އީރާނުން ނިއުކްލިއާ ހަތިޔާރު އުފެއްދުން ހުއްޓާލައި، މަޝްވަރާގެ މޭޒަށް އައުމަށް އެމެރިކާގެ ރައީސް ޑޮނަލްޑް ޓްރަމްޕް މިއަދު ގޮވާލައްވައިފިއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އީރާނުން އިންސާފުވެރި އެއްބަސްވުމަކަށް އައުމަށް މިއީ އެންމެ ފަހު ފުރުސަތު ކަމަށާއި، ވަގުތު ފާއިތުވަމުންދާ ކަމަށެވެ. އަދި މިދިޔަ ޖޫން މަހު އެމެރިކާއިން އީރާނަށް ދިން ހަމަލާއަށްވުރެ، ދެން ދޭ ހަމަލާއެއް މާ ވަރުގަދަވެފައި ނުރައްކާތެރިވާނެ ކަމުގެ އިންޒާރުވެސް ރައީސް ޓްރަމްޕް ވަނީ ދެއްވާފައެވެ.

މި އިންޒާރާ ގުޅިގެން އީރާނުން ވަނީ ޓްރަމްޕަށް ވަރުގަދަ ރައްދެއް ދީފައެވެ. އީރާނުގެ އެންމެ މަތީ ވެރިޔާ އާޔަތުﷲ އަލީ ޚާމަނާއީގެ މުޝީރު އަލީ ޝަމްޚާނީ ވިދާޅުވީ، އެމެރިކާއިން އެއްވެސް ކަހަލަ އަސްކަރީ ފިޔަވަޅެއް އަޅައިފިނަމަ، އޭގެ ރައްދުގައި އެމެރިކާގެ އިތުރުން އިޒްރޭލާއި އެ ގައުމުތަކަށް ވާގިވެރިވާ ފަރާތްތަކަށް އީރާނުން ހަމަލާދޭނެ ކަމަށެވެ.

އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، އީރާނުގެ ސިފައިން ތިބީ "ޓްރިގަރަށް އިނގިލި ޖައްސައިގެން" ކަމަށާއި، ކޮންމެ ވަގުތެއްގައިވެސް ހަމަލާއަކަށް ރައްދުދޭން ތައްޔާރަށް ތިބި ކަމަށެވެ. ނަމަވެސް، ބިރުދެއްކުމާއި މަޖުބޫރުކުރުމެއް ނެތް މާހައުލެއްގައި އިންސާފުވެރި ނިއުކްލިއާ އެއްބަސްވުމަކަށް އައުމަށް އީރާނުން އަބަދުވެސް މަރުހަބާ ކިޔާނެ ކަމަށް އޭނާ ވިދާޅުވިއެވެ.

މި ނުތަނަވަސްކަމުގެ ތެރޭގައި، އެމެރިކާގެ މަތިންދާބޯޓު އުފުލާ މަނަވަރު 'ޔޫ.އެސް.އެސް އަބްރަހަމް ލިންކަން' އާއި އެކު ބޮޑު އަސްކަރީ ފައުޖެއް މިހާރު ވަނީ މެދުއިރުމައްޗަށް ފޮނުވާފައެވެ. ޓްރަމްޕް މި ފައުޖު ސިފަކުރެއްވީ އީރާނާ ދިމާލަށް ދަތުރުކުރަމުންދާ "އަރުމާޑާ" އެއްގެ ގޮތުގައެވެ. މި ހަރަކާތްތައް ފެށިފައިވަނީ އީރާނުގައި ދާދިފަހުން ކުރިއަށްދިޔަ މުޒާހަރާތައް އެ ގައުމުގެ ސަރުކާރުން ހަރުކަށިކޮށް ހުއްޓުވުމާ ގުޅިގެން މަސްލަހަތު ގޯސްވެފައިވާ ދަނޑިވަޅެއްގައެވެ.

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވި ގޮތުގައި، އީރާނުގެ އިގްތިސާދު ވަނީ އިނދަޖެހިފައެވެ. އަދި އެ ގައުމުގެ ސަރުކާރު މިހާރު އޮތީ ކުރިއަށްވުރެ ބަލިކަށި ހާލަތެއްގައެވެ. މި ސަބަބާހުރެ އަލުން މުޒާހަރާތައް ފެށިދާނެ ކަމަށް އޭނާ ލަފާކުރެއްވިއެވެ. ނަމަވެސް އެމެރިކާގެ ޖާސޫސީ ރިޕޯޓުތަކުން ދައްކާ ގޮތުގައި، އިގްތިސާދީ ދަތިތައް ހުރި ނަމަވެސް، އީރާނުގެ ސަރުކާރުގެ އިސް ސަފުގައި ބައިބައިވުމެއް އަދި އުފެދިފައެއް ނުވެއެވެ.

ހަމައެއާއެކު، އީރާނުގެ ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އަކީ ޓެރަރިސްޓް ޖަމާއަތެއްގެ ގޮތުގައި ކަނޑައެޅުމަށް ޔޫރަޕްގެ އިއްތިހާދުން (އީ.ޔޫ) ދަނީ ތައްޔާރުވަމުންނެވެ. ފްރާންސުން މި ނިންމުމަށް ތާއީދުކޮށްފައިވާއިރު، އަންނަ ބުރާސްފަތި ދުވަހު ބްރަސަލްސްގައި ބާއްވާ އީ.ޔޫގެ ފޮރިން މިނިސްޓަރުންގެ ބައްދަލުވުމުގައި އީރާނާ ދެކޮޅަށް އާ ދަތިކުރުމުގެ ފިޔަވަޅުތަކެއް އެޅުމަށް ވަނީ ހަމަޖެހިފައެވެ.