އީރާނުގައި ކުރިއަށްދާ މުޒާހަރާތަކާ ގުޅިގެން އެގައުމުގެ ސަރުކާރުން ރައްޔިތުންނަށް ދެމުންދާ އަނިޔާތަކަށް ހުރަސް އެޅުމުގެ ގޮތުން އެމެރިކާގެ ރައީސް ޑޮނަލްޑް ޓްރަމްޕް އަސްކަރީ ފިޔަވަޅު އަޅުއްވާނެ ކަމުގެ އިންޒާރު ދެއްވާފައި ވަނިކޮށް، އީރާނަށް ތާއީދުކުރާ ހަތިޔާރު އެޅި ޖަމާއަތްތަކުން އެމެރިކާއަށް ވަރުގަދަ އިންޒާރުތަކެއް ދީފިއެވެ.

މި އިންޒާރުތައް އައިސްފައިވަނީ އެމެރިކާގެ މަތިންދާބޯޓު އުފުލާ މަނަވަރު، ޔޫ.އެސް.އެސް އަބްރަހަމް ލިންކަން މެދުއިރުމައްޗަށް ފޯރިކަން އެމެރިކާގެ އަސްކަރިއްޔާއިން ކަށަވަރުކޮށްދީފައިވާ ދަނޑިވަޅެއްގައެވެ.

ޔަމަނުގެ ހޫތީންނާއި އިރާގުގެ ކަތާއިބް ހިޒްބުالله ޖަމާއަތުން ވަނީ އީރާނަށް އަމާޒުކޮށް އެމެރިކާއިން އެއްވެސް ހަމަލާއެއް ދީފިނަމަ، މުޅި ސަރަހައްދުގައި "ފުޅާ ހަނގުރާމައެއް" ފެށިގެންދާނެ ކަމަށް ބުނެފައެވެ. ހޫތީން ވަނީ ރަތްކަނޑުން ދަތުރުކުރާ އާގުބޯޓުފަހަރަށް އަލުން ހަމަލާދޭން ފަށާނެ ކަމުގެ އިޝާރާތެއް ދީފައެވެ. އަދި ކަތާއިބް ހިޒްބުالله އިން ބުނެފައިވަނީ އީރާނަށް ދޭ ކޮންމެ ހަމަލާއަކީ މުޅި އިސްލާމީ އުންމަތަށް ދޭ ހަމަލާއެއް ކަމަށާއި، އެމެރިކާގެ މަރުކަޒުތަކަށް އަމާޒުކޮށް ހަމަލާތައް ފޮނުވާލާނެ ކަމަށެވެ.

ރައީސް ޓްރަމްޕް ވަނީ އީރާނުގެ ސަރުކާރުން މުޒާހަރާގެ ބައިވެރިން މެރުމާއި، ހައްޔަރުކޮށްފައިވާ މީހުން ގަނޑުކޮށް މެރުމަކީ އެމެރިކާއިން ބަލައިގަންނާނެ ކަމެއް ނޫން ކަމަށް ވިދާޅުވެފައެވެ. މަނަވަރުތައް އެ ސަރަހައްދަށް ފޮނުވީ "ކޮންމެފަދަ ހާލަތަކަށްވެސް ތައްޔާރުވުމަށް" ކަމަށް ޓްރަމްޕް ވަނީ ވިދާޅުވެފައެވެ. ނަމަވެސް އީރާނުގެ އަސްކަރީ އިސް އޮފިޝަލުން މި އިންޒާރުތަކަށް ރައްދު ދެއްވަމުން ވިދާޅުވީ، އެމެރިކާގެ މަނަވަރުތަކަކީ އީރާނަށް އޮތް ބިރެއް ނޫން ކަމަށާއި، އެއީ ފަސޭހައިން އަމާޒުކުރެވޭނެ "ޓާގެޓެއް" ކަމަށެވެ.

މިދިޔަ ޖޫން މަހު އިޒްރޭލުން އީރާނުގެ ނިއުކްލިއާ މަރުކަޒުތަކަށް ދިން 12 ދުވަހުގެ ހަމަލާތަކުގައި، އީރާނަށް ތާއީދުކުރާ މި ޖަމާއަތްތަކުން ސީދާ ގޮތެއްގައި ބައިވެރިވެފައެއް ނުވެއެވެ.

ނަމަވެސް މިފަހަރުގެ ބަޔާންތަކުން ދޭހަވަނީ، އީރާނުގެ ދިފާއުގައި ނިކުތުމަށް މި ޖަމާއަތްތަކުން މިހާރު ތައްޔާރުވަމުންދާ ކަމެވެ. ލުބުނާނުގެ ހިޒްބުالله ޖަމާއަތުގެ ލީޑަރު ޝައިޚް ނައީމް ގާސިމް ވިދާޅުވީ، އެ ޖަމާއަތުން އަމަލުކުރާނެ ގޮތެއް ނިންމާނީ ހަނގުރާމައިގެ މައިދާނުގެ ހާލަތަށް ބަލާފައި ކަމަށެވެ.