ދިވެހި ދައުލަތަށް ގިނަ ދުވަސްތަކެއް ވަންދެން ޚިދުމަތް ކުރެއްވި، ރައްޔިތުންގެ ޚާއްޞަ މަޖިލީހުގެ ކުރީގެ މެންބަރު ކޮމަންޑޫ މޫސާ ރަމީޒް އަވަހާރަވެއްޖެއެވެ.

މޫސާ ރަމީޒަކީ ރާއްޖޭގެ އިދާރީ ދާއިރާތައް ހިންގުމުގައާއި، އަތޮޅުތަކުގެ ތަރައްޤީއަށް މުހިންމު މަސައްކަތްތަކެއް ކުރެއްވި ބޭފުޅެކެވެ. އެގޮތުން، ރައްޔިތުންގެ ޚާއްޞަ މަޖިލީހުގެ މެންބަރުކަމުގެ އިތުރުން، ށ. އަތޮޅާއި، ފުވައްމުލަކުގެ އަތޮޅުވެރިކަން އެމަނިކުފާނު ވަނީ ކުރައްވާފައެވެ. ވަކީން ޚާއްޞަކޮށް، ށ. އަތޮޅުގެ އެކި މަޤާމުތަކުގައި ހުންނަވައިގެން އެ އަތޮޅުގެ ކުރިއެރުމަށް ގިނަގުނަ ޚިދުމަތްތަކެއް އެމަނިކުފާނު ވަނީ ކޮށްދެއްވާފައެވެ.

މޫސާ ރަމީޒް އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މޫސާ ރަމީޒްގެ ޢާއިލާއަށް ތަޢުޒިޔާ ފޮނުއްވާފައެވެ. ރައީސުލްޖުމްހޫރިއްޔާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ އަތޮޅުތަކާއި ރަށްތައް ހިންގުމުގެ ދާއިރާގައި، ވަކީން ޚާއްޞަކޮށް ށ. އަތޮޅުގެ އެކި މަޤާމުތަކުގައި މޫސާ ރަމީޒް ކުރެއްވި ޚިދުމަތްތައް ފާހަގަކުރައްވާ ކަމަށެވެ.

ރައީސްގެ ތަޢުޒިޔާގެ މެސެޖުގައި، މޫސާ ރަމީޒް އަވަހާރަވުމުގެ ހިތާމައިގައި ބައިވެރިވެވަޑައިގެން، އެމަނިކުފާނުގެ ޢާއިލާއަށާއި ށ. އަތޮޅުގެ ލޮބުވެތި ރައްޔިތުންނަށް އިޚްލާޞްތެރިކަމާއެކު ތަޢުޒިޔާ ދަންނަވާފައިވެއެވެ.

މޫސާ ރަމީޒަކީ ރާއްޖޭގެ ސިޔާސީ އަދި އިދާރީ ދާއިރާގައި ގިނަ ބައެއްގެ އިޙްތިރާމް ހޯއްދަވާފައިވާ، ތަޖުރިބާކާރު ޚިދުމަތްތެރިއެކެވެ. އެމަނިކުފާނު އަވަހާރަވުމަކީ ދައުލަތަށް ލިބުނު ފޫނުބެއްދޭނެ ވަރަށް ބޮޑު ހިތާމައެއްކަން ރައީސް ވަނީ ފާހަގަ ކުރަށްވާފައެވެ.