އަވަށްޓެރި އިންޑިއާގެ ވެސްޓް ބެންގާލްއިން ނިޕާ ވައިރަހުގެ ކޭސްތަކެއް ފެނުމާ ގުޅިގެން، އެ ސަރަހައްދަށް ދަތުރުކުރާ ދިވެހީން ސަމާލުވުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފިއެވެ.

އެޗްޕީއޭއިން ހާމަކުރި ގޮތުގައި، މި މަހުގެ ތެރޭގައި ވެސްޓް ބެންގާލްއިން ތިން މީހަކު މި ބައްޔަށް ޕޮޒިޓިވްވެފައިވާ އިރު، އެ މީހުންނާ ބައްދަލުވި 180 އަށް ވުރެ ގިނަ މީހުން މިހާރު ވަނީ ކަރަންޓީނުކޮށްފައެވެ. ނަމަވެސް، މިހާތަނަށް ރާއްޖެއިން މި ބަލީގެ އެއްވެސް ކޭސްއެއް ނުވަތަ ބައްޔަށް ޝައްކުކުރެވޭ މީހަކު ފެނިފައިނުވާތީ، ރާއްޖެއަށް އޮތް ނުރައްކާ ކުޑަކަމަށް އެ އިދާރާއިން ފާހަގަކުރެއެވެ.

ނިޕާ ވައިރަހަކީ މައިގަނޑު ގޮތެއްގައި ވާލާއި އޫރުގެ ފަރާތުން އިންސާނުންނަށް ފެތުރޭ ނުރައްކާތެރި ބައްޔެކެވެ. މި ބަލި ފެތުރެނީ ވާ ކައިފައި ހުންނަ މޭވާ ނުވަތަ ވާލުގެ ކުޅާއި ކުޑަކަމުދާ އެއްޗެހި ޖެހިފައިވާ ތަކެތި ބޭނުންކުރުމުންނެވެ.

މީގެ އިތުރުން، ބަލި ޖެހިފައިވާ މީހެއްގެ ފަރާތުން އެހެން މީހުންގެ ގަޔަށް ވެސް މި ވައިރަސް ފެތުރުމުގެ ފުރުސަތު އޮވެއެވެ. ބަލީގެ އާންމު އަލާމާތްތަކުގެ ތެރޭގައި ހުން އައުން، ބޮލުގައި ރިއްސުން، ކެއްސުން އަދި ނޭވާލާން އުނދަގޫވުން ހިމެނޭއިރު، ބަލި ބޮޑުވާ ހާލަތްތަކުގައި ސިކުނޑިއަށް އަސަރުކޮށް، ފިޓުޖެހުން ފަދަ ނުރައްކާތެރި ކަންކަން މެދުވެރިވެއެވެ.

މި ބައްޔަށް ވަކި ޚާއްޞަ ފަރުވާއެއް ނެތް ނަމަވެސް، ބަލީގެ އަލާމާތްތަކަށް ސިއްހީ މާހިރުން ފަރުވާ ދެމުންދެއެވެ. އިންޑިއާގެ އިތުރުން ތައިލެންޑް، ނޭޕާލް އަދި ޓައިވާން ފަދަ ގައުމުތަކުން މިހާރު ވަނީ އެއާޕޯޓުތަކުގައި ސްކްރީން ކުރުމުގެ ހަރުކަށި ފިޔަވަޅުތަކެއް އަޅަން ފަށާފައެވެ.

އެޗްޕީއޭއިން ބުނީ ރާއްޖޭގެ ހާލަތުވެސް ވަރަށް ގާތުން މޮނިޓާ ކުރަމުންދާ ކަމަށާއި، ބަލި ފެނިފައިވާ ސަރަހައްދުތަކަށް ދަތުރުކުރާ ދިވެހިން އާންމު ސިއްހަތުގެ ރައްކާތެރިކަމަށް ސަމާލުވުމަކީ މުހިންމު ކަމެއް ކަމަށެވެ.