ބައިނަލްއަޤްވާމީ މަސްރަޙުގައި އުފެދިފައިވާ ނުތަނަވަސްކަމާ ގުޅިގެން، އީރާނުން އެދިއްޖެ ނަމަ އިސްރާއީލާ ދެކޮޅަށް ބޭނުންކުރުމަށް މިސައިލް ފޯރުކޮށްދޭން ތައްޔާރަށް ހުރިކަމަށް އުތުރު ކޮރެއާގެ ލީޑަރު ކިމް ޖޮންގް އުން ވިދާޅުވެއްޖެއެވެ.

މިކަން ހާމަކުރައްވަމުން ކިމް ވިދާޅުވީ، އިސްރާއީލު ދުނިޔޭގެ ޗާޓުން ފޮހެލުމަށްޓަކައި އެންމެ މިސައިލެއްވެސް ފުދޭނެ ކަމަށެވެ. މިއީ ފަހަކަށް އައިސް މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން އުތުރު ކޮރެއާއިން ދީފައިވާ އެންމެ ވަރުގަދަ އެއް އިންޒާރެވެ.

އުތުރު ކޮރެއާގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، ކިމް މިހެން ވިދާޅުވީ އެކުވެރި ގައުމުތަކަށް އެހީތެރިކަން ފޯރުކޮށްދިނުމާ ގުޅޭގޮތުން ބޭއްވި އަސްކަރީ ބައްދަލުވުމެއްގައެވެ. އޭނާ އިތުރަށް ވިދާޅުވި ގޮތުގައި، އެމެރިކާއާއި އިސްރާއީލުން އީރާނާ ދެކޮޅަށް ހިންގާ އުދުވާނުތަކަކީ ބަލައިގަނެވޭނެ ކަންކަމެއް ނޫނެވެ. އަދި އުތުރު ކޮރެއާގެ ޒަމާނީ އަސްކަރީ އާލާތްތަކަކީ ކޮންމެ ފަދަ ވަގުތެއްގައިވެސް ބޭނުންކުރަން ތައްޔާރަށް ހުރި ތަކެތިކަން އޭނާ ފާހަގަކުރެއްވިއެވެ.

މި ބަޔާނާ ގުޅިގެން ދުނިޔޭގެ ބޮޑެތި ބާރުތަކުން ދަނީ ކަންބޮޑުވުން ފާޅުކުރަމުންނެވެ. ވަކިން ހާއްސަކޮށް، އީރާނާއި އުތުރު ކޮރެއާއާ ދެމެދު އޮންނަ އަސްކަރީ ގުޅުން ބަދަހިވަމުން ދިއުމަކީ ސަރަހައްދީ ހަމަޖެހުމަށް އޮތް ބޮޑު ނުރައްކަލެއްގެ ގޮތުގައި މަސްރަޙު ދިރާސާކުރާ ފަރާތްތަކުން ސިފަކުރެއެވެ. ނަމަވެސް، މިހާތަނަށް އީރާނުން މިކަމާ ގުޅޭގޮތުން ރަސްމީކޮށް އެއްޗެއް ބުނެފައެއް ނުވެއެވެ.