ސަރުކާރުގެ ސިޔާސީ މަތީ މަގާމުތަކުގައި ތިއްބެވި ބޭފުޅުން ކުއްލި ގޮތަކަށް މަގާމުތަކުން ވަކިކުރަން ފެށުމާ ގުޅިގެން، ރައްޔިތުންގެ ޚާއްޞަ މަޖިލީހުގެ ކުރީގެ މެންބަރު އަޙްމަދު ނަސީމް (ނަފާ ނަސީމް) ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.

ނަސީމް ސަރުކާރަށް މި ފާޑުކިޔުން އަމާޒުކުރައްވާފައިވަނީ އެކްސްގައި ހިއްސާކުރެއްވި ވަރަށް އަސަރުގަދަ އަދި މާނަފުން ޕޯސްޓެއްގައެވެ. އޭނާގެ ޕޯސްޓުގައި ޒުވާން ޖީލަށް މުޚާޠަބު ކުރައްވައި ވިދާޅުވެފައިވަނީ، ހިތުގެ އިޚްލާޞްތެރިކަމާއި ޤަދަރެއް ނެތި ކުރާ ލޯތްބަކީ ފިތުނައެއް ކަމަށާއި، ފިތުނަވެރިކަމުގެ ތެރެއިން އުފެދޭ އަލިފާނަކީ އަސްލު ކަރުނަ ކަމަށެވެ. އަދި އިންތިޚާބަށްފަހު ސިޔާސީ ބޮޑު ބިންހެލުމެއް އަންނާނެ ކަމަށް އޭނާ ކުރިންވެސް ވިދާޅުވިކަން ވަނީ ހަނދާންކޮށްދެއްވާފައެވެ.

ދަރިންނޭ..
ހިތުގެ ގަދަރެއްނުވާ ލޯތްބަކީ ފިތުނައޭ،
ފިތުނަވެރިކަމުގެ އަލިފާނަކީ ކަރުނައޭ
... ކުރިން ވެސް ބުނިން އިންތިޚާބަށްފަހު ބިންހެލުން އަންނާނޭ... ދީ?

— NafaNaseem (@monasibnaseem) April 6, 2026