ކުރިއަށް އޮތް ލޯކަލް ކައުންސިލް އިންތިޚާބަށް ކުރިމަތިލުމަށް އިލެކްޝަންސް ކޮމިޝަނުން ދީފައިވާ މުއްދަތު ކުރުވުމުގެ ސަބަބުން، އިންތިޚާބުގައި ވާދަކުރަން ބޭނުންވާ ފަރާތްތަކަށް ބޮޑެތި ގޮންޖެހުންތަކެއް ކުރިމަތިވަމުންދާ ކަމަށް ބުނެ އިދިކޮޅު އެމްޑީޕީން ކަންބޮޑުވުން ފާޅުކޮށްފިއެވެ.

އެމްޑީޕީން މީސްމީޑިއާގައި ޙިއްސާކުރި ކުރު ބަޔާނެއްގައި ބުނެފައިވަނީ، ކައުންސިލް އިންތިޚާބަށް ކުރިމަތިލުމަށް އެދި ފޯމު ހުށަހެޅުމަށް އިލެކްޝަންސް ކޮމިޝަނުން ކަނޑައަޅާފައިވާ މުއްދަތަކީ ނުހަނު ކުރު މުއްދަތެއް ކަމަށެވެ. އަދި މިކަމުގެ ސަބަބުން އިންތިޚާބަށް ކުރިމަތިލާން ގަސްތުކުރާ ގިނަ ފަރާތްތަކަކަށް ފޯމު ހުށަހެޅުމުގައި ބޮޑެތި ދަތިތަކަކާ ކުރިމަތިވަމުންދާކަން އެ ޕާޓީން ވަނީ ފާހަގަކޮށްފައެވެ.

އޭގެއިތުރުން އެމްޑީޕީގެ ބަޔާނުގައި ބުނެފައިވަނީ، އިންތިޚާބަށް ކުރިމަތިލުމަށް ބޭނުންވާ ލިޔެކިޔުންތައް ތައްޔާރު ކުރުމާއި، ދައުލަތުގެ އެކި އިދާރާތަކުން ކުށުގެ ރިކޯޑު ސާފުކުރުމަކީ ގިނަ ވަގުތުތަކެއް ހޭދަވާ ކަމެއް ކަމަށެވެ. އަދި މިއީ އާންމުކޮށް ގިނަ ދުވަސްތަކެއް ނަގާ އިދާރީ މަސައްކަތްތަކަކަށް ވާތީ، މިހާރު ދީފައިވާ މުއްދަތަކީ އެކަށީގެންވާ މުއްދަތެއް ނޫން ކަމަށް އެ ޕާޓީން ބުނެފައިވެއެވެ.

ހަމައެއާއެކު މި މުއްދަތު ކުރުވުމުގެ ސަބަބުން، އިންތިޚާބުގައި ވާދަކުރަން ބޭނުންވާ އެތައް ބަޔަކަށް އެ ފުރުސަތު ގެއްލިދާނެ ކަމުގެ ބިރު އެބައޮތް ކަމަށް އެމްޑީޕީން ވަނީ ފާހަގަކޮށްފައެވެ. މިއީ ޑިމޮކްރެޓިކް ނިޒާމެއްގައި ރައްޔިތުންނަށް ލިބިދޭ އިންތިޚާބުތަކުގައި ވާދަކުރުމުގެ ހައްގަށް ހުރަސް އެޅިދާނެ ކަމެއް ކަމަށްވެސް އެ ޕާޓީގެ ބަޔާނުގައިވެއެވެ.

އެހެންކަމުން، މި މައްސަލައަށް އަވަސް ހައްލެއް ހޯދައިދީ، އިންތިޚާބަށް ކުރިމަތިލުމަށް އެދި ފޯމު ހުށަހެޅުމުގެ މުއްދަތު އިތުރުކޮށްދިނުމަށް އިލެކްޝަންސް ކޮމިޝަނަށް އެމްޑީޕީން ވަނީ ގޮވާލާފައެވެ.

އިލެކްޝަންސް ކޮމިޝަނުން ކައުންސިލް އިންތިޚާބަށް ކުރިމަތިލުމުގެ ފުރުސަތު ހުޅުވާލީ މި ޖެނުއަރީމަހުގެ 17 ވަނަ ދުވަހުން ފެށިގެން އަންނަ ފެބްރުއަރީ މަހުގެ އެއްވަނަ ދުވަހުގެ 3:30ގެ ނިޔަލަށެވެ.

އެމްޑީޕީން މީގެކުރިން ބުނެފައިވަނީ، ކައުންސިލް އިންތިޚާބަށް އެމްޑީޕީގެ ކެމްޕެއިން ލޯންޗުކުރުމުގެ ޖަލްސާ އަންނަ މަހު 12 ގައި ބާއްވަން މަސައްކަތް ކުރަމުންދާ ކަމަށެވެ.