ރިޔާސީ އިންތިޚާބުގެ ކެމްޕޭނު ތެރޭގައި މަސްވެރިންގެ ވޯޓު ހޯދުމަށްޓަކައި، މަސް ގަންނަ އަގު 20 ރުފިޔާއަށްވުރެ ދަށްނުކުރާނެ ކަމަށް ރައީސް ޑރ. މުޙައްމަދު މުއިއްޒު ވެވަޑައިގެންނެވި ވަޢުދު، ވެރިކަމަށް 3 އަހަރު އަހަރުވެގެންދާއިރުވެސް ނުފުއްދި، މިހާރު ސަރުކާރުގެ ރާގު މުޅިން ބަދަލުވެއްޖެއެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ފިޝަރީޒް މިނިސްޓަރު އަޙްމަދު ޝިޔާމް ދެއްކެވި ވާހަކަފުޅުތަކުން އެނގިގެންދަނީ، ސީދާ މަހުގެ އަގު ބޮޑުކުރުމުގެ ބަދަލުގައި، އެހެން ކަންކަމުގެ ތެރެއިން މަސްވެރިންނަށް "ލުޔެއް" ދޭކަމަށް ދައްކައިގެން އަސްލު ވަޢުދުން ރެކެން މަސައްކަތް ކުރަމުންދާ ކަމެވެ. މިނިސްޓަރު ވިދާޅުވި ގޮތުގައި، ތެލުގެ އަގު ހެޔޮކުރުމުން މަސްވެރިންނަށް ލިބޭ އާމްދަނީ އިތުރުވާނެ ކަމަށާއި، އެހެންކަމުން މަހުގެ އަގު ސީދާ 20 ރުފިޔާއަށް ނުޖެހުނަސް ހާސިލުވަނީ "އެއް ކަމެއް" ކަމަށް ބުނެ، މަސްވެރިންގެ ލޮލުގައި އަނދުން އެޅުވުމަށް ވަނީ މަސައްކަތް ކުރައްވާފައެވެ.

މީގެ އިތުރުން، މިނިސްޓަރު ޝިޔާމްގެ ވާހަކަފުޅުތަކުން ސަރުކާރުގެ ނާޤާބިލުކަން އިތުރަށް ހާމަވެގެން ގޮސްފައިވެއެވެ. މިފްކޯ ހަރުދަނާ ކުރުމުގެ ނަމުގައި ދައްކާ ހުސް ވާހަކަތަކުގެ ތެރެއިން، މަސްވެރިން ކިރުވާ މަހަށް ބަރާބަރަށް ފައިސާ ދިނުމަކީވެސް މިހާރު ބޮޑު ކާމިޔާބީއެއްގެ ގޮތުގައި ސިފަކުރަން ޖެހުމަކީ މަސްވެރި ސިނާއަތް މިއަދު ވެއްޓިފައިވާ އަނދަވަޅުގެ ބޮޑުކަން ހާމަކޮށްދޭ ކަމެކެވެ.

އޭޕްރީލް މަހުގެ ނިޔަލަށް ކޮންމެ ރަށަކުން އެސްޓީއޯ ރޭޓުގައި ތެޔޮ ލިބޭނެ ކަމަށް ބުނެ އަނެއްކާވެސް އާ ތާރީޚުތަކެއް ދީފައިވާއިރު، މިއީ މަސްވެރިން ކުރަމުންދާ އިހުތިޖާޖުތަކާއި ފާޅުކުރަމުންދާ ނުރުހުންތައް ފިނިކުރުމަށްޓަކައި ޖަހާ ސަކަރާތެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.

ވަޢުދުވީ މަހުގެ އަގު ބޮޑުކުރަން ކަމަށްވާއިރު، އެކަން ނުކޮށް ތެލުގެ އަގުގެ ވާހަކަ ދެއްކުމަކީ މަސްވެރިންނަށް ވެފައިވާ ވަޢުދަށް ސަރުކާރުން ފާޅުގައި ކުރި މަލާމާތެކެވެ.