ކުޑަކުދިންގެ ޕާކުނެތް ހުރިހާ ރަށެއްގައި މިއަހަރު ނިޔަލަށް ޕާކުތައް ހަދައި ނިންމުމަށް އަމާޒު ހިފާފައިވާ ކަމަށް ލޯކަލް ގަވާމަންޓް އޮތޯރިޓީގެ މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އާދަމް ޝަރީފް ވިދާޅުވީ، އެ މަޝްރޫއުގެ ފުރަތަމަ ބެޗުގައި ހިމެނޭ 14 ރަށެއްގެ ޕާކު ސެޓުތައް މާލެ ގެނެސް، ރަށްރަށަށް ފޮނުވުމަށް އެސްއޯއީތަކާ ހަވާލުކޮށްފައިވާ ކަމަށެވެ. އެގޮތުން މި މަޝްރޫއުގެ ދަށުން ޕާކުތައް ތަރައްގީކުރުމުގެ މަސައްކަތް ހަވާލުކޮށްފައި ވަނީ ފެނަކަ، އެމްޓީސީސީ، އާރުޑީސީ އަދި އެސްޓީއޯއެވެ.

ފެނަކައާ ހަވާލުކޮށްފައިވަނީ ހަ ރަށެކެވެ. އެއީ ށ. ފީވަށް. ނ. މާޅެންދޫ، ނ. ކުޑަފަރީ، ނ. ހެންބަދޫ، މ. ވޭވަށް، މ. މަޑުއްވަރީއެވެ. މި ޕާކުތަކަށް ބޭނުންވާ ސެޓުތައް އެ ރަށްރަށަށް ފޮނުވާފައިވާ ކަމަށް ޝަރީފް ވިދާޅުވިއެވެ .އާރުޑީސީއާ ހަވާލުކޮށްފައިވަނީ ނ. ކެނދިކުޅުދޫ، ނ. ވެލިދޫގެ ޕާކްގެ މަސައްކަތެވެ. .އެރަށްރަށަށް ބޭނުންވާ ޕާކުސެޓުތައް ފޮނުވައި އަމަލީ މަސައްކަތް ވެސް މިހާރު ފަށާފައިވާ ކަމަށް މިނިސްޓަރު ވިދާޅުވިއެވެ

ހަމައެއާއެކު .އެމްޓީސީސީ އާ ހަވާލުކޮށްފައިވަނީ ހަތަރު ރަށެއްގައި ޕާކް ގާއިމްކުރުމުގެ މަސައްކަތެވެ. އެއީ ށ. ކޮމަންޑޫ، ނ. މަނަދޫ، ނ. ފޮއްދޫ އަދި ފ. ނިލަންދޫއެވެ .އެ ރަށްތަކުގެ ޕާކު ސެޓުތައް ފޮނުވާފައިވާ ކަމަށް ޝަރީފް ވިދާޅުވިއެވެ. އެސްޓީއޯ ހަވާލުކޮށްފައި ވަނީ ތ. ބުރުނި އަދި ހދ. ފިނޭއެވެ. އެ ރަށްތަކުގެ ޕާކު ސެޓުތައްވެސް ފޮނުވާފައިވާ ކަމަށް މިިނިސްޓަރު ވިދާޅުވިއެވެ.

އޭގެ އިތުރުން ވަޒީރު ވިދާޅުވީ، ނ. މަނަދޫގައި ޕާކު ގާއިމް ކުރުމުުގެ އަމަލީ މަސައްކަތްތައް މިހާރު ކުރިޔަށްގެންދާ ކަމަށެވެ.