އިންޑިއާ ކަނޑުގައި ދަތުރުކުރަމުންދިޔަ އީރާނު ނޭވީގެ "އައި.އާރު.އައި.އެސް ދެނާ" މަނަވަރު، އެމެރިކާގެ ސަބްމެރިން ހަމަލާއަކަށްފަހު އަޑިއަށްދާތީ ފޮނުވި އެހީއަށް އެދޭ ސިގްނަލްތަކަށް ރާއްޖޭގެ ކޯސްޓްގާޑުން އިޖާބަދީފައި ނުވާތީ އާންމުންގެ ބޮޑެތި ފާޑުކިޔުންތަކެއް އަމާޒުވާން ފަށައިފިއެވެ.

ސްރީލަންކާގެ ގާލީއާ ދިމާލުން ދެކުނަށް ގާތްގަނޑަކަށް 40 ނޯޓިކަލް މޭލު ބޭރުން ހިނގި މި ހާދިސާގައި، އިންޑިއާގެ ކޯސްޓްގާޑާއި ރާއްޖޭގެ ކޯސްޓްގާޑުންވެސް އެހީތެރިކަން ފޯރުކޮށްދީފައި ނުވާކަމަށް ރިޕޯޓުތައް ބުނެއެވެ. މި ސަރަހައްދަކީ ރާއްޖޭގެ ސަރަހައްދާ ކައިރި، އަދި ކޯސްޓްގާޑުގެ އުޅަނދުފަހަރަށް ފަސޭހައިން ދެވޭނެ ހިސާބަކަށް ވީއިރު، އިންސާނީ އެހީތެރިކަން ފޯރުކޮށްދިނުމުގައި އިހުމާލުވެފައިވާ ކަމަށް ބުނެ ސޯޝަލް މީޑިއާގައި ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.

މި ހާދިސާ ހިނގާފައިވަނީ އެމެރިކާއާއި އިސްރާއީލުން ގުޅިގެން އީރާނަށް ދެމުންދާ ވަރުގަދަ ހަމަލާތަކުގެ ތެރެއިން، "އޮޕަރޭޝަން އެޕިކް ފިއުރީ" ގެ ދަށުން އެމެރިކާގެ ސަބްމެރިންއަކުން ދިން ޓޯޕިޑޯ ހަމަލާއެއްގައެވެ. 180 މީހުންގެ ކްރޫއަކާއެކު ދަތުރުކުރި މި މަނަވަރު އަޑިއަށް ދިޔައިރު، ސްރީލަންކާގެ ނޭވީން ވަނީ ހާލުގައި ޖެހުނު 32 މީހަކު ސަލާމަތްކޮށްފައެވެ.

ނަމަވެސް 100 އަށްވުރެ ގިނަ ފަޅުވެރިން އަދިވެސް ވީނުވީއެއް ނޭނގި ގެއްލިފައިވާއިރު، އަވަށްޓެރި ގައުމުތަކުން މިފަދަ ނުރައްކާތެރި ދަނޑިވަޅެއްގައި "ހަނގުރާމައިގެ ސިޔާސީ ނުފޫޒަށް" ބަލައި އެހީތެރިކަން ފޯރުކޮށްނުދިނުމަކީ ބައިނަލްއަގުވާމީ ކަނޑުގެ ގާނޫނުތަކާ ހިލާފު ކަމެއްގެ ގޮތުގައި ގިނަ ފަރާތްތަކުން ސިފަކުރެއެވެ. މި ހާދިސާއާއެކު އިންޑިއާ ކަނޑުގެ ސަލާމަތީ މަސްރަހު ވަނީ އިންތިހާއަށް ނުތަނަވަސްވެފައެވެ.