ސޯޝަލް މީޑިއާ މެދުވެރިކޮށް ފުލުހުންނަށް އިންޒާރު ދިން ކަމަށް ބުނާ މައްސަލައެއްގެ ތަހުގީގަށް ބަޔާން ނެގުމަށްޓަކައި، އިދިކޮޅު އެމްޑީޕީގެ ގައުމީ މަޖިލީހުގެ މެމްބަރު ފާތުމަތު ޒަހިއްޔާ (ޒާޔާ) މާދަމާ ފުލުހަށް ހާޒިރުވާން މިއަދު އަންގައިފިއެވެ.

ފުލުހުން ޒާޔާއަށް ފޮނުވި ޗިޓުގައި ބުނެފައިވަނީ، "ޒާޔާ ފާތިމަތު"ގެ ނަމުގައި ހިންގާ ފޭސްބުކް އެކައުންޓަކުން މިދިޔަ އަހަރުގެ އޮކްޓޯބަރު މަހުގެ ކުރީކޮޅު ފުލުހުންނަށް އިންޒާރު ދީފައިވާ ކަމަށް ތުހުމަތު ކުރެވޭތީ، އެކަމާ ގުޅޭގޮތުން ސުވާލުކޮށް ބަޔާން ނަގަން ބޭނުންވާ ކަމަށެވެ. އެގޮތުން، މާދަމާ މެންދުރުފަހު 2:00 އަށް ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގަށް ހާޒިރުވުމަށް އޭނާއަށް ވަނީ އަމުރުކޮށްފައެވެ.

މި މައްސަލައަކީ މިދިޔަ އަހަރުގެ އޮކްޓޯބަރު މަހުގެ 17 ވަނަ ދުވަހު އެމްޑީޕީން މާލޭގައި ބޭއްވި ބޮޑު މުޒާހަރާއާ ދިމާކޮށް، "ކަނޑޫދޫ މިރުހުން ސްޕްރޭ ތައްޔާރުކުރަން ފަށައިފިން" ކަމަށް ބުނެ ފޭސްބުކްގައި ކުރި ޕޯސްޓަކާ ގުޅިގެން ބަލަމުންދާ މައްސަލައެކެވެ. މި މައްސަލައިގެ ތަހުގީގަށް މީގެ ކުރިން ވެސް ޒާޔާ ފުލުހަށް ހާޒިރުކޮށް ސުވާލުކޮށްފައިވާ އިރު، އޭނާގެ ފޯނު ވެސް ހަފުތާއެއްގެ މުއްދަތަށް ފުލުހުންގެ ބެލުމުގެ ދަށަށް ގެންގޮސްފައިވެއެވެ.

ޒާޔާ މިވަގުތު ތައްޔާރުވަމުން ދަނީ ކުރިއަށް އޮތް ލޯކަލް ކައުންސިލް އިންތިހާބުގައި ހުޅުމާލެ އުތުރު ދާއިރާގެ ކައުންސިލަރު ކަމަށް އެމްޑީޕީގެ ޓިކެޓުގައި ވާދަކުރުމަށެވެ.