މިއަދު ހެނދުނު ސައުދީ އަރަބިއްޔާގެ ރިޔާޒުގައި ހުންނަ އެމެރިކާގެ އެމްބަސީއަށް އަމާޒުކޮށް އީރާނުން ދިން ޑްރޯން ހަމަލާތަކެއްގައި އެމްބަސީގެ އިމާރާތުގައި އަލިފާން ރޯވެ، ގެއްލުންތަކެއް ވެއްޖެއެވެ.

ސައުދީ ޑިފެންސް މިނިސްޓްރީން ބުނި ގޮތުގައި، ދެ ޑްރޯން ބޭނުންކޮށްގެން ދިން މި ހަމަލާގައި އެމްބަސީގެ ބައެއްގައި ރޯވި އަލިފާންގަނޑު މިހާރު ވަނީ ކޮންޓްރޯލް ކުރެވިފައެވެ. އަދި މި ހަމަލާ ދިން ވަގުތު އެމްބަސީގައި އެއްވެސް މުވައްޒަފަކު ނެތުމުގެ ސަބަބުން އެއްވެސް މީހަކަށް އަނިޔާއެއް ލިބިފައި ނުވާ ކަމަށް ރިޕޯޓުތައް ބުނެއެވެ.

މި ހަމަލާއާ ގުޅިގެން ރިޔާޒުގެ ޑިޕްލޮމެޓިކް ކުއާޓާ ސަރަހައްދުން ބާރުގަދަ ގޮވުންތަކެއްގެ އަޑު އިވި، ކަޅު ދުން އަރަމުންދާ މަންޒަރު ފެނިފައިވާ ކަމަށް މަންޒަރުދުށް މީހުންނާ ހަވާލާދީ ބައިނަލްއަގުވާމީ މީޑިއާތަކުން ރިޕޯޓުކުރެއެވެ. އެމެރިކާގެ މިޝަނުން ވަނީ ރިޔާޒު، ޖިއްދާ، އަދި ދަހްރާންގައި ތިބި އެމެރިކާގެ ރައްޔިތުން ރައްކާތެރިކަމުގެ ފިޔަވަޅެއްގެ ގޮތުން ގޭގައި މަޑުކުރުމަށް އަންގާފައެވެ.

މިއީ އެމެރިކާއާއި އިޒްރޭލުން އީރާނަށް ދެމުންދާ ހަމަލާތަކުގެ ބަދަލުހިފުމުގެ ގޮތުން އީރާނުން ގަލްފުގެ ގައުމުތަކުގައި ހުރި އެމެރިކާގެ މަސްލަހަތު އޮތް ތަންތަނަށް ދެމުންދާ ހަމަލާތަކުގެ ތެރޭގައި ހިމެނޭ ކަމެކެވެ.

ސައުދީ ސަރުކާރުން ވަނީ މި ހަމަލާ ވަރަށް ހަރުކަށި އިބާރާތުން ކުށްވެރިކޮށްފައެވެ. ސައުދީން ބުނި ގޮތުގައި އީރާނުން ދެމުންދާ މިފަދަ ހަމަލާތަކަކީ ސަރަހައްދީ ހަމަޖެހުމަށް އޮތް ނުރައްކަލެކެވެ.

މި ހަމަލާތަކާ ގުޅިގެން މުޅި މެދުއިރުމަތީގެ މަސްރަހު ވަނީ ނުތަނަވަސްވެފައެވެ. މީގެ އިތުރުން، އީރާނުން ވަނީ ހޮރްމުޒް ކަނޑުއޮޅި ބަންދުކުރާނެ ކަމުގެ އިންޒާރުވެސް ދީފައެވެ.