ތުރުކީގެ ރައީސް ރަޖަބް ތައްޔިބް އުރުދުޣާން، އީރާނުން ގަލްފުގެ ގައުމުތަކަށް އަމާޒުކޮށް ފޮނުވާލި ޑްރޯން އަދި މިސައިލް ހަމަލާތަކަކީ ބަލައިގަނެވޭނެ ކަންކަމެއް ނޫން ކަމަށް ވިދާޅުވެ އެކަން ކުށްވެރިކުރައްވައިފިއެވެ.

އިސްތަންބޫލްގައި ބޭއްވި އިފްތާރު ފަރިއްކޮޅެއްގައި ވާހަކަދައްކަވަމުން އުރުދުޣާން ވިދާޅުވީ، ކޮންމެ ސަބަބަކާ ހުރެ ނަމަވެސް "އަޚުވަންތަ ގަލްފު ގައުމުތަކަށް" އަމާޒުކޮށް ދޭ މިފަދަ ހަމަލާތަކަކީ ގަބޫލުކުރެވޭނެ ކަމެއް ނޫން ކަމަށެވެ. މި ހަމަލާތަކުގެ ސަބަބުން މުޅި ސަރަހައްދު "އަލިފާންގަނޑެއްގެ ތެރެއަށް" ވެއްޓިދާނެ ކަމުގެ އިންޒާރު ދެއްވަމުން، މަސްލަހަތު ފިނިކުރުމަށްޓަކައި ހިކުމަތްތެރިކަމާއި ޑިޕްލޮމެސީ އިސްކުރުމަށް އޭނާ ވަނީ ގޮވާލައްވާފައެވެ.

އީރާނުގެ މި ހަމަލާތައް އައިސްފައިވަނީ އެމެރިކާ އާއި އިޒްރޭލުން ގުޅިގެން އީރާނަށް ދިން ހަމަލާތަކަށް ރައްދު ދިނުމުގެ ގޮތުންނެވެ. އުރުދުޣާންގެ ވާހަކަފުޅުގައި، އެމެރިކާ އާއި އިޒްރޭލުން އީރާނަށް ދިން ހަމަލާތަކަކީ ވެސް އީރާނުގެ ސިޔާދަތަށް އަރައިގަތުން ކަމަށް ސިފަކުރައްވައި އެކަމާ މެދު ކަންބޮޑުވުން ފާޅުކުރެއްވިއެވެ.

ނަމަވެސް، އީރާނުން ރައްދުގައި ގަލްފުގެ ގައުމުތަކަށް ހަމަލާދިނުމަކީ މަސްލަހަތު އިތުރަށް ގޯސްވާނެ ކަމެއްކަން ފާހަގަކުރައްވައި، އިތުރު ލޭއޮހޮރުވުންތައް ހުއްޓުވުމަށްޓަކައި އިސްލާމީ ދުނިޔެއިން އަވަސް ފިޔަވަޅުތަކެއް އެޅުމަށް އޭނާ ބާރުއެޅުއްވިއެވެ.

މި މައްސަލައިގައި ތުރުކީން އިސްނަގައިގެން ސުލްހަ ގާއިމުކުރުމަށް މަސައްކަތް ކުރަމުންދާކަން ހާމަކުރައްވަމުން، އުރުދުޣާން ވަނީ އެމެރިކާގެ ރައީސް ޑޮނަލްޑް ޓްރަމްޕާ ފޯނުން ގުޅުއްވައި މި ނުރައްކާތެރި ހާލަތާ ބެހޭގޮތުން މަޝްވަރާ ކުރައްވާފައެވެ.

އުރުދުޣާން ވިދާޅުވި ގޮތުގައި، ގައުމުތަކުގެ މެދުގައި އޮތް އިތުބާރު ކުޑަވުމަކީ ސުލްހައިގެ މަގަށް އޮތް ބޮޑު ހުރަހެކެވެ. އެހެންކަމުން، ހަނގުރާމަ ހުއްޓާލުމަށާއި މަޝްވަރާގެ މޭޒަށް ރުޖޫއަވުމަށް ބާރުއެޅުމަށްޓަކައި ތުރުކީގެ ޑިޕްލޮމެޓިކް މަސައްކަތްތައް އިތުރަށް ހަލުވިކުރާނެ ކަމުގެ ޔަގީންކަން ވެސް އޭނާ ދެއްވިއެވެ.