ސަރުކާރުން ދަނޑުވެރިކަމަށް ޚާއްޞަކޮށްގެން ކުރިއަށްގެންދާ 'ދަނޑުވެރި ނަފާ' ލޯނު ޕްރޮގްރާމްގެ ދަށުން މިހާތަނަށް ޖުމްލަ 54 ފަރާތަކަށް 20،301،517 (ވިހި މިލިއަން ތިންލައްކަ އެއްހާސް ފަސްސަތޭކަ ސަތާރަ) ރުފިޔާގެ ލޯނު ދޫކޮށްފައިވާ ކަމަށް ދަނޑުވެރިކަމާއި ފަތިޖެހި މުދަލާ ބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި މި ލޯނުތައް ދޫކުރެވުނު ފަރާތްތަކުގެ ތަފްސީލް ހާމަކުރައްވަމުން ވަޒީރު ވިދާޅުވީ، މީގެ ތެރޭގައި 5 ކުންފުންޏަކާއި، 44 ފިރިހެނުން އަދި 5 އަންހެނުން ހިމެނޭ ކަމަށެވެ. އޭގެ އިތުރުންވެސް ވަޒީރު މިއަދު ވަނީ އެވުޒާރާއިން ކުރިއަށް ގެންދަވާ ބައެއް މަސައްކަތްތަކުގެ ތަފްސީލް މިއަދު މީޑިއާތަކަށް ދެއްވާފައެވެ.

ތަމްރީނާއި ފުޑް ސެކިއުރިޓީ

ވަޒީރު ވިދާޅުވީ، ދަނޑުވެރިކަމުގެ ދާއިރާއިން ފަރުދީ ފެންވަރުގައި ނަފާ ހޯދައިދިނުމަށް ފާއިތުވި 2 އަހަރު ތެރޭގައި 31 ރަށެއްގައި ތަމްރީނު ޕްރޮގްރާމްތައް ހިންގާފައިވާ ކަމަށެވެ.

މި ޕްރޮގްރާމްތަކުގައި 845 ފަރާތަކުން ބައިވެރިވެފައިވާއިރު، އޭގެ ތެރޭގައި 474 އަންހެނުން ހިމެނެއެވެ. އަދި ފުޑް ސެކިއުރިޓީ ޕްރޮގްރާމްގެ ދަށުން މިދިޔަ އަހަރު ށ. އަތޮޅުގެ 4 ރަށަކަށް 721 ގަސް ހަދިޔާކޮށްފައިވާއިރު، މިއަހަރު މި ޕްރޮގްރާމް ކުރިއަށްދާނީ ނ. އަތޮޅުގައެވެ.

ބަލިތަކާއި ސޫފާސޫފިން ދަނޑުތައް ރައްކާތެރިކުރުން

ދޫނިސޫފާސޫފީގެ ސަބަބުން ދަނޑުތަކަށް ލިބޭ ގެއްލުން ކުޑަކުރުމަށް 31 ރަށަކަށް ފަންނީ އެހީތެރިކަން ވަނީ ފޯރުކޮށްދީފައެވެ.

ވަޒީރު ވިދާޅުވީ، ކާށިތަކަށް ޖެހޭ ބަލިތައް ކޮންޓްރޯލް ކުރުމަށް ޗައިނާގެ 'ކަޓާސް' ޓީމަކާއެކު ދިރާސާތަކެއް ކުރެވިފައިވާ ކަމަށެވެ. އަދި ދަނޑުވެރިކަމުގެ ދާއިރާއިން ކުރެވޭ ދިރާސާތަކަށް ފުވައްމުލައް ސިޓީގައި މިހާރު ވަނީ ގައުމީ ލެބޯޓަރީއެއް ގާއިމްކޮށްފައެވެ.

ރަށްރަށުގައި ހިންގޭ ބޮޑެތި މަޝްރޫޢުތައް

ވަޒީރު ވިދާޅުވީ، ރައީސުލްޖުމްހޫރިއްޔާގެ ވަޢުދުފުޅުގެ ދަށުން ގއ. ކޮނޑޭ އަދި ކ. ކާށިދޫގައި ދަނޑުވެރިކަމުގެ ބޮޑު މަޝްރޫޢުތަކެއް ހިންގުމަށް ވަނީ ހުޅުވާލާފައި ކަމަށެވެ.

މީގެ އިތުރުން އދ. އަރިއަދޫ ގައި ރުއް އާލާކުރާ މައި މަރުކަޒެއްގެ ގޮތުގައި ތަރައްޤީކުރުމާއި، އއ. ތޮއްޑޫ އަދި ހދ. ނޮޅިވަރަމްގައި ޕީ.ޕީ.ޕީ މޮޑެލްގެ ދަށުން ދަނޑުވެރިކަމުގެ މަޝްރޫޢުތައް ފެށުމާއި، ވާޓިކަލް ފާމިންގެ މަސަކަތް ޅ. ނައިފަރު، އއ. މަތިވެރި އަދި ތ. ކިނބިދޫގައި ކުރިއަށް ދާކަމަށް ވަޒީރު ވިދާޅުވިއެވެ.

އާ އުފެއްދުންތަކާއި މާރުކޭޓު

މި ދާއިރާއިން ވަޒީރު ފާހަގަ ކުރެއްވީ، ދަނޑުވެރިން އުފައްދާ ތަކެތި ބާޒާރަށް ނެރުމަށް 'އެގްރޮނެޓް' އާއެކު މަސައްކަތް ކުރަމުންދާއިރު، ނޯތު ހާބަރުގައި ވަގުތީ މާރުކޭޓެއް ހުޅުވައި، 'އެމްގެޕް' ސެޓިފައިޑް ތަކެތި ވިއްކަން ފަށާފައިވުމެވެ. މީގެ އިތުރުން މުރަނގަ އާލާކޮށް، އޭގެއިން އަގު އެއްކުރި ތަކެތި އުފެއްދުމުގެ ޕްރޮގްރާމެއްވެސް ވަނީ ފަށާފައެވެ.

ދާއިރާގެ ކުރިމަގު

އޭގެ އިތުރަށް ވަޒީރު މިއަދު ފާހަގަކުރެއްވީ، ދަނޑުވެރިކަމުގެ ދާއިރާގެ ފުރަތަމަ ސެންސަސް މިއަހަރު ނެގުމަށް ހަމަޖެހިފައިވާ ކަމަށެވެ. އަދި ރ. ކިނޮޅަހުގައި ކޮމާޝަލް ޕޯލްޓްރީ ފާމެއް ގާއިމްކުރުމުގެ މަސައްކަތްވެސް މިއަހަރު ފެށޭނެއެވެ.

މީގެ އިތުރުން، ހުޅުމާލޭގައި ގާއިމްކުރި 'އޮޅުހިޔާ' ވެޓެރިނަރީ ކްލިނިކްގައި މިހާތަނަށް 352 ބުޅާ ގެންދެވި، އޭގެ ތެރެއިން 60 ބުޅާ ނިއުޓަރ ކުރެވިފައިވާ ކަމަށްވެސް ވަޒީރު ވިދާޅުވިއެވެ.