އީރާނުގެ ރޫހާނީ ލީޑަރު އާޔަތުުﷲ އަލީ ޚާމަނާއީގެ މަގާމަށް އޭނާގެ ދަރިކަލުން މުޖްތަބާ ޚާމަނާއީ އައްޔަންކުރަން ނިންމާފައިވާ ކަމަށް ބޭރުގެ މީޑިއާތަކުން ރިޕޯޓްކުރަން ފަށައިފިއެވެ.

އިސްރާއީލުގެ "ވައިނެޓް" ނިއުސްއިން ބުނެފައިވާ ގޮތުގައި، އިސްރާއީލުގެ އިސް އޮފިޝަލުން މިހާރު އަންދާޒާކުރަނީ އީރާނުން ރަސްމީކޮށް މުޖްތަބާ އެ މަގާމަށް ހަމަޖެއްސިކަން ވަރަށް އަވަހަށް އިއުލާންކުރާނެ ކަމަށެވެ. މިއީ އީރާނުގެ ވެރިކަމުގެ ނިޒާމަށް އަންނާނެ ބޮޑު ބަދަލެއްގެ ގޮތުގައި މަސްރަހު ދިރާސާކުރާ ފަރާތްތަކުން ދެކެއެވެ.

މީގެ އިތުރުން، "އީރާން އިންޓަނޭޝަނަލް" އިން ރިޕޯޓްކޮށްފައިވާ ގޮތުގައި، އީރާނުގެ އެސެމްބްލީ އޮފް އެކްސްޕާޓްސް އިން މިހާރު ވަނީ މުޖްތަބާ ޚާމަނާއީ އީރާނުގެ އައު ލީޑަރުގެ ގޮތުގައި އިންތިޚާބުކޮށްފައެވެ.

މި ނިންމުން ނިންމާފައިވަނީ އީރާނުގެ ވަރުގަދަ އަސްކަރީ ބާރު ކަމަށްވާ ރިވޮލިއުޝަނަރީ ގާޑްސް ގެ ބޮޑު ނުފޫޒަކާއި މަޖުބޫރުކުރުންތަކެއްގެ ދަށުން ކަމަށްވެސް އެ ނޫހުން ބުނެފައިވެއެވެ. މުޖްތަބާ އަކީ ކުރިންވެސް އީރާނުގެ ސިޔާސީ އަދި އަސްކަރީ ކަންކަމުގައި ނުފޫޒުގަދަ ބޭފުޅެއްގެ ގޮތުގައި ފާހަގަކުރެވިފައިވާ ބޭފުޅެކެވެ.

މި ޚަބަރުތައް ފެންމަތިވެފައި މިވަނީ، އީރާނުގެ ރޫހާނީ ލީޑަރު އަލީ ޚާމަނާއީ އަވަހާރަވެފައިވާ ކަމަށް ބުނެ އެކި ރިޕޯޓްތައް ފެތުރެމުންދާ ދަނޑިވަޅެއްގައެވެ.

މުޖްތަބާ ޚާމަނާއީ ވެރިކަމަށް އައުމަކީ އީރާނުގެ ރޫހާނީ ލީޑަރުކަން އާއިލީ ވެރިކަމަކަށް ބަދަލުވެގެންދާނެ ކަމެއް ކަމަށް ބައެއް ފަރާތްތަކުން ބުނާއިރު، މިއީ އެ ގައުމުގެ ދާޚިލީ މަސްރަހަށް ބޮޑެތި ލޮޅުންތަކެއް އަރާފާނެ ކަމެއް ކަމަށްވެސް ބެލެވެއެވެ. ނަމަވެސް އީރާނުގެ ސަރުކާރުން މިކަމާ ގުޅޭގޮތުން އަދި ރަސްމީ ބަހެއް ބުނެފައެއް ނުވެއެވެ.