ކުޑަކުދިންނަށް ޖިންސީ ގޯނާކޮށް، "ސެކްސް ޓްރެފިކިން" ގެ ބޮޑެތި ކުށްތަކެއް ސާބިތުވެފައިވާ އެމެރިކާގެ މަހުޖަނު ޖެފްރީ އެޕްސްޓީންއާ އެކު ކުރީގެ ރައީސް ޑރ. މުހައްމަދު ވަހީދު ބޭއްވެވި ގުޅުމުގެ މައްސަލައިގައި މިހާތަނަށް އެއްވެސް ޖިނާއީ ތަހުގީގެއް ހިންގަމުން ނުދާ ކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެއެވެ.

މިއަދު ހޯމް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ނޫސްވެރިން ކުރި ސުވާލުތަކަށް ޖަވާބު ދެއްވަމުން މިނިސްޓަރު އިހުސާން ވިދާޅުވީ، "އެޕްސްޓީން ފައިލްސް" އާ ގުޅޭ އެއްވެސް މައްސަލައެއް ފުލުހުންގެ އިދާރާއަށް މިހާތަނަށް ހުށަހަޅާފައި ނުވާ ކަމަށެވެ. އަދި ފުލުހުންގެ ފަރާތުން އަމިއްލައަށް އިސްނަގައިގެން ވެސް އެފަދަ ތަހުގީގެއް މިހާތަނަށް ފަށާފައި ނުވާކަން މިނިސްޓަރު ފާހަގަކުރެއްވިއެވެ.

ނަމަވެސް، މިނިސްޓަރު ވިދާޅުވީ އެއްވެސް މީހަކު އިސްތިސްނާނުކޮށް، ޖިނާއީ ތުހުމަތެއް އޮތް ކަމަށް ގަބޫލުކުރެވޭ ހާލަތެއް މެދުވެރިވެއްޖެ ނަމަ ނުވަތަ މައްސަލައެއް ހުށަހެޅިއްޖެނަމަ، އެކަން ބަލަމުން ގެންދާނެ ކަމަށެވެ.

މި މައްސަލަ ފެންމަތިވެފައިވަނީ އެމެރިކާގެ ޖަސްޓިސް ޑިޕާޓްމަންޓުން އާންމުކުރި އީމެއިލް މުއާމަލާތްތަކުން، 2012 އިން 2015 އަށް ޑރ. ވަހީދާއި އެޕްސްޓީންއާ ދެމެދު ވަރަށް ގާތް ގުޅުމެއް އޮތްކަން ހާމަވުމާ ގުޅިގެންނެވެ. މީގެ ތެރޭގައި ރާއްޖޭގެ މާލީ ކަންކަމާއި، 2013 ވަނަ އަހަރުގެ ރިޔާސީ އިންތިހާބުގެ ކެމްޕެއިން ސްޓްރެޓެޖީއާ ގުޅޭގޮތުން އެޕްސްޓީންގެ އިރުޝާދު ހޯއްދަވާފައިވާކަން ލިޔުންތަކުން އެނގެން އޮވެއެވެ. އަދި ރާއްޖޭގެ ހައްސާސް މައުލޫމާތުތައް އޭނާއާ ހިއްސާކޮށްފައިވާ ކަންވެސް އީމެއިލްތަކުން އެނގެއެވެ.

އެޕްސްޓީންއާއެކު ވަހީދު މި ގުޅުން ބާއްވަވާފައިވަނީ، 2008 ވަނަ އަހަރު ޖިންސީ ކުށުގެ ތުހުމަތުކޮށް ޖަލަށްލާފައި ވަނިކޮށް، އޭނާ ޖަލުން މިނިވަން ވުމަށްފަހުގައެވެ.

މި މައްސަލަ ހޫނުވެ، ގިނަ ބައެއްގެ ފާޑުކިޔުން އަމާޒުވުމާ ގުޅިގެން، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސްޕެޝަލް އެންވޯއީގެ މަގާމުން ޑރ. ވަހީދު ވަނީ ދާދި ފަހުން އިސްތިއުފާ ދެއްވާފައެވެ. ރައީސް މުއިއްޒު ވިދާޅުވި ގޮތުގައި، ވަހީދު އިސްތިއުފާ ދެއްވީ އެމަނިކުފާނު އެކަމަށް އެންގެވުމާ ގުޅިގެންނެވެ.