އިޒްރޭލުގެ ރައްޔިތުންގެ ތެރެއިން ފުރާނަ ސަލާމަތްކުރަން ބޭނުންވާ މީހުން ވަގުތުން އެ ގައުމު ދޫކޮށް ދިއުމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ވަނީ ވަރުގަދަ އިންޒާރެއް ދީފައެވެ. އެ ޖަމާއަތުން ބުނެފައިވާ ގޮތުގައި ކުރިއަށް އޮތީ ވަރަށް ނުރައްކާތެރި އަދި ފަނާކުރަނިވި ހަނގުރާމައެކެވެ.

އައިއާރުޖީސީން ނެރުނު ބަޔާނެއްގައި އިޒްރޭލުގެ އަސްކަރީ މަރުކަޒުތަކާއި، ސަރުކާރުގެ އިދާރާތަކާއި، އަދި ސަލާމަތީ މަރުކަޒުތަކާ ވީހާވެސް ދުރަށް ދިއުމަށް އެ ގައުމުގައި ދިރިއުޅޭ މީހުންނަށް ވަނީ އިލްތިމާސްކޮށްފައެވެ.

އީރާނުން ބުނާ ގޮތުގައި މި ހަނގުރާމައިގެ ނަތީޖާ ވަރަށް ބިރުވެރިވާނެ ކަމަށާއި، މި ކަން ނިމިގެންދާނީ އިޒްރޭލު އެއްކޮށް ސުންނާފަތިވުމުން ކަމަށެވެ. މީގެ އިތުރުން، އައިއާރުޖީސީން ބުނެފައިވަނީ އެ ޖަމާއަތުން ފޮނުވާލި 'ޚައިބަރު' މިސައިލްތަކުން ތަލް އަވީވްގައި ހުރި ސަރުކާރުގެ އިމާރާތްތަކަށާއި، ހައިފާ އަދި އިރުމަތީ ގުދުސްގައި ހުރި އަސްކަރީ މަރުކަޒުތަކަށް އަމާޒުކޮށްފައިވާ ކަމަށެވެ.

މަސްރަހު ދިރާސާކުރާ ފަރާތްތަކުން ބުނާ ގޮތުގައި އީރާނުން އޮތީ މި ހަނގުރާމައަށް ފުރިހަމައަށް ތައްޔާރުވެގެންނެވެ. އަދި މިއީ އިޒްރޭލަށް ކުރިމަތިވާނެ އެންމެ ނުރައްކާތެރި ދަނޑިވަޅު ކަމުގައިވެސް އެ ފަރާތްތަކުން ފާހަގަކުރެއެވެ. އީރާނުގެ ބަޔާނުގައި ބުނެފައިވަނީ އިޒްރޭލުގައި މިހާރު ގުގުމަމުންދާ އިންޒާރުގެ ރަނގަބީލުތަކުގެ އަޑު ދެން ދުވަހަކުވެސް ކެނޑިގެން ނުދާނެ ކަމަށެވެ.