މިދިޔަ އަހަރުގެ ޖޫން މަހު ހިނގި 12 ދުވަހުގެ ހަނގުރާމައިން ލިބުނު ފިލާވަޅުތަކާއެކު، އެމެރިކާއިން ދީފާނެ ކޮންމެ ހަމަލާއަކަށް ވަގުތުން އަދި ވަރުގަދަ ރައްދު ހަމަލާއެއް ދިނުމަށް ތައްޔާރަށް އޮތް ކަމަށް އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވެއްޖެއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި އަރަގްޗީ ވިދާޅުވީ އީރާނުގެ އަސްކަރިއްޔާ އޮތީ "ބަޑީގެ ޓްރިގަރަށް އިނގިލި ޖައްސައިގެން" ކަމަށާއި، ގައުމުގެ ބިމާއި، ވައިގެ ސަރަހައްދު ނުވަތަ ކަނޑުގެ ސަރަހައްދަށް ދެވޭ ކޮންމެ އުދުވާނީ ހަމަލާއަކަށް ފަސްޖެހުމެއް ނެތި ރައްދު ދޭނެ ކަމަށެވެ.

އީރާނުން މި އިންޒާރު ދީފައިވަނީ އެމެރިކާގެ ރައީސް ޑޮނަލްޑް ޓްރަމްޕް، އީރާނާ ދެކޮޅަށް އަސްކަރީ ފިޔަވަޅު އަޅުއްވާނެ ކަމުގެ އިންޒާރު އަނެއްކާވެސް ތަކުރާރު ކުރެއްވުމާ ގުޅިގެންނެވެ.

ޓްރަމްޕްގެ 'ޓްރުޫތު ސޯޝަލް' ޕްލެޓްފޯމުގައި ވިދާޅުވީ "ބިޔަ އަސްކަރީ ފްލީޓެއް" (އަމާޑާ) އީރާނާ ދިމާލަށް ދަތުރުކުރަމުންދާ ކަމަށާއި، ބޭނުންވެއްޖެ ހިނދެއްގައި ވަރަށް ބާރުގަދަ އަދި ނުރައްކާތެރި ހަމަލާތަކެއް ދިނުމުގެ ގާބިލުކަން އެ ފްލީޓަށް ލިބިގެންވާ ކަމަށެވެ.

އަދި އީރާނުން ނިއުކްލިއާ ހަތިޔާރު އުފެއްދުން ހުއްޓާލައި، އިންސާފުވެރި އެއްބަސްވުމަކަށް އައުމަށް މަޝްވަރާގެ މޭޒަށް ރުޖޫއަވުމަށް ޓްރަމްޕް ވަނީ ގޮވާލައްވާފައެވެ.

އީރާނުގެ ޚާރިޖީ ވަޒީރު އިތުރަށް ވިދާޅުވީ، 2025 ވަނަ އަހަރުގެ ޖޫން މަހު އިސްރާއީލުން އީރާނަށް ދިން ހަމަލާތަކާއި، އެ ދުވަސްވަރު ޓްރަމްޕްގެ ސަރުކާރުން އީރާނުގެ ނިއުކްލިއާ މަރުކަޒުތަކަށް ދިން ހަމަލާތަކުން އީރާނަށް ވަނީ މުހިންމު ތަޖުރިބާތަކެއް ލިބިފައި ކަމަށެވެ.

އެ ތަޖުރިބާގެ އަލީގައި، ކުރިއަށްވުރެ މާ ހަލުވިކޮށް އަދި މާ ވަރުގަދަކޮށް އީރާނުން ރައްދު ދޭނެ ކަމުގެ ޔަގީންކަން އޭނާ ދެއްވިއެވެ. މި ނުތަނަވަސްކަން ބޮޑުވެފައިވަނީ އީރާނުގައި ކުރިއަށްދާ ސަރުކާރާ ދެކޮޅު މުޒާހަރާތައް ހުއްޓުވުމަށް އެގައުމުގެ ސަރުކާރުން އަޅަމުންދާ ފިޔަވަޅުތަކާ ގުޅިގެން އެމެރިކާގެ ޕްރެޝަރު އިތުރުވެފައިވާ ދަނޑިވަޅެއްގައެވެ.