އީރާނުގެ ކުރީގެ ރައީސް މަހުމޫދު އަހުމަދީނަޖާދުގެ ދައުރުގައި، ދިވެހި ސަރުކާރުގެ މިނިސްޓަރެއްގެ ހައިސިއްޔަތުން އެމަނިކުފާނާ ބައްދަލުކުރެއްވި ކަމަށާއި، އޭރުވެސް އީރާނުން އޮތީ ރާއްޖެއަށް ބޭނުންވާ އަސްކަރީ ސާމާނާއި، ހެޔޮ އަގުގައި ތެޔޮ ފޯރުކޮށްދިނުމުގެ އިތުރުން ރާއްޖެއިން އެދުނު ކޮންމެ ކަމެއްގައި އެހީތެރިވާން ތައްޔާރަށް ކަމަށް ކުރީގެ މިނިސްޓަރު އިލްޔާސް ހުސައިން އިބްރާހީމް ވިދާޅުވެއްޖެއެވެ.

އެކްސްގައި ކުުރެއްވި ޕޯސްޓެއްގައި އިލްޔާސް ވިދާޅުވީ، ފުލުހުންނަށް ބޭނުންވާ ނަން-ލީތަލް (މީހުން މަރުނުވާ ފަދަ) ހަތިޔާރު ހަދިޔާކުރަން އީރާނުން ނިންމި ކަމަށާއި، އެކަމާ ގުޅޭ ލިޔުންތައް އޭރުގެ ޑިފެންސް މިނިސްޓަރަށް އެރުވި ނަމަވެސް، އެމެރިކާދެކެ ގަންނަ ބިރުން އީރާނާ ގުޅުން އުފައްދަން ސަރުކާރުން ފަސްޖެހުނީ ކަމަށެވެ.

އިލްޔާސް އިތުރަށް ފާހަގަކުރެއްވި ގޮތުގައި، ދިވެހި ސަރުކާރުތަކުން ގަސްދުގައި އީރާނާ ފޭއަށް ޖެހެނީ އެމެރިކާ ރުއްސުމުގެ ބޭނުމުގައެވެ.

ރައީސް މައުމޫނުގެ ދައުރުގައި އީރާނުގެ ބޮޑު ރަސްމިއްޔާތަކަށް ވަޑައިގަތުމަށް ލިބުނު ދައުވަތަކާ ގުޅިގެން ރައީސް އޮފީހުގެ ހުއްދައަށް އެދުމުން، އެ ވަގުތު ސަރުކާރުގެ މުވައްޒަފަކު އީރާނަށް ދަތުރުކުރުމަކީ ރައީސުލްޖުމްހޫރިއްޔާއަށް ފެނިވަޑައިގަންނަވާ ކަމެއް ނޫން ކަމަށް ރަސްމީކޮށް ޖަވާބު ދެއްވާފައިވާ ކަމަށް އޭނާ ވިދާޅުވިއެވެ. މިއީ ދިވެހި ވެރިންގެ ކިބައިގައި ހުރި "ފިނޑިކަމާއި އިސްތިއުމާރީ ނުފޫޒުގެ" ނަތީޖާ ކަމަށް އިލްޔާސް ސިފަކުރެއްވިއެވެ.

ކުރީގެ ރައީސް މުހައްމަދު ނަޝީދަށް ވަރުގަދަ ފާޑުކިޔުންތަކެއް އަމާޒުކުރައްވަމުން އިލްޔާސް ވިދާޅުވީ، އީރާނަކީ އަވަށްޓެރި ސްރީލަންކާގެ އިތުރުން ދިވެހި ރައްޔިތުންގެ ވެސް ގާތް އެކުވެރިއެއް ކަމަށެވެ. ނަމަވެސް، ދިވެހި ވެރިން އެމެރިކާގެ ދަށުވެފައި ތިބޭ މިންވަރުން، އިސްލާމީ އަޚު ގައުމެއް ކަމަށްވާ އީރާނާ އެކު ރަހުމަތްތެރިކަން ބަދަހިކުރަން ބިރުގަންނަނީ ކަމަށާއި، މިއީ ހަގީގަތް ކަމަށް ވިދާޅުވެ އިލްޔާސް ވަނީ ކަންބޮޑުވުން ފާޅުކުރައްވާފައެވެ.