"ގެދޮރުވެރިޔާ" މަޝްރޫއުގެ ދަށުން ދޫކުރާ ފްލެޓްތަކުގެ ލިސްޓުން ޝަރުތު ހަމަނުވާ ފަރާތްތައް އުނިކުރުމުގެ މަސައްކަތް ސަރުކާރުން ކުރިއަށްގެންދާ ކަމަށާއި، ނަމަވެސް މިހާތަނަށް އުނިވެފައިވަނީ ކިހާ އަދަދެއްގެ ބައެއްކަން ސީދާ އެނގިވަޑައިނުގަންނަވާ ކަމަށް ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބު ވިދާޅުވެއްޖެއެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރ ވިދާޅުވީ، ސަރުކާރުގެ އަމާޒަކީ ކުރީ ސަރުކާރުން އެކުލަވާލި ލިސްޓާ އެއްގޮތަށް ފްލެޓްތައް ހަވާލުކުރުން ކަމަށާއި، އުނިވެގެންދާނީ ހަމައެކަނި ޝަރުތު ހަމަނުވާ ފަރާތްތައް އެކަނި ކަމަށެވެ.

މިނިސްޓަރ އިތުރަށް ބަޔާންކުރެއްވި ގޮތުގައި، މިހާރު ފްލެޓްތައް ހަވާލުކުރުމުގެ މަސައްކަތް ކުރިއަށްދަނީ ކުރީ ސަރުކާރުން އާންމުކުރި ލިސްޓުގައި ފްލެޓް ލިބޭނެ ކަމަށް ކަނޑައަޅާފައިވާ ފަރާތްތަކަށެވެ. އަދި ކަނޑައެޅިފައިވާ ވަކި މިންވަރަކަށްވުރެ މަދުން ޕޮއިންޓް ލިބިފައިވާ އެއްވެސް ފަރާތެއް ލިސްޓުގައި ހިމެނިފައި ނުވާނެ ކަމުގެ ޔަގީންކަން ދެއްވަމުން މިނިސްޓަރ ވިދާޅުވީ، 76 އަށްވުރެ މަތިން ޕޮއިންޓް ލިބުނު ފަރާތްތަކަށްވެސް ފްލެޓް ނުލިބި ހުރުމާއެކު، ޝަރުތު ހަމަނުވާ ފަރާތްތައް އުނިކުރުމަކީ މުހިންމު ކަމެއް ކަމަށެވެ.

ފްލެޓް ހުރި އަދަދަށްވުރެ ޝަރުތު ހަމަވާ މީހުން ގިނަވުމަކީ ބައެއް ފަރާތްތައް ބާކީވުމަށް ދިމާވާ ސަބަބެއް ކަމަށްވެސް އެމަނިކުފާނު ފާހަގަކުރެއްވިއެވެ.

ޝަރުތު ހަމަނުވެގެން ލިސްޓުން އުނިވި މީހުންގެ ސީދާ އަދަދާ ގުޅޭގޮތުން ނޫސްވެރިން ކުރި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ، އެ އަދަދުތައް އިތުރަށް ޗެކްކުރެއްވުމަށްފަހު ފަހުން ހާމަކުރައްވާނެ ކަމަށެވެ.

މީގެ އިތުރުން، ޝަރުތު ހަމަނުވެގެން ބައެއް ފަރާތްތަކުގެ ފްލެޓް ކެންސަލްވި ނަމަވެސް، މި ސަރުކާރުން މުޅި ލިސްޓަށް ބަދަލު ގެނައުމުގެ ވިސްނުމެއް ނުގެންގުޅޭތީ، އައު ލިސްޓެއް އިއުލާނުކުރަން ނުޖެހޭނެ ކަމަށްވެސް މިނިސްޓަރ މުއްތަލިބު ވިދާޅުވިއެވެ. ފާހަގަކޮށްލެވޭ ގޮތުގައި މީގެ ކުރިންވެސް މި ސުވާލު މިނިސްޓަރަށް އަމާޒުވެފައިވާއިރު، އޭރުވެސް ވިދާޅުވެފައިވަނީ އެކަން ސާފުކުރައްވާނެ ކަމަށެވެ.