އިރާނުގެ ކުރީގެ ރައީސް މަހްމޫދު އަހްމަދީ ނެޖާދު އަވަހާރަކޮށްލުމަށް ދިން ވަރުގަދަ ހަމަލާއަކުން ސަލާމަތްވެވަޑައިގެންފި ކަމަށް ބައިނަލްއަގުވާމީ މީޑިއާތަކުން ރިޕޯޓުކޮށްފިއެވެ.

މި ހަމަލާއަކީ އިސްރާއީލާއި އެމެރިކާއިން އިރާނުގެ އިސް ވެރިންނަށް އަމާޒުކޮށް ދިން ވައިގެ ހަމަލާތަކުގެ ތެރެއިން ދެވުނު ހަމަލާއެއް ކަމަށް މައުލޫމާތު ލިބެއެވެ.

މި ހަމަލާގައި އަހްމަދީ ނެޖާދުގެ ސަލާމަތީ ކަންކަން ބަލަހައްޓާ ޓީމުތައް ތިބޭ އިމާރާތަށް ބޮޑެތި ގެއްލުންތަކެއް ލިބިފައިވާއިރު، އޭނާގެ ތިން ބޮޑީގާޑަކު މަރުވެފައިވާ ކަމަށް ރިޕޯޓުތައް ބުނެއެވެ. ނަމަވެސް، ހަމަލާ އަމާޒުވި ވަގުތު އަހްމަދީ ނެޖާދު ހުންނެވި އިމާރާތަށް ގެއްލުމެއް ނުލިބި، އޭނާ ވަނީ އެއްވެސް އަނިޔާއެއް ނުލިބި ސަލާމަތްވެވަޑައިގެންފައެވެ.

އަހްމަދީ ނެޖާދުގެ ގާތް ފަރާތްތަކުން ހާމަކޮށްފައިވާ ގޮތުގައި، މި ހަމަލާއަށްފަހު އޭނާގެ ރައްކާތެރިކަން ކަށަވަރު ކުރުމަށްޓަކައި މިހާރު ވަނީ ވަރުގަދަ ސަލާމަތީ ފިޔަވަޅުތަކާއެކު ރައްކާތެރި ތަނަކަށް ބަދަލުކުރެވިފައެވެ. ކުރިން އޭނާ އަވަހާރަވި ކަމަށް ފެތުރުނު ޚަބަރުތަކަކީ ދޮގު ޚަބަރުތަކެއް ކަމަށާއި، މިހާރު އޭނާގެ ހާލު ރަނގަޅު ކަމަށްވެސް އެ ފަރާތްތަކުން ކަށަވަރުކޮށްދެއެވެ.