ކާބޯތަކެތީގެ ހިދުމަތް ފޯރުކޮށްދޭ ތަންތަނުން ނަގަމުން އަންނަ ފީތައް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ކުޑަކޮށްފިއެވެ.

އެމްއެފްޑީއޭއިން ބުނީ ކާބޯތަކެތީގެ ހިދުމަތްދޭ ތަންތަނަށް ހުއްދަ ދޫކުރުމަށް އަމަލުކުރަމުންގެންދާ ޤަވާއިދުގެ ދަށުން ކާބޯތަކެތީގެ ހިދުމަތްދޭ ތަންތަން ރަޖިސްޓްރީކުރުމުގައި އެ އިދާރާއިން ނަގަމުންގެންދާ ރަޖިސްޓްރޭޝަން ފީ އާއި ކެޓަގަރީ ފީ ދެ އަހަރު ދުވަހުގެ މުއްދަތަށް ކުޑަކުރުމަށް ނިންމާފައިވާކަމަށެވެ. 

ފީތައް ކުޑަކޮށްފައިވަނީ، ހިދުމަތްދޭ ތަންތަނުގެ ރަޖިސްޓްރޭޝަން ފީ އާއި ކެޓަގަރީ ފީގެ 50 އިންސައްތައެވެ.

ވިޔަފާރީގެ އުސޫލުން ކާބޯތަކެތީގެ ހިދުމަތްދޭ ތަންތަނުގެ ރަޖިސްޓްރޭޝަން ފީއެއްގެ ގޮތުގައި މިހާތަނަށް ނަގަމުން އައިސްފައިވަނީ، 500 ރުފިޔާއެވެ. ނަމަވެސް އެމްއެފްޑީއޭ އިން ގެނައި މި ބަދަލާއެކު، ދެން ރަޖިސްޓްރޭޝަން ފީގެ ގޮތުގައި ދައްކަން ޖެހޭނީ 250 ރުފިޔާ އެވެ. މިއީ އެއްފަހަރު ދައްކަންޖެހޭ ފީއެކެވެ.

މީގެ އިތުރުން، އަހަރީ ފީގެ ގޮތުގައި 2،000 ރުފިޔާއިންއިން ފެށިގެން އެކި އަގުތައް އެކި ކެޓަގަރީތަކުގެ ތަންތަނުން ނަގައެވެ. މިއަދުން ފެށިގެން ދެން ދައްކަންޖެހޭނީ މި އަގުތަކުގެ ދެބައިކުޅަ އެއްބައެވެ.