އީރާނުން އިޒްރޭލުގެ އާންމުން ދިރިއުޅޭ ސަރަހައްދުތަކަށް ކްލަސްޓަރ ބޮން (ކުދިބޮން އެކުލެވޭ މިސައިލް) ބޭނުންކޮށްގެން ހަމަލާދީފި ކަމަށް އިޒްރޭލު ސިފައިން ބުނެފިއެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، އުޑުމަތިން ދަގަނޑު ބުރިތަކެއް ފަދައިން ގިނަ އަދަދެއްގެ ގޮވާތަކެތި އޮހެމުންދާތަން ފެނެއެވެ.

އިޒްރޭލުގެ އަސްކަރިއްޔާގެ ތަރުޖަމާނު ލެފްޓިނެންޓް ކާނަލް ނަދާވް ޝޯޝާނީ ވިދާޅުވި ގޮތުގައި، އީރާނުން މިފަދަ ނުރައްކާތެރި ހަތިޔާރު ބޭނުންކުރަނީ ގިނަ އަދަދެއްގެ އާންމުންނަށް ގެއްލުން ދިނުމުގެ މަގްސަދުގައެވެ.

މި ހަމަލާތަކުގައި އިޒްރޭލުގެ ބެއިޓް ޝެމޭޝް އަދި ތެލް އަވީވް ފަދަ ސިޓީތަކަށް ބޮޑެތި ގެއްލުންތަކެއް ލިބިފައިވާ އިރު، ބެއިޓް ޝެމޭޝްއިން އެކަނިވެސް ނުވަ މީހަކު މަރުވެފައިވާ ކަމަށް ރިޕޯޓްތައް ބުނެއެވެ.

އީރާނުން ފޮނުވާލި ކްލަސްޓަރ މިސައިލްތަކުގެ ބޮލުން ގާތްގަނޑަކަށް 20 ވަރަކަށް ކުދި ބޮން ވަކިވެ، ބޮޑު ސަރަހައްދަކަށް ފެތުރިގެންދާ ކަމަށް މައުލޫމާތު ލިބެއެވެ. މިއީ ބައިނަލްއަގުވާމީ ގާނޫނުތަކާ ހިލާފު، ހަނގުރާމައިގެ ޖަރީމާއެއްގެ ގޮތުގައި އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ވަނީ ސިފަކޮށްފައެވެ.

އިޒްރޭލާއި އެމެރިކާ ގުޅިގެން އީރާނަށް ދޭން ފެށި ވަރުގަދަ ހަމަލާތަކުގެ ބަދަލުހިފުމުގެ ގޮތުން އީރާނުން ދެމުންދާ މި ހަމަލާތަކުގެ ސަބަބުން މުޅި ސަރަހައްދުގެ މަޝްރަހު ވަނީ ނުހަނު ބޮޑަށް ގޯސްވެފައެވެ.

އީރާނުން މިހާތަނަށް ސަތޭކައަށްވުރެ ގިނަ މިސައިލާއި ޑްރޯން އިޒްރޭލަށާއި އެމެރިކާގެ އަސްކަރީ މަރުކަޒުތަކަށް ފޮނުވާލާފައިވާ އިރު، މީގެ ތެރެއިން ބައެއް މިސައިލްތަކަކީ އާންމުންނަށް އަމާޒުކޮށް ފޮނުވާލާފައިވާ ހަމަލާތަކެއް ކަމަށް ބައިނަލްއަގުވާމީ މީޑިއާތަކުން ރިޕޯޓްކުރެއެވެ.