ކުޅިވަރުގެ ދާއިރާއިން ކުރިއަށްދާ އެތުލީޓުންނަށް ހާއްސަކޮށްގެން ހިންގާ "އަރުތަ" ސްކޮލާޝިޕް ޕްރޮގްރާމްގެ ދަށުން، އެތުލީޓުންގެ ތަމްރީނުތަކުގެ އިތުރުން ކިޔެވުމުގެ ހަރަދުތައް ވެސް ސަރުކާރުން ހަމަޖައްސައިދޭ ގޮތަށް ބަދަލުތަކެއް ގެނެސްފިއެވެ.

ރައީސް އޮފީހުގައި ބޭއްވި ނޫސްވެރިންގެ ބަލްދަލުވުމުގައި ވާހަކަފުޅު ދައްކަވަމުން ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިއު ވިދާޅުވީ، މީގެ ކުރިން "އަރުތަ" ޕްރޮގްރާމްގެ ދަށުން ހަމަޖައްސައިދެމުން ދިޔައީ ހަމައެކަނި ހައި ޕާފޯމަންސް ތަމްރީނުތަކުގެ ހަރަދުތައް ކަމަށެވެ. ނަމަވެސް، ގެނެވުނު އާ ބަދަލާއެކު އެތުލީޓުންގެ ތައުލީމީ ހަރަދުތައް ވެސް މިހާރު މި ސްކޮލާޝިޕްގެ ތެރޭގައި ހިމެނިގެންދާނެ ކަމަށް ވަޒީރު ވިދާޅުވިއެވެ.

މި ޕްރޮގްރާމް ހިންގާނެ ގަވާއިދު މިހާރު ގެޒެޓްކޮށްފައިވާއިރު، އެތުލީޓުން ހޮވުމާއި ކަންކަން ނިންމުމަށްޓަކައި "އަރުތަ ކޮމިޓީ" އެއް އެކުލަވާލާފައިވާކަން ވެސް މިނިސްޓަރު ފާހަގަކުރެއްވިއެވެ. މި ބަދަލު ގެނައުމުގެ އެންމެ ބޮޑު މަގުސަދަކީ ކުޅިވަރުގައި މޮޅު ނަތީޖާ ހޯދާ ކުދިންނަށް، އެކުދިންގެ ކިޔެވުމަށް ބުރޫނާރާނެ ގޮތަކަށް ކުރިއަށްދިއުމުގެ ފުރުސަތު ފަހިކޮށްދިނުމެވެ. މިނިސްޓަރު ރާފިއު ވިދާޅުވި ގޮތުގައި، ރާއްޖޭގައި ކުޅިވަރު ކުޅޭ ކުދިންނަށް ވެސް ކިޔެވޭނެ ގޮތަށް ސްކޮލާޝިޕް ދޭން ޖެހެއެވެ.

"ރާއްޖޭގައި ކުދިން ކުޅިވަރު މޮޅަށް ކުޅެންވީ ކީއްވެތޯ؟ އެ ސުވާލަށް ޖަވާބުދިނުމުގެ ގޮތުން އަޅުގަނޑުމެން އެބަޖެހޭ ރާއްޖޭގައި ކުޅިވަރު ކުޅޭނެ ކުދިންނަށް ވެސް ކިޔެވޭނެ ގޮތަށް ސްކޮލަޝިޕް ދޭން،" ވަޒީރު ވިދާޅުވިއެވެ.

އާ އުސޫލުގެ ދަށުން، ގްރޭޑް 9 ނުވަތަ 10 އެއްގައި އުޅޭ ކުދިން ތަމްރީނަށް ރާއްޖޭން ބޭރަށް ނުވަތަ މާލެއަށް ބަދަލުވާން ޖެހުނު ކަމުގައިވިޔަސް، އެ ކުދިންގެ ކިޔެވުން މެދުނުކެނޑި ކުރިއަށްދާނެ އިންތިޒާމު ހަމަޖެހިގެންދާނެއެވެ.

މި ޕްރޮގްރާމްގެ ދަށުން ފުރުސަތު ހޯދުމަށް ބައެއް ކުޅިވަރު އެސޯސިއޭޝަންތަކުން މިހާރު ވެސް އެތުލީޓުންގެ ނަންތައް ހުށަހަޅާފައިވާ ކަމަށާއި، ބައެއް ކުދިންނަށް މިހާރު ވެސް މި ފުރުސަތު ދީފައިވާ ކަމަށް މިނިސްޓަރު ވިދާޅުވިއެވެ. މިއީ ރާއްޖޭގެ ކުޅިވަރުގެ ކުރިމަގަށް އެޅުނު ވަރަށް މުހިންމު ފިޔަވަޅެއްގެ ގޮތުގައި ވަޒީރު ވަނީ ސިފަކުރައްވާފައެވެ.