޅޭގޮތުން ޝަމީމް ލިޔުއްވި ބްލޮގް ޕޯސްޓެއްގައި ވިދާޅުވީ، ޖުވާކުޅުމަކީ އިސްލާމްދީނުގައި ހަރާމްކުރައްވާފައިވާ، އިޖުތިމާއީ ގިނަ މައްސަލަތަކެއް ކުރިމަތިކުރުވާ ކަމަކަށްވާތީ، އެކަން ގާނޫނުލްއުގޫބާތުގައި ކުށެއްގެ ގޮތުގައި ލިޔަންޖެހޭ ކަމަށެވެ. ނަމަވެސް، ހަމައެކަނި ޖިނާއީ އަދުލުގެ ނިޒާމަކީ މިކަމަށް އޮތް ދާއިމީ ހައްލު ކަމަށް ގަބޫލުނުކުރައްވާ ކަމަށް އޭނާ ވިދާޅުވިއެވެ.

ޝަމީމް ވިދާޅުވ، ރާއްޖޭގެ 16 އަހަރާއި 64 އަހަރާ ދެމެދުގެ އާބާދީގެ ގާތްގަނޑަކަށް 20 އިންސައްތަ ނުވަތަ 80،000 އެއްހައި މީހުން ކޮންމެ ދުވަހަކު ކޮންވެސް ސިފައެއްގައި އޮންލައިންކޮށް ޖުވާކުޅޭ ކަމަށެވެ.

"މި ބަދަލު މިއައީ ސްމާޓް ފޯނުން އޮންލައިންކޮށް ޖުވާކުޅެވޭ ގޮތް ވުމުން. މި އެޕުތައް ހުންނަނީ މީހުން ދެވިހިފާ ގޮތަށް އެޓެންޝަން އިންޖިނިއަރިން ބޭނުންކޮށްގެން ފަރުމާކޮށްފައި،" ޝަމީމް ވިދާޅުވިއެވެ.

ހަމައެއާއެކު ޝަމީމް ވިދާޅުވީ ގާނޫނެއް ފާސްކުރާ ދުވަހުން މި އެންމެން އެޕުތައް ފޮހެލާނެ ކަމަށް ގަބޫލުކުރުމަކީ ހަގީގަތާ ދުރު ކަމެއް ކަމަށެވެ. އެހެންކަމުން ޖުވާކުޅުން ހުއްޓުވުމަށް ޝަމީމް ހުށަހަޅުއްވާ އެންމެ މުހިންމު ހައްލަކީ އެކަން ކުރުމަށް އޮތް މަގުތައް ހަނިކޮށް ފްރިކްޝަން ބޮޑުކުރުމެވެ.

މިގޮތުން، ބޭންކުތައް މެދުވެރިކޮށް އޮންލައިން ބެޓިން ސައިޓުތަކަށް ފައިސާ ނުފޮނުވޭ ގޮތަށް އެމްއެމްއޭ މެދުވެރިކޮށް ހެދުމާއި، އޮންލައިން ބެޓިން ސައިޓުތަކާއި އެޕްތައް ރާއްޖޭގައި ބްލޮކްކުރުމަށް ޝަމީމް ހުށައަޅުއްވާފައިވެއެވެ.

މީގެ ކުރިން މާފުށީ ޖަލުގައި ފޯނު ބޭނުންކޮށްގެން ހިންގާ ސްކޭމްތައް ހުއްޓުވުމަށް ކުރެވުނު މަސައްކަތްތަކުގެ ތަޖުރިބާ ހިއްސާކުރައްވަމުން ޝަމީމް ވިދާޅުވީ، ކޮރަޕްޝަނާއި ވިޔަފާރީގެ ފައިދާއަށް ބަލައި ބައެއް ފިޔަވަޅުތައް އެޅުމަށް ސަރުކާރުތަކުން ފަސްޖެހޭ ކަމަށެވެ.

ޝަމީމްގެ ލިޔުން ނިންމާލަމުން ވިދާޅުވީ، މަސްތުވާތަކެއްޗާއި ދުންފަތުގެ އިސްތިއުމާލު ކުރުން މަނާކުރަން ކުރި މަސައްކަތުން ފެނުނު ފަދައިން، ހަމައެކަނި ގާނޫނަކުން މީހުންގެ ސުލޫކު ބަދަލެއް ނުކުރެވޭނެ ކަމަށެވެ. އެހެންކަމުން، ރައީސް ޑރ. މުޙައްމަދު މުޢިއްޒުގެ ސަރުކާރުން ޖުވާ ކުޅުމަށް އިޖުތިމާއީ އަދި އިގްތިސާދީ ހައްލުތަކެއް ގެނައުމަށް އޭނާ ވަނީ ގޮވާލައްވާފައެވެ.