އެޕިސޯޑް 21

...............

[ނަޒްމާ ނުކެޔަސް އަހަންނަށް ވަރިހަމައެއް ނޫނޭ....ނަޒްމާއަށް އެއްޗެކޭ ހީވެގެން އުޅުނަސް، އަހަންނަކީ ނަޒްމާ ތިހީކުރާ ކަހަލަ މީހެއް ނޫނޭ...ދެން ރުޅިމަޑުކޮށްގެން އާދޭ އަހަންނާއެކު ބައިވެރިވެލަން.] ޢުބޭދު އެއްލި އަތުން ނަޒްމާގެ އަތުގައި ހިފެހެއްޓިއެވެ. ޢުބޭދުގެ އެ ޙަރަކާތުން ނުހޭން ހުއްޓަސް، ނަޒްމާ ގާތަށް ހިނިއައެވެ. އެއީ އަބަދުވެސް އޭނާގެ އާދައެވެ. ނަޒްމާ ކަމަކާ މާބޮޑަށް ހިތްހަމަނުޖެހިފައި ހުރިއްޔާ، ހެއްވާލާފައި ނޫނީ ދުލެއްނުކުރާނެއެވެ.

އަދިވެސް ސުދާ ވިސްނަމުން އެދަނީ، އަސްޢަދާ ދޭތެރޭގައެވެ. އަސްޢަދަށް ވާހަކަ ދެއްކިއްޖެއްޔާ، ވާނެގޮތް ހިތަށް އަރާފައި، އޭނާ ބިރުހީވަނީއެވެ. މަންމަ ގެޔަށް ވައްދާފައި އަނެއްކާވެސް ނުކުމެ ސުދާ މިޞްރާބުޖެހީ ހޮސްޕިޓަލާ ދިމާއަށެވެ. މިފަހަރު އޭނާ ޤަޞްދުކުރެއެވެ. އަސްޢަދުގެ ދުވަސް ދުއްވާލާފައި ނޫނީ އެނބުރި ގެޔަށް ނައުމަށެވެ. ސުދާ ހޮސްޕިޓަލަށް ދިޔުމަށްޓަކައި މިޞްރާބު ޖަހާފައިވާއިރު، އަސްޢަދު ލައްވާ ވާހަކަ ދެއްކުވޭތޯ މަސައްކަތް ކުރަން އަސްޢަދު އޮތް އެނދުގެ ވަށައިގެން މުޢާޒުމެން ތިއްބެވެ. ޢަލިމަނިކާއި ވަސީމާ ދެމީހުންވެސް ތިއްބެވެ. އެހެންކަމުން، ސުދާއަށް މަޖުބޫރުވީ މިފަހަރުވެސް އެމީހުނަށް ނުފެންނަފަށުގައި މަޑުކުރުމަށެވެ. ހިތާ ދެކޮޅަށެވެ. އަމިއްލަ ސަލާމަތަށްވެސް ހުރަސްއެޅިދާނެތީއާ އެކުގައެވެ.

[އަސްޢަދު ނިކަން ވާހަކަ ދެއްކޭތޯ މަސައްކަތް ކޮށްބަލަ...ޑޮކްޓަރު އެދިޔައީ ވާހަކަ ދެއްކޭނެ ކަމުގެ ޔަޤީންކަން ދީފައޭ.] ވަސީމް އަސްޢަދުގެ ބޮލުގައި އަތް ކާއްތަމުން ބުންޏެވެ. އެވަގުތު އަސްޢަދަށް ދޮރުމަތީގައި ހުއްޓި ހުރި ސުދާ ފެނުނެވެ. ނާމާން ސިފައެއްގައެވެ. ނަމަވެސް، އެވަގުތު ދޮރުމަތީ ހުއްޓިހުރި ސުދާ ފެންނަނީ އެކަނި އަސްޢަދަށެވެ. މުޢާޒުމެން ހީކުރީ އަސްޢަދުގެ މޫނުމައްޗަށް އަރާ ފައިބަމުންދިޔަ ކުލަވަރަކީ ވާހަކަ ދެއްކެން އުޅޭކަމުގެ ސިގްނަލް ކަމަށެވެ. އެވަގުތު އަސްޢަދުގެ ތުންފަތް ޙަރަކާތްކޮށްލިއެވެ. އޭރުވެސް އޭނާގެ ކަޅި އަމާޒުވެފައިވަނީ ދޮރުމަތީ ހުރި ސުދާއަށެވެ. ނާމާން ސިފައެއްގައި ހުއްޓަސް ސުދާ ހުރީ ނުތަނަވަސްވެފައެވެ. އަސްޢަދަށް ވާހަކަ ދެއްކިދާނެހެން އޭނާއަށް ހީވަނީއެވެ.

