ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބާ ދިމާކޮށް ނ. ވެލިދޫ ދާއިރާގެ ރަށްތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި ވައުދުތަކުގެ އަމަލީ މަސައްކަތް ނުފެށޭތީ، އެ ދާއިރާގެ މެންބަރު މުހައްމަދު އައްބާސް ސަރުކާރަށް ފާޑުވިދާޅުވެއްޖެއެވެ.

ވެލިދޫ ދާއިރާގެ އެމްޑީއޭގެ މެންބަރު މުހައްމަދު އައްބާސް "އެކްސް" ގައި ކުރެއްވި ޕޯސްޓެއްގައި ވިދާޅުވީ، ނ. ވެލިދޫ، ނ. ޅޮހި އަދި ނ. ފޮއްދޫގެ ރައްޔިތުންނަށް ރައީސް މުއިއްޒު ވެވަޑައިގެންނެވި ވަޢުދާގުޅޭ އެއްވެސް ޕްރޮޖެކްޓެއްގެ މަސައްކަތެއް ފެށިގެން ކުރިއަށްދާ މަންޒަރު އަދި ފެންނަން ނެތް ކަމަށެވެ. ނަމަވެސް، ކުރިއަށް އޮތް ލޯކަލް ކައުންސިލް އިންތިހާބާ ގުޅިގެން މާތްﷲގެ ވާގިފުޅާއެކު އެ ރަށްތަކަށް ކަންތައްތަކެއް ވާނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.

އައްބާސް އިތުރަށް ވިދާޅުވީ، ވައުދުތައް ނުފުއްދޭ ނަމަ ދާއިރާގެ ރައްޔިތުންގެ ކުޑަވެސް ރުހުމެއް ސަރުކާރަށް ނުލިބޭނެކަން ޔަގީންވާ ކަމަށެވެ. އަދި ރައްޔިތުންނަށް އަބަދު ދޮގާއި މަކަރު ނުހެދޭނެ ކަމަށާއި، ވެލިދޫ، ޅޮހި އަދި ފޮއްދޫގެ ރައްޔިތުންނަކީ "ގަމާރުން" ނޫންކަން މިހާރު ރައީސް މުއިއްޒަށް އެނގިވަޑައިގަންނަވާނެ ކަމަށްވެސް އޭނާ ވިދާޅުވިއެވެ.

"ރައްޔިތުން ބޭނުންވަނީ ތަރައްގީ،" އައްބާސްގެ ޕޯސްޓުގައި ބަޔާންކުރައްވާފައިވެއެވެ.

ވެލިދޫ ދާއިރާގެ ރަށްތަކުގެ ތަރައްގީގެ މަޝްރޫއުތަކާ ގުޅޭގޮތުން މެންބަރު އައްބާސް މިފަދަ ކަންބޮޑުވުމެއް ފާޅުކުރައްވާފައިވާއިރު ކުރިއަށް އޮތް ލޯކަލް ކައުންސިލް އިންތިހާބުގެ ކެމްޕެއިން ހަރަކާތްތައް ފެށިފައިވާ މި ދަނޑިވަޅުގައި، ސަރުކާރުގެ ފަރާތުން ގޯއްޗާއި ފްލެޓް ދޫކުރުމާއި ތަރައްގީގެ އެކިއެކި މަސައްކަތްތައް ކުރިއަށްގެންދާކަން ފާހަގަކުރެވެއެވެ.

މީގެއިތުރުން ނ. ވެލިދޫގައި ސީ އެމްބިއުލާންސްގެ ޚިދުމަތް ވެސް ސަރުކާރުން މިއަދު ވަނީ ފަށާފައެވެ.