މިރޭ ބޭއްވި ހަރުގެ ޖަލްސާގައި ވާހަކަދައްކަވަމުން، އެމްޑީޕީގެ ޤައުމީ މަޖިލީހުގެ މެންބަރު އަދި މާލެ ސިޓީގެ ހުޅުމާލެ އުތުރު ދާއިރާގެ ކައުންސިލް ކެންޑިޑޭޓް ފާތިނަތު ޒާޔާ ވަނީ ސަރުކާރަށާއި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ވަރަށް ބޮޑަށް ފާޑުވިދާޅުވެފައެވެ. ޒާޔާ ވިދާޅުވީ ރައީސް މުޢިއްޒު ވެރިކަމާ ހަވާލުވިފަހުން ދިވެހި ރައްޔިތުންގެ ދިރިއުޅުމުގެ ޙާލަތު އިންތިހާއަށް ދަށަށް ގޮސްފައިވާ ކަމަށެވެ.

އެގޮތުން، ކަރަންޓާއި ފެން ބިލުތައް ދެއްކުމަށްފަހު އަސާސީ ބޭނުންތައް ފުއްދައި، އުނުއޮރިޔާން ނިވާކުރެވޭނެ މިންވަރު ވެސް މިއަދު ރައްޔިތުންގެ އަތުގައި ނެތް ކަމަށް އޭނާ ފާހަގަކުރެއްވިއެވެ. މީގެ އިތުރުން، ތަކެތީގެ އަގު ބޮޑުވުމުގެ ސަބަބުން ދަރިފުޅު ބޯ ކިރުދަޅު ގަނެފައި ބަނޑުފުރާ މުއްތިކުރެވޭނެ ގޮތެއް ނެތް ކަމަށާއި، ގޭގެ ކުލި ދެއްކުމަށްފަހު އާދައިގެ ދިރިއުޅުމެއް އުޅެވޭނެ ފަދައެއް ވެސް މިއަދު ނެތް ކަމަށް ވިދާޅުވެ ޒާޔާ ކަންބޮޑުވުން ފާޅުކުރެއްވިއެވެ.

ސަރުކާރުގެ ސިޔާސަތުތަކަށް ފާޑުވިދާޅުވަމުން ޒާޔާ އިތުރަށް ވިދާޅުވީ، އަންހެންކުދިންގެ ހެދުން އެޅުމުގެ މިންގަނޑުތަކަށް އިރުޝާދު ދޭން އުޅޭއިރު، ސަރުކާރުން ކުރަމުންދާ މައިގަނޑު މަސައްކަތަކީ ވައްކަން ކުރުން ކަމަށެވެ. އަދި މި ސަރުކާރު އައިފަހުން ދައުލަތުގެ ބަޖެޓުން 110 ބިލިޔަން ރުފިޔާ ހުސްކޮށްލާފައިވާ އިރު، އޭގެން ރައްޔިތަކަށް ވީ އެއްވެސް ފައިދާއެއް ނެތް ކަމަށް އޭނާ ތުހުމަތު ކުރެއްވިއެވެ.

ޒާޔާ ސިފަކުރެއްވި ގޮތުގައި ރައީސް މުޢިއްޒަކީ ވައްކަމާއި ފަސާދަ ނައްތާލައި، މޫނަކަށް ކަނދުރާއަކަށް ބެލުމެއްނެތި ހެޔޮވެރިކަމެއް ކޮށްދޭނެ ކަމަށް ވިދާޅުވެ، ބޮޑު "ވައުދު ފޮތެއް" ކިހިއްޔަށް ޖައްސަވައިގެން ވެރިކަމަށް ވަޑައިގެންނެވި ބޭފުޅެކެވެ. ނަމަވެސް މިއަދު ފެންނަނީ ރައީސާއި އެމަނިކުފާނުގެ އަރިހުގައި ތިއްބެވި ބޭފުޅުން "ސަޅިބައިސާ" ކަނޑަމުން، ވައްކަމުގެ އަމަލުތައް ހިންގަމުންދާ މަންޒަރު ކަމަށް ވިދާޅުވެ ޒާޔާ ވަނީ ބަހުގެ ހަމަލާތައް އަމާޒުކުރައްވާފައެވެ.