[ބޭ....ބޭ....ބޭ....ބައްޕާ.....] ދިގު އިންތިޒާރަކަށްފަހު، އަސްޢަދުގެ އަޑު ނުކުތެވެ. ބޭބެއާއި ބައްޕައާ މުޚާޠަބު ކުރިއިރުވެސް އޭނާގެ ނަޒަރު ހުއްޓިފައިވަނީ ސުދާއަށެވެ. ސުދާހުރީ ގޮތްހުސްވެފައެވެ.

ސުދާގެ ހުރިހާ ފިކުރުތަކެއްވެސް ވަނީ އަސްޢަދާ އެކުގައެވެ. އޭނާއާ ދިމާއަށް އަސްޢަދު އިނގިލި ދިއްކޮށްފާނެތީ އޭނާހުރީ ވަރަށް ކަންބޮޑުވެފައެވެ. އަސްޢަދަށް ހިތްވަރު ލިބިއްޖެއްޔާ، އޭނާއަށް އިޝާރާތް ކުރާނެކަން އޭނާއަށް ގައިމުވެއެވެ.

[ބޭބޭ...ބޭބޭ....] އެންމެން އުފާވެފައި ތިއްބާ މުޢާޒަށް ދެފަހަރަކަށް ގޮވާލުމަށްފަހު، ނޭވާ ހާސްވެގެން އުޅޭފަދަ ގޮތަކަށް އަސްޢަދު ތެޅިގަތުމުން އެންމެންގެ ސަމާލުކަން އަނެއްކާވެސް އަސްޢަދަށް ހުއްޓިއްޖެއެވެ. އިސާހިތު ޑޮކްޓަރާއި ނަރުހުން އެތަނަށް ޖަމާވެއްޖެއެވެ. ނަމަވެސް، ޑޮކްޓަރަށް އާދެވުނުއިރު، އަސްޢަދު އޮތީ ޚަބަރު ހުސްވެފައެވެ. އެހެންކަމުން، ޑޮކްޓަރު އެދުނީ ވަގުތުން އަސްޢަދު އައި.ސީ.ޔޫ އަށް ވެއްދުމަށެވެ. ސުދާ އޭރުވެސް ހިތްހަމަޖެހިފައި ދޮރުމަތީގައި ހުއްޓެވެ. ކަންތައްވީވެސް އޭނާގެ އެ ހިތްހަމަޖެހުން ދާއިމަށް ދެމިގެންދާފަދަ ގޮތަކަށެވެ.

އަސްޢަދު ހިތް ހުއްޓިގެން މަރުވިއެވެ. ސުދާއާ ބެހޭގޮތުން އެއްވެސް ވާހަކައެއް މުޢާޒަށް އޮޅުންފިލުވައި ނުދެވެނީހެވެ.

ޑޮކްޓަރު ބުނީ ދުވަސްތަކަކަށްފަހު ވާހަކަ ދެއްކުމުން، އުފަލުން ގޮސް ހިތް ހުއްޓުނީ ކަމަށެވެ.

[އޮޕަރޭޝަން ނުކުރެވުނުނަމަ މާރަނގަޅެއްނު...އެހެންނަމަ ކޮއްކޮ އަހަރެމެނަށް ފެންނަން ހުރީހެއްނު.] އަސްޢަދުގެ ކަށުކަމާކެމީގެ ކަންތަކަށްފަހު ގެޔަށް އައިސް ސުދާއާ އެކަނިވީ ވަގުތު މުޢާޒު ބުންޏެވެ. އެދުވަހު މުޢާޒެކޭ އެއްފަދައިން، ސުދާވެސް އެހިތާމައިގައި ބައިވެރިވިއެވެ. އޭނާގެ ޙާލު ހީވަނީ އެގޭ އެހެން މީހުނަށްވުރެން ބޮޑުހެންނެވެ. ނަމަވެސް، އަސްޢަދު މަރުވީ އޭނާގެ ނަޞީބޭ އޭނާގެ ހިތަށްއަރައެވެ. މިހާރު އޭނާ އެންމެ ބިރުގަންނަ މީހަކަށް މިދުނިޔޭގައި ހުރީ ބައްޕަގެ ރަޙްމަތްތެރިޔާއެވެ.

ޢަލިމަނިކަކީ އޭނާއަށް މިދުނިޔެމަތީގައި ހުރި ބޮޑު ބިރެކެވެ. އެއީ ހުޝިޔާރުވެސް މީހެކެވެ. ގިނަ ވަގުތު އޭނާ ހުންނަނީ ނިކަން ފުރިހަމައަށް ރައްކާތެރިވެގެންނެވެ. ޢާންމުކޮށް އޭނާއަކީ ޖިންނި ފަންޑިތަ ހަދާ މީހަކަށްވާތީ، ނުތާހިރާ ހުންނަ ވަގުތު ނޫން އެހެން ހުރިހާ ވަގުތެއްގައިވެސް އޭނާ ހުންނަނީ ރައްކާތެރިވެގެނެވެ. އަދި މިހާތަނަށް ރޫޙާނީ އެއްޗެއްގެ އެއްވެސް ޙަމަލައެއް އޭނާއަކަށް އަމާޒުވެފައެއް ނުވޭމެއެވެ. އޭނާއާ ޖެހި އެ އެއްޗެތި އަބަދުވެސް ބަލިވެ ހަތިޔާރު ބަހައްޓައެވެ.

[ދަރިފުޅާ ސުދާ...ބައްޕަ މިއުޅެނީ ހަފްތާއެއްހާ ދުވަހަށް ރަށަށް ޖައްސާލަން ކަމަށް....ދަރިފުޅު ދާނަންތަ؟] ވަސީމް ވާހަކަ ދެއްކީ ސުދާއާއެވެ.

[އަހަރެން ގޮސްގެން، ކާކުތަ މިގެ ބަލަހައްޓާނީ...މަންމައަކަށް އެއްކަމެއްވެސް ނުކުރެވޭނެ.] ސުދާ ޢުޒުރު ދެއްކިއެވެ. އެކަމަކު އޭނާ އެބުނީވެސް ތެދެކެވެ. އޭނާ ނެތިއްޔާ އެގޭ މީހުން ތިބޭނީ ނުކައި ނުބޮއެވެ.

[ބައްޕަ މިދަނީ ޢަލިމަނިކުވެސް ގޮވައިގެން، ގެޔަށް ކޮންމެވެސް ކަމެއް ކުރުވަންވެގެން. ގެޔަށް ބަޔަކު އެތިފަހަރެއް ހަދައިގެން އުޅޭ ކަމަށް ބައްޕައަށް ޝައްކުވާތާވެސް މިހާރު ދުވަސްކޮޅެއް ވެއްޖެވިއްޔަ.] ވަސީމްގެ މި ޖުމްލައާއެކު، ސުދާއަށް ތެޅިގަނެވުނެވެ. އަނެއްކާ އަނެއް ކަންތަކާ ޖެހުނީޔޭ ހިތަށްއެރިއެވެ.

[ބައްޕަ ތިބުނީ...ކޮންކަހަލަ ކަމެއްގެ ވާހަކައެއްތަ؟] ސުދާ އިތުރަށް އޮޅުންފިލުވަން ބޭނުންވިއެވެ.

[ގެ ފަޅުކުރަން ބަޔަކު ކަމެއް ކޮށްގެން އުޅޭހެން ބައްޕައަށް ހީވާތީ...ފުރަތަމަ ކަމަކަށް ދަރިފުޅުގެ މަންމަ ބައްޕަޔާއެކު ނުލާހިކު އުފަލުގައި އުޅެނިކޮށް މަރުވީ. އެއަށްފަހު، ދަރިފުޅު ރަށުން ފޭބީ...އެންމެފަހަށް ހުރީ ބައްޕަ. ބައްޕަވެސް މިހާރު އެއްގޮތަކަށްވެސް ރަށަށްދާހިތެއް ނުވޭ.] ވަސީމް ކިޔައިދިނެވެ. ސުދާގެ ހާސްކަން އިންތިހާއަށް ދިޔައެވެ.

[މާލޭގައި މިގޮތަށް އުޅެވެންޏާ، ކޮންމެހެން ރަށުގައި އުޅޭށޭ ކިޔާފައި ދިޔުމުގެ ބޭނުމެއްވެސް ނެތެއްނު ބައްޕާ.] ސުދާ ވަސީމް ހުއްޓުވުމުގެ ޤަޞްދުގައި ބުންޏެވެ.

[ދަރިފުޅާ...އެއީ ކާބަފައިންގެ ރަށް. އުފަން ރަށް...ދަރިފުޅުގެ މަންމަގެ މަސްގަނޑު އޮތް ރަށް...ބައްޕަ ޢަލިމަނިކު ލައްވާ ކަމެއް ކުރުވަން މިއުޅެނީވެސް ދަރިފުޅުގެ ވާހަކަ ތިގޮތަށް ހުންނާތީ.] ސުދާ ހީކުރިގޮތެއް ނޫނެވެ. ވަސީމްގެ ޚިޔާލު ބަދަލެއްނުވިއެވެ. އޭނާ ނިންމީ އެރޭ ފުރާ އޮޑިން ޢަލިމަނިކު ގޮވައިގެން ރަށަށް ފުރާށެވެ. ސުދާ މާޔޫސްކޮށްލާފައެވެ.

އެދުވަހު ބައްޕައަށް ހުރަސްއަޅާނެ އެހެން ގޮތެއް އޮތްތޯވެސް ސުދާ ވިސްނިއެވެ.

[ސުދާ....މިހާރަކަށް އައިސް ކޮންހާ ވިސްނުމެއްތަ؟] ސުދާގެ ފަހަތުން އައިސް ކޮނޑުގައި ހިފަހައްޓާލަމުން މުޢާޒު އެއްސެވެ.

[ބައްޕަ އަހަރެން ގާތު ބައްޕަޔާއެކު ދިހަވަރަކަށް ދުވަހަށް ރަށަށް ދާންވީ ނޫންހޭ ބުނީމާ، އެކަމާ ވިސްނާލެވުނީ.] ސުދާ ތެދާއި ދޮގު މަސްހުނި ކުރިއެވެ.

[ދެން ސުދާ ބުނީ ކީކޭ؟] މުޢާޒު ސުދާގެ ދެކޮނޑުގައި ހިފައި އޭނާއާ ދިމާއަށް އަނބުރާލިއެވެ.

[ތިހެން ނޭހިޔަސް، އަހަންނަށް ނުދެވޭނެކަން އެނގެއެއްނު....އަހަންނަށް ނުދެވޭނެ ވާހަކަ ބުނީމާ، ބައްޕަ ބުނީ މައްސަލައެއް ނެތޯ...ބައްޕަވެސް ދިހަވަރަކަށް ދުވަސްތެރޭ އެނބުރި އަންނާނަމޯ.] ސުދާ ބުންޏެވެ.

[ސުދާ ދާހިތްވަންޏާ....މައްސަލައެއް ނެތޭ ދިޔަޔަސް...ދިހަ ދުވަސް ވަންދެން އަހަރެން ބޭރުން ގެނެސްގެން މަންމައަށް ކާންދީފާނަން.] ސުދާ ހިތްހަމަޖައްސައި ދިނުމަށްޓަކައި މުޢާޒު ބުންޏެވެ.

[ނޫޅެމޭ ދާހިތަކުންނެއް....ދަންނަ މީހަކުވެސް އުޅޭނީކީ ނޫން...ވަރަށް ފޫހިވާނެ.] ސުދާ ބުނެލިއެވެ.

އެރޭ ވަސީމް ޢަލިމަނިކު ގޮވައިގެން ރަށަށް ދިޔުމަށްޓަކައި ފުރައިގެން ދިޔައިރު، ސުދާ ހުރީ ގޮތް ހުސްވާން ކައިރިވެފައެވެ.

އެދުވަސް ފާއިތުވެއްޖެއެވެ. ޢަލިމަނިކުގެ މަގަށް ހުރަސްއަޅަން ސުދާކުރި އެއްވެސް މަސައްކަތެއް ކާމިޔާބެއް ނުވެއެވެ.

[އަދި ކާމިޔާބުވާނެ...މަޢާފަށް އެދި އަދިވެސް ފޯނުކުރޭ.] ފިރާޝާގެ ރަޙްމަތްތެރިޔާ އަސްމާ ވާހަކަ ދެއްކީ ފިރާޝާއާއެވެ. ހިތްވަރު ދެމުންނެވެ.

[އަހަރެން ގުޅައިގެން ހިއެއްނުވޭ، އޭނަގެ ހިތުގައި ރަޙުމް އުފެދިދާނެހެނެއް.] ފިރާޝާ ބުންޏެވެ. އެއީ ތެދު ޙަޤީޤަތެކެވެ. އޭނާ ދައްކާ އެއްވެސް ވާހަކައެއް މުޢާޒު އަޑެއްނާހައެވެ. މުޢާޒުގެ ހިތުގައި އޭނާއަށްޓަކައި އަނދަމުންދާ އަލިފާންގަނޑު ނިއްވާލެވޭނެފަދަ ބާރެއް އަދި އޭނާގެ ކިބަޔަކު ނެތެވެ.

މުޢާޒުވެސް މިހާރު ޤަބޫލު ކުރެއެވެ. ފިރާޝާ މިހާރު ވަރަށްބޮޑުތަން އިޞްލާޙުވެއްޖެއެވެ.

[އިޞްލާޙުވިޔަސް ވަރިހަމަ...އަލުން އޭނަޔާ ގުޅޭނަމެކޭ އަހަރެންގެ ހިތަކަށް ނާރާ. އޭނަގެ ސަބަބުން އަހަރެންގެ ޙަޔާތުން ގިނަ ދުވަސްތަކެއް ބޭކާރުވެގެންދިޔަ.] ފިރާޝާގެ މެސެޖް ހިފައިގެން އޭނާގެ ވަފްދެއްގެ ޙައިޘިއްޔަތުން މުޢާޒާ ބައްދަލުކުރި އަސްމާއަށް، ފިރާޝާއަށްޓަކައި އޭނާގެ ހިތުގައިވާ މަޤާމު އޮޅުންފިލުވައިދިނެވެ.

[މުޢާޒު...އިންސާނުންނަށް ކުށްވެސް ކުރެވޭނެ...އޭނައަށް މަޢާފްދީ...މިހާރު ފިރާޝާ މުޢާޒުދެކެ ލޯބިވޭ.] އަސްމާ މަސައްކަތްކުރީ މުޢާޒުގެ ހިތުގައި ފިރާޝާއަށް ދެވިފައިވާ މަޤާމު ބަދަލުކުރެވޭތޯއެވެ.

[ތިހެން ނުބުނޭ އަސްމާ...އެއީ މަޢާފް ޙައްޤުވާވަރުގެ މީހެއް ނޫން....އޭނަގެ ސަބަބުން އަހަންނަށް ކުރި އަސަރު އަސްމާއަކަށް ތަޞައްވުރެއް ނުކުރެވޭނެ.] މާޒީގެ ހިތްދަތި ހަނދާންތަކެއް، މުޢާޒުގެ ސިކުނޑީގައި ކުރެހުނެވެ.

[މުޢާޒު ފިރާޝާގެ ހިކި އަނަރޫފަވަމުންދާ ހަށިގަނޑު ފެނުނަސް، މުޢާޒަށް އެނގޭނެ. އެއީ ކުރީގެ ފިރާޝާ ނޫންކަން.] އަސްމާ ބުންޏެވެ.

ތެދެކެވެ. މިހާރު ފިރާޝާ އެވަނީ މަޢާފް ޙައްޤުވާވަރަށް ބަދަލުވެފައެވެ. އޭނާގެ ހަށިގަނޑުވެސް ވަނީ ހިކި އަނަރޫފަވެފައެވެ. ރޮއި ހިތާމަކޮށްކޮށް ދެލޯވަނީ ވަޅުވަދެފައެވެ. އޭނާ ފެނުނު ކޮންމެ މީހަކަށްވެސް އޭނާގެ ކުށުގެ އަދަބު ލިބިއްޖެއޭ ހީވާނެއެވެ. ނަމަވެސް، އޭނަ ހުރިގޮތަކާއި، މިހާރު ދިރިއުޅުން ހޭދަކުރަމުންދާ ގޮތް ކިތަންމެ ރަނގަޅަށް ސިފަކޮށްދިނަސް ރަޙުމް ނުވަންނާނެފަދަ ގޮތަކަށް މުޢާޒުގެ ހިތްވަނީ ފިރާޝާއަށްޓަކައި ހިލަވެފައެވެ.

[ކުރިން އަހަރެން އޭނަދެކެ އިންތިހާއަށް ލޯބިވިން...އެކަމަކު މިހާރު އަހަރެންގެ ހިތުން އޭނައަށް އެއްވެސް ޖާގައެއް ނެތް...އަހަރެންގެ ހިތުގެ ވަށައިގެން ވަނީ އޭނައަށް ނުވަދެވޭނެހެން ހިލައިގެ ފާރެއްލެވިފައި...އެ ފާރުތެރޭ ވެރިކަން ހިންގުމުގެ ހުރިހާ ބާރެއް އޮތީ އަހަރެންގެ އަނބިމީހާއަށް...އެއީ އަހަރެންގެ ހުއްޓެމުންދިޔަ ހިތަށް ހިތްވަރުދީ، ކުރިއަށް ދިޔުމުގައި އެހީތެރިވެދިން މީހާ....] މުޢާޒު ވާހަކަ ދެއްކީ ޢުބޭދާއެވެ.

[އަލުން އޭނަޔާ ގުޅޭށެކޭ އަހަންނެއް ނުބުނާނަން...އެކަމަކު މުޢާޒު އޭނައަށް މަޢާފްކޮށްދީ....] ޢުބޭދު ބުންޏެވެ.

[އޭނަ އަހަންނަށްވީ ބޭވަފާގެ ބަދަލުގައި ގެއްލުމެއް ނުދީ ދޫކޮށްލުން އެއީ މަޢާފެއް ނޫންތަ؟] މުޢާޒު ބުންޏެވެ. ތެދެކެވެ. އެންމެ ގަދައަށް ރުޅިއިސްވި ވަގުތުވެސް އޭނާ ފިރާޝާގެ ގައިގައި ބީހިވެސްނުލައެވެ. އޭނާއަށް ކުރެވުނުހާވެސް ވަރަކީ ފިރާޝާ ލާން ގެންގުޅޭ އަންނައުނުތައް ދީފައި ގެއިން ނެރެލުމެވެ. ޙަޤީޤަތުގައި އެފެންވަރުގެ ކުށަކަށް އެއީ ދެވުނު އަދަބެއް ކަމުގައި ބައެއް ފިރިހެނުންނަކަށް ނުބެލެވޭނެއެވެ.

[މުޢާޒު ތިބުނީ ވަރަށްބޮޑު ތެދެއް...ފިރާޝާ އެއީ އަހަންނާ ޖެހުނު މީހެއްނަމަ، ނޭވާލާހާ ހިނދަކު ދޫކޮށެއް ނުލާނަން.] ޢުބޭދުވެސް މުޢާޒުގެ ވާހަކައަށް ތާއީދު ކުރިއެވެ.

[ޢުބޭދުމެން ނުކިޔާ މަޢާފްކޮށްދޭށޭ.] މުޢާޒު ޢުބޭދުގެ ފަރާތުން ލިބުނު ތާއީދާއެކު ބުންޏެވެ.

[ޢުބޭދު އަހަރެން ދަނީއޭ ދެން...މިއަދު މިގޭގައިވެސް ނިކަން ގިނައިރު ވަންދެން ހުރެވިއްޖެއެއްނު.] މުޢާޒު ނުކުމެގެން ހިނގައިގެންފިއެވެ.

ޢަލިމަނިކު ފުރަތަމަ ގޭގެ އޮޅިގަނޑު ކުރިމަތީގައި ހުރެ ކިޔަވާލިއެވެ. އެއަށްފަހު އޭނާ ﷲގެ އިސްމުފުޅު ކިޔަވާލުމަށްފަހު އެތެރެއަށް ވަނެވެ. ފަހަތުން ވަސީމްވެސް ވަނެވެ. ޢަލިމަނިކު އެތެރެއަށް ވަދެ އުނދޯލީގައި އިށީނުމަށްފަހު ދަބަސް ހުޅުވާލާފައި އޭގެތެރެއިން ނިކަން ބޯފޮތެއް ނަގައިފިއެވެ.

[މިހާ ބޮޑު ގެއެއް ފަޅަށް ބަހައްޓާފައި ވަސީމްވެސް މާލެ ގޮސްގެން ތިއުޅެނީ؟] ފާލު ބަލަން ފަށަމުން ޢަލިމަނިކު ވާހަކަ ދެއްކިއެވެ. ޙަޤީޤަތުގައިވެސް އެގޭގެ ފުރިހަމަކަމާމެދު ޢަލިމަނިކު ހުރީ ނިކަން ޙައިރާންވެފައެވެ. އެއީ ރާނާ ސިމެންތިޖަހައި ކުލަލައި ތަރަފާލު އަޅާފައިވާ އެރަށުގެ ނިސްބަތުން ފެންވަރު ރަނގަޅު ގެއެކެވެ.

[މިގޭގެ ހަތަރު ދިމާއެއްގައި ލޯ ޓިނުފޮތި ވަޅުލާފައި އެބަހުރި....ފުރަތަމަ ޖެހޭނީ އެ ހޯދަން. އެއީ ވަރަށް ބާރުގަދަ ހަތަރު ތަވީދު. ވީހާވެސް އަވަހަކަށް އެ ނުނެގިއްޖިއްޔާ، މިގޭ މީހުން ހުސްވެ މުޅި ގެ ފަޅުވާނެ.] ފުރަތަމަ ފާލަށްފަހު ޢަލިމަނިކު ބުންޏެވެ.

[އޭނ...ފިސާރި ތެދެއް؟!] އެ ތަވީދުތައް ލާފައި ހުރި ދިމަދިމާ އެނގޭތަ؟] ވަސީމަށް ތެޅިގަނެވިއްޖެއެވެ.

[މިހާރު މި ބަލަނީ ތިއެއް.] ޢަލިމަނިކު އަނެއްކާވެސް މަސައްކަތް ފެށިއެވެ. ވަސީމްގެ މޭ ތެޅެން ފެށިއެވެ.

[އެ ލޯ ފޮތިތައް ހުރީ ގޭގެ ހަތަރުކަނުގައި. އަވަހަށް ކޮނެފައި އެ ނަގާ....އެހެން ނޫނީ ވަސީމްވެސް ސަލާމަތެއް ނުވާނެ. ވަރަށް ބާރުގަދަ އެތިފަހަރެއް ހަދާފައި ހުރީ...ގެޔާއި މުދަލުގެ ދަހިވެތި ކަމުގައި ބަޔަކު ކޮށްގެން އުޅޭ ކަމެއްހެން ހީވަނީ....] ޢަލިމަނިކު ފޮތް ލައްޕާލިއެވެ. ވަސީމް އަވަސްވެގަތީ ގޭގެ ހަތަރުފަރާތް ކޮނެގެން އެ ލޯ ފޮތިތައް ނެގުމަށެވެ. ވިސްނާ ވިސްނާ އެގެޔާ މުދަލުގެ ދަހިވެތި ކަމުގައި އެފަދަ ކަމެއް ކޮށްފާނެ މީހަކު ވަސީމްގެ ޚިޔާލަކަށްވެސް ނުގެނެވުނެވެ. ދުނިޔޭގައި ވަސީމާ ދުރުތާ ތިމާގެ މީހަކަށްވެސް، ގާތްތިމާގެ މީހަކަށްވެސް ހުރީ އޭނާގެ ބައްޕަޔާ އެއްބަނޑު މީހެއްގެ ދަރިއެކެވެ.

މިފަދަ ކަންތައްތަކަކީ މިހާރުވެސް މަދުން ނަމަވެސް، ރާއްޖޭގެ އެކިކަންކޮޅުތަކުގައި ހިނގަމުންދާ ކަންތައްތަކެކެވެ.

[ސީދާ ޢާއިލާ ނައްތާލަން ކޮށްފައިވާ ކަމެއް މީ.....] ކޮނެގެން ފުރަތަމަ ފެނުނު ލޯފޮތި ދޮވެ ބަލައިލުމަށްފަހު ޢަލިމަނިކު ބުންޏެވެ.

[ކިރިޔާއެއްނު އަހަންނާ ދަރިފުޅު ސަލާމަތްވީ؟] ހުރިހާ ދިމާއަކުންވެސް ލޯފޮތިތައް ނަގައި، އެ ހިލިހިލާއިން ގެ ސަލާމަތްކޮށް ނިމި ހިންދެމިލަމުން ވަސީމް ބުންޏެވެ.

[ދަރިފުޅޭ...ކޮން ދަރިފުޅެއްގެ ވާހަކަ!؟ ފާލުން ދެއްކި ގޮތުން އެމަންޖެވެސް މިހާރަކު ދުނިޔެއަކު ނެތް....] ޢަލިމަނިކަށްވެސް ސުދާގެ ހަނދާންވީ އަދި ކިރިޔާއެވެ. އެހެންކަމުން، އިތުރަށް އެ ފާލު ތަކުރާރު ކުރަން ޢަލިމަނިކު ބޭނުންވިއެވެ.

[ތި ބެލި ފާލަކީ ތެދު ފާލަކަށް ނުވިއެއްނު...އެމަންޖެ ދުށީމެއްނު ޢަލިމަނިކުވެސް.] ވަސީމް ގާތަށް ހިނިއައެވެ.

މެންދަމުން އަނބުރާ ދޭއްޖަހާވެސް ބޮޑުވިއެވެ. ސުދާ އެއުޅެނީ ލޮލަށް ނިދިނައިސްގެނެވެ. ސަލާމަތުގެ އައްސޭރިފަށަކަށް އެރޭތޯ އޭނާ ވަރަށް ވިސްނާލިއެވެ. ނަމަވެސް އަދި އޭނާއަކަށް މަގެއް ތަނަވަހެއް ނުވެއެވެ. ޢަލިމަނިކަކީ އޭނާ ހީކުރިވަރަށްވުރެން މާ ހުޝިޔާރު މީހެކެވެ. އޭނާއަށް ޢަލިމަނިކާ ގާތްވެވޭފަދަ ހަނި ފުރްޞަތެއްވެސް ނުލިބެއެވެ. މިހާރުވެސް އޭނާ ވިސްނައި ފިކުރު ކުރަމުން އެދަނީ ޢަލިމަނިކުގެ ކިބައިން މިންޖުވެ އޭނާގެ ދިރިއުޅުން މުޢާޒާއެކު ދިގުލާނޭ ގޮތަކާ ދޭތެރޭގައެވެ. އެރޭ އިރުގެ އަލިކަން ދުނިޔެއަށް ފާޅުވަންދެންވެސް އޭނާ އޮތީ އެފަދަ ޙާލެއްގައެވެ.

[ސުދާ ރެޔަކު ނުނިދަންދޯ؟] ހެނދުނު ސުދާގެ ލޮލަށް ބަލަން ހުރެފައި މުޢާޒު އެއްސެވެ.

[އާނ...ކުޑަކޮށް ބޮލުގައި ރިއްސާތީ ހަމަނިންޖެއް ނުލިބޭ. މިހާރު ބޭސްވެސް ކައިފިން.] ސުދާ ދޮގެއް ހަދާލިއެވެ.

[ބޭސް ކެއީމަވެސް ރަނގަޅެއްނުވޭ؟] މުޢާޒު ނުހަނު ލޯތްބާއެކު ސުދާގެ ބޯ މޮޑެދިނެވެ. ސުދާ ނޫނެކޭ ބުނާފަދަ ގޮތަކަށް ބޯހޫރާލިއެވެ. ބޮޑުކޮޓަރީގައި ހުރި ފޯނު ރިންގްވާން ފެށި އަޑު އެވަގުތު އިވުނެވެ.