އިންސާނާގެ ދުޅަހެޔޮކަން ބިނާވެފައިވަނީ އޭނާގެ ކެއިންބުއިމުގައި ގެންގުޅޭ އަދަކާދައިގެ މައްޗަށެވެ. ދުޅަހެޔޮކަންމަތީ ތިމާ ދެމިހުރުމަށް އެދޭނަމަ އަބަދުވެސް ކެއިން ބިއުމުގައި ސަމާލުކަން ދޭންވާނެއެވެ. އަދި ކާބޯތަކެތިން ލިބޭ ފައިދާ ތިމާގެ ހަށިގަނޑަށް އޭގެ އެންމެ ފުރިހަމައަށް ލިބޭނީ އެ ކާއެއްޗެއް ރަނގަޅަށް ހަޖަމުވެގެންނެވެ. ނަމަވެސް އަޅުގަނޑުމެންގެ ތެރެއިން ބައެއްމީހުންނަށް މިހާރަކައައިސް ދިމާވަމުން އަންނަ ކާތަކެތި ހަޖަމު ނުކުރެވުމުގެ މައްސަލައަކީ ވަރަށް ބޮޑު އާއްމުވެފައިވާ ކަމެކެވެ. ނަމަވެސް ހަޖަމުކުރުމުގެ ނިޒާމަށް ދިމާވާ މިފަދަ މައްސަލަތަކަކީ ދިރިއުޅުމުގެ އާދަކާދަތަކަށް ގެނެވޭ ކުދިކުދި ބަދަލުތަކުން ހައްލު ކުރެވިދާނެ ކަންކަމެވެ. ތިރީގައި މިވަނީ ގުދުރަތީ ގޮތުން ކާބޯތަކެތި ފަސޭހައިން ހަޖަމުކުރުމަށް އެހީތެރިވެދޭނެ މުހިންމު ބައެއް ގޮތްތަކެވެ.

ކާބޯތަކެތި ރަނގަޅަށް ހަފާލައިގެން ކެއުމަކީ ހަޖަމުކުރުމުގެ ނިޒާމަށް ލިބޭ އެންމެ ބޮޑު ލުޔެވެ. ހަޖަމުކުރުމުގެ މަރުހަލާ ފެށެނީ އަނގައިގެ ތެރެއިންނެވެ. ކާބޯތަކެތި ރަނގަޅަށް ހަފާލުމުން، އަނގައިގައި ހުންނަ ކުޅާއި އެކުވެ، ގޮހޮރަށް ދާއިރު އެތަކެތި ހުންނާނީ ފަސޭހައިން ހަޖަމުވާނެ ފަދަ މަޑު ހާލަތެއްގައެވެ. އަވަސްއަރުވާލައިގެން ކެއުމަކީ ހަޖަމުކުރާ ނިޒާމަށް ބާރުބޮޑުވެ، ބަނޑު ފުއްޕުމާއި ގޭސްވުން ފަދަ މައްސަލަތައް ދިމާވާ ކަމެކެވެ.

ފެން ބުއިމަކީ ހަޖަމުކުރުމަށް ކޮންމެހެން ބޭނުންތެރި ކަމެކެވެ. ހަށިގަނޑަށް ބޭނުންވާ މިންވަރަށް ފެން ލިބުމުން، ކާބޯތަކެތި މަޑުވެ، ގޮހޮރުގެ ތެރޭގައި ފަސޭހައިން ދައުރުވުމަށް މަގުފަހިވެއެވެ. ހާއްސަކޮށް ފައިބަރު ގިނަ ކާނާ ބޭނުންކުރާއިރު ގިނައިން ފެން ބުއިމަކީ ބަނޑުހަރުވުމުން ސަލާމަތްވުމަށް އެހީތެރިވެދޭނެ ކަމެކެވެ. ނަމަވެސް ކެއުމުގެ މެދުތެރެއިން މާ ގިނައިން ފެން ބުއިމުގެ ބަދަލުގައި، ކެއުމުގެ ކުރިން ނުވަތަ ކެއުމަށްފަހު ފެން ބުއިމަކީ އެންމެ ރަނގަޅު ގޮތެވެ.

ކާބޯތަކެތީގެ ތެރޭގައި ފައިބަރު އެކުލެވޭ ބާވަތްތައް ހިމެނުމަކީވެސް ގޮހޮރުގެ މަސައްކަތްތައް ތަރުތީބުކޮށްދޭ ކަމެކެވެ. މޭވާއާއި، ތަރުކާރީގެ އިތުރުން މުގާއި އެކި ބާވަތްތަކުގެ ގޮވާމަކީ ފައިބަރުން މުއްސަނދި ތަކެއްޗެވެ. އެހެންކަމުން މިއީ ހަޖަމުކުރުމުގެ ނިޒާމު ސާފުކޮށްދީ ބޮޑުކަމުދިއުމަށް ފަސޭހަކޮށްދޭ ތަކެއްޗެވެ. މީގެ އިތުރުން، ޕްރޮބަޔޮޓިކްސް ނުވަތަ ފައިދާހުރި ބެކްޓީރިއާ އެކުލެވޭ ކާނާ ބޭނުންކުރުމުން ގޮހޮރުގެ ސިއްހަތު ރަނގަޅުވެއެވެ.

މީގެ އިތުރުން ކެއުމަށްފަހު ކުޑަކޮށް ހިނގާލުމަކީ ހަޖަމުކުރުމުގެ ދުވެލި އަވަސްކޮށްދޭ ކަމެކެވެ. ހަށިގަނޑު ހަރަކާތްތެރިވުމުން ގޮހޮރުގެ މަސްތަކަށް ބާރު ލިބި، ކާނާ ދައުރުވުން އަވަސްވެއެވެ. ނަމަވެސް ކެއުމަށްފަހު ވަގުތުން ބުރަހެލި ކަސްރަތު ކުރުމަކީ ރަނގަޅު ކަމެއް ނޫނެވެ. އޭގެ ބަދަލުގައި ލަސްލަހުން 10 ނުވަތަ 15 މިނެޓު ހިނގާލުމުން ހަޖަމުކުރުމަށް ބޮޑު އެހީއަކަށް ވާނެއެވެ.