މިއަހަރުގެ ރޯދަމަހުގެ ފަހުދިހައިގެ ދުވަސްތަކުގެ ތެރެއިން ހަތަރު ދުވަހެއްގައި އައިޑީކާޑު ދޫކުރުމުގެ ހިދުމަތް ދިނުމަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) އިން ނިންމައިފިއެވެ.

ޑީއެންއާރުން މިއަދު ކުރި އިއުލާނެއްގައި ބުނެފައިވަނީ، ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވާ ރޯދަމަހުގެ ފަހުދިހައިގެ ދުވަސްތަކުގައި އައިޑީކާޑު ދޫކުރުމުގެ ހިދުމަތް ދިނުމަށް ވަކި ދުވަސްތަކަކާއި ގަޑިތަކެއް މިހާރު ކަނޑައަޅާފައިވާ ކަމަށެވެ.

އެ އިދާރާއިން ހާމަކުރި ގޮތުގައި އައިޑީކާޑު ދޫކުރުމުގެ ހިދުމަތް ދޭނީ މި ހިނގާ މާޗް މަހުގެ 11، 15، 17 އަދި 19 ވަނަ ދުވަހުއެވެ. މި ހަތަރު ދުވަހުވެސް ހިދުމަތް ދިނުމަށް ހަމަޖެހިފައިވަނީ ހެނދުނު 9:00 އިން ފެށިގެން މެންދުރުފަހު 1:00 އަށެވެ.

މާލެ ސަރަހައްދުގައި އައިޑީކާޑު ދޫކުރުމުގެ ހިދުމަތް ދޭނެ މަރުކަޒުތަކަކީ؛ ވެލާނާގޭގައި ހުންނަ ޑީއެންއާރުގެ ހެޑް އޮފީސް، ހުޅުމާލެ ފޭސް 1 ގައި ހުންނަ އުމަރު ޒާހިރު ބިލްޑިންގ، ހުޅުމާލެ ފޭސް 2 ގައި ހުންނަ ވިނަރެސް ޓަވަރު އަދި ވިލިމާލޭގައި ހުންނަ ޑީއެންއާރުގެ އޮފީހެވެ.

ރޯދަމަހުގެ ފަހުދިހައަކީ ސަރުކާރު ބަންދު ދުވަސްތަކެއްގެ ގޮތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ކުރިން ކަނޑައަޅުއްވާފައެވެ. މި ބަންދާއި އީދު ބަންދާ ގުޅިގެން، އަންނަ ހޯމަ ދުވަހުން ފެށިގެން މި މަހުގެ 21 ވަނަ ދުވަހާ ހަމައަށް ސަރުކާރުގެ އޮފީސްތައް ބަންދުވާނެއެވެ. މި ބޮޑު ބަންދަށްފަހު ސަރުކާރު އޮފީސްތައް އަލުން ހުޅުވުމަށް ހަމަޖެހިފައިވަނީ މި މަހުގެ 22 ވަނަ ދުވަހުއެވެ.

ޑީއެންއާރުން މިގޮތަށް ނިންމީ ސަރުކާރު ބަންދު ނަމަވެސް، އާންމު ރައްޔިތުންނަށް ކޮންމެހެން ބޭނުންވާ މި ހިދުމަތް މެދުނުކެނޑި ފޯރުކޮށްދިނުމުގެ މަގުސަދުގައެވެ.