ކުރިއަށް އޮތް ކައުންސިލް އިންތިޚާބަށް ކުރިމަތިލާ ކެންޑިޑޭޓުންގެ ކުށުގެ ރިކޯޑު ސާފުކުރުމަށް މުއައްސަސާތައް ތައްޔާރު ނޫން ކަމަށާއި، އިތުރު 10 ދުވަސް ބޭނުންވާ ކަމަށް އެމްޑީޕީގެ ކެމްޕޭން ތަރުޖަމާނު ޢަބްދުالله ވަޙީދު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި އެމްޑީޕީ ކެމްޕޭންގެ ތަރުޖަމާނު އަބްދުﷲ ވަހީދު ވިދާޅުވީ، މޯލްޑިވްސް ކަރެކްޝަނަލް ސާވިސް އާއި ޖުޑީޝަލް ސާވިސްގެ ފަރާތުން ރިކޯޑު ސާފުކުރުމަށް 3 ދުވަހާއި 5 ދުވަހާ ދެމެދުގެ މުއްދަތެއް ނަގަމުންދާ ކަމަށެވެ. މިއީ އިންތިޚާބަށް ވާންޖެހޭ ތައްޔާރީތައް އެ މުއައްސަސާތަކުން ވެފައި ނެތްކަމުގެ ހެކިތަކެއް ކަމަށް އޭނާ ސިފަކުރެއްވިއެވެ.

ވަހީދު ވިދާޅުވީ، އިންތިޚާބަށް ފޯމު ހުށަހެޅުމަށް ގާނޫނީ ގޮތުން ލިބޭ 16 ދުވަހުގެ މުއްދަތުގެ ބޮޑުބައެއް ރިކޯޑު ސާފުކުރުމަށް ހޭދަވުމަކީ ކެންޑިޑޭޓުންނަށް ކުރިމަތިވާ ބޮޑު ގޮންޖެހުމެއް ކަމަށެވެ.

އަދި އިލެކްޝަންސް ކޮމިޝަނަށް "އީފާސް" މެދުވެރިކޮށް ފޯމު ހުށަހަޅާއިރު ދިމާވާ ކުދިކުދި މައްސަލަތަކުގެ ސަބަބުން ފޯމުތައް ރިޖެކްޓްވަމުންދާ ކަމަށާއި، މިކަމުގެ ސަބަބުން ކެންޑިޑޭޓުންނަށް ވަގުތު ކުޑަތަންވެ، އިތުރު ތާށިކަން ކުރިމަތިވަމުންދާ ކަމަށްވެސް އޭނާ ވިދާޅުވިއެވެ.

"އެހެންވީމާ، އަޅުގަނޑުމެން ވަރަށް އިޚްލާސްތެރި ކަމާއެކު އިލެކްޝަނަށް ދަންނަވަން އޮތީ، އިންތިހާބަށް ކުރިމަތިލުމަށްޓަކައި، އިލެކްޝަންގެ ފަރާތުން އިތުރު 10 ދުވަހުގެ މުއްދަތެއް ދިނުމަށް. އެހެން ނޫނިއްޔާ އަޅުގަނޑުމެންނަށް ޖެހޭނީ އަޅުގަނޑުމެންގެ ހުރި އެހެން ވަސީލަތްތައް ބޭނުންކޮށްގެން އެ ހައްގު ހޯދަން މަސައްކަތް ކުރަން." ވައްޑޭ ވިދާޅުވިއެވެ.

ލޯކަލް ކައުންސިލް އިންތިޚާބަށް ކުރިމަތިލުމުގެ ފުރުސަތު އީސީން ހުޅުވާލާފައިވަނީ މި މަހުގެ 17 ވަނަ ދުވަހުއެވެ. ފޯމު ހުށަހެޅުމުގެ އެންމެ ފަހު ވަގުތަކީ އަންނަ މަހުގެ 1 ވާ ބުދަ ދުވަހުގެ މެންދުރުފަހު 3:30 އެވެ.