ސައިންސްވެރިންގެ އާ ހޯދުންތަކަކުން ދައްކާ ގޮތުގައި ހަނދު ދަނީ މަޑުމަޑުން ކުޑަވަމުންނެވެ. މި ބަދަލާއެކު ހަނދުގެ ފަށަލައަށް އަންނަ ލޮޅުންތަކުގެ ސަބަބުން 1,114 އަށްވުރެ ގިނަ އާ ރެނދުތައް ހަނދުގެ ސަތަހައިން މިހާރު ވަނީ ފެނިފައެވެ.

މި ހޯދުމަކީ ހަނދަށް އިންސާނުން ފޮނުވުމަށް ތައްޔާރުވަމުންދާ އެމެރިކާގެ ފަޒާގެ އިދާރާ، ނާސާއަށް ލިބުނު ވަރަށް ބޮޑު ކަންބޮޑުވުމެކެވެ. ސަބަބަކީ ހަނދު ކުޑަވަމުންދާ ދިއުމުގައި އުފެދޭ "މޫންކުއޭކްސް" ނުވަތަ ހަނދަށް އަންނަ ބިންހެލުންތަކުގެ ސަބަބުން، ކުރިމަގުގައި ހަނދުގައި މީހުން ވަޒަންވެރިވުމަށް ކުރާ މަސައްކަތްތަކަށް ބޮޑެތި ގޮންޖެހުންތަކެއް ކުރިމަތިވެދާނެތީއެވެ.

ނާސާގެ ލޫނާ ރިކޮނައިސަންސް އޯބިޓާ އިން ނަގާފައިވާ ފޮޓޯތަކުން އެނގޭ ގޮތުގައި، ހަނދު ފިނިވަމުންދާ ވަރަކަށް އޭގެ އެތެރެބައި ކުޑަވެ، ބޭރު ފަށަލައަށް ބާރުބޮޑުވެ ރެނދުތައް އުފެދެނީއެވެ.

މީގެ އެތައް މިލިއަން އަހަރެއް ކުރިން ފެށިގެން ހަނދުގެ ވަށައިގެންވާ މިންވަރުން ގާތްގަނޑަކަށް 150 ފޫޓު ވަނީ ކުޑަވެފައެވެ. މި ބަދަލުތަކުގެ ސަބަބުން ހަނދުގެ ދެކުނު ބިތުގައި ހުރި ބައެއް ސަރަހައްދުތަކަކީ ނާސާއިން މީހުން ބޭލުމަށް ނިންމާފައިވާ ތަންތަނަށް ވާއިރު، އެ ސަރަހައްދުތަކުގައި ބިންހެލުންތަކާއި ފަރުބަދަ ފޭބުން ފަދަ ހާދިސާތައް ހިނގުމުގެ ފުރުސަތު ބޮޑުކަމަށް ސައިންސްވެރިން އިންޒާރުދެއެވެ.

މި އާ ރެނދުތައް ފެނުމުން ހާމަވަނީ ހަނދަކީ މަރުވެފައިވާ ތަނެއް ނޫން ކަމާއި، އެތަނުގެ ބިންގަނޑަށް އަދިވެސް ބަދަލުތައް އަންނަމުންދާ ކަމެވެ. މިކަމުގެ ސަބަބުން ހަނދުގައި ދާއިމީކޮށް މީހުން ބޭތިއްބުމަށް ބޭނުންވާ އިމާރާތްތަކާއި ވަސީލަތްތައް ގާއިމުކުރުމުގައި، އެ ސަރަހައްދުތަކުގެ ރައްކާތެރިކަމާ މެދު ނާސާއިން އަލުން ވިސްނަން ޖެހިފައިވާ ކަމަށް ކަމާބެހޭ މާހިރުން ފާހަގަކުރެއެވެ.