ފެޓީ ލިވާ ނުވަތަ ފުރަމޭގައި ސަރުބީ ޖެހުމަކީ މިހާރަކަށް އައިސް ދިވެހިންގެ ތެރޭގައި ވެސް ވަރަށް އާންމުވަމުންދާ ސިއްހީ މައްސަލައެކެވެ. ދިރިއުޅުމުގެ އާދަކާދަތަކާއި ކެއިންބުއިމަށް އަންނަ ބަދަލުތަކުގެ ސަބަބުން މި ބަލި ޖެހޭ މީހުންގެ އަދަދު ދަނީ އިތުރުވަމުންނެވެ. ގިނަ ބައެއްގެ ހިތުގައި އުފެދޭ އެންމެ ބޮޑު ސުވާލަކީ، އެއްފަހަރު ފުރަމޭގައި ސަރުބީ ޖެހުމުން އެކަން އަލުން ރަނގަޅު ކުރެވިދާނެތޯއެވެ؟ ސިއްހީ މާހިރުން ބުނާ ގޮތުގައި މީގެ ޖަވާބަކީ "އާނއެކޭ" އެވެ. ނަމަވެސް އެއީ ބަލީގެ ކުރީކޮޅުގައި ދެނެގަނެވި، އެކަށީގެންވާ ފިޔަވަޅުތައް އަޅައިފިނަމައެވެ.

ފުރަމޭގައި ސަރުބީ ޖެހުމަކީ ފުރަމޭގެ ސެލްތަކުގައި އިތުރަށް ސަރުބީ ޖަމާވުމެވެ. މިއީ މައިގަނޑު ގޮތެއްގައި ދެ ބަޔަކަށް ބަހާލެވޭ ބައްޔެކެވެ. އެއީ ރަނގަޅު ކެއިންބުއިމާއި ދިރިއުޅުމުގެ އާދަތަކާ ގުޅުންހުރި 'ނަން އަލްކޮހޯލިކް ފެޓީ ލިވާ ޑިޒީޒް' އާއި އަދި ބަނގުރަލުގެ ސަބަބުން ޖެހޭ ފެޓީ ލިވާ އެވެ. ސިއްހީ މާހިރުން ފާހަގަކުރާ ގޮތުގައި، ފުރަމޭގެ ސަރުބީ ވިރުވައިލުމަކީ ކުރެވިދާނެ ކަމެކެވެ. އެކަން ކުރުމަށްޓަކައި އެންމެ މުހިންމީ ބަލި ހުރި މިންވަރު ދެނެގަތުމެވެ. މިގޮތުން ލިވާ ފަންކްޝަން ޓެސްޓް، އަލްޓްރާސައުންޑް ސްކޭން، އަދި ފައިބްރޯސްކޭން ފަދަ ޓެސްޓުތަކުގެ އެހީގައި ފުރަމޭގެ ދުޅަހެޔޮކަން ހުރި މިންވަރު ބެލެވިދާނެއެވެ.

ފެޓީ ލިވާ ރިވާސް ކުރުމަށް ނުވަތަ އަލުން ރަނގަޅު ކުރުމަށްޓަކައި އެންމެ ފުރަތަމަ ކުރަންޖެހޭ ކަމަކީ ހަށިގަނޑުގެ ބަރުދަން ލުއިކުރުމެވެ. ދިރާސާތަކުން ދައްކާގޮތުގައި ހަށިގަނޑުގެ ބަރުދަނުން 7 އިންސައްތައާއި 10 އިންސައްތައާ ދެމެދުގެ މިންވަރެއް ލުއިކޮށްލުމުން ފުރަމޭގައި ހުންނަ ސަރުބީއާއި ދުޅަވުން ވަރަށް ބޮޑަށް ކުޑަވެގެންދެއެވެ. މީގެ އިތުރުން، ދުވާލަކު މަދުވެގެން 30 މިނެޓު ކަސްރަތު ކުރުމަކީ ފުރަމޭގައި ހުންނަ ސަރުބީ ވިރުވައިލުމަށް އެހީތެރިވެދޭނެ ކަމެކެވެ.

ކެއިންބުއިމަށް ގެންނަ ބަދަލަކީ މި ބަލިން ސަލާމަތްވުމަށް އޮތް އެންމެ ބޮޑު ތަޅުދަނޑިއެވެ. ހަކުރު ގިނަ ބުއިންތަކާއި، ފޮނި އެއްޗެހި، އަދި ފުށުގެ ބާވަތްތައް ބޭނުންކުރުން މަދުކުރަން ޖެހެއެވެ. އޭގެ ބަދަލުގައި ތަރުކާރީއާއި، މޭވާއާއި، ފައިބަރު ގިނަ ބާވަތްތައް ކެއުމުގައި ހިމަނަންވާނެއެވެ. ވަކިން ހާއްސަކޮށް، "ޕްރޮސެސްޑް ފުޑް" ނުވަތަ ތައްޔާރީ ކާނާ ބޭނުންކުރުން ހުއްޓާލުމަކީ ފުރަމޭގެ ދުޅަހެޔޮކަމަށް ކޮންމެހެން ކުރަންޖެހޭ ކަމެކެވެ.

ފެޓީ ލިވާ އަކީ ފަރުވާ ނުދެވިއްޖެނަމަ ފުރަމޭ ހަލާކުވެ ފުރަމޭގެ ކެންސަރަށް މަގުފަހިކުރުވާ ބައްޔެކެވެ. ނަމަވެސް، އަވަހަށް ބަލި ދެނެގަނެ، ހަކުރު ކޮންޓްރޯލްކޮށް، ދިރިއުޅުމުގެ ވައްޓަފާޅި ބަދަލުކޮށްފިނަމަ މިއީ މުޅިން ރަނގަޅު ކުރެވިދާނެ ބައްޔެކެވެ. ފުރަމޭއަކީ އަމިއްލައަށް އާލާވުމުގެ ގާބިލުކަން ލިބިފައިވާ ގުނަވަނަކަށް ވުމުން، އަޅުގަނޑުމެން ދޭ ސަމާލުކަމުގެ ސަބަބުން އަލުން ދުޅަހެޔޮ ފުރަމޭއެއް ހޯދުމުގެ ފުރުސަތު އޮވެއެވެ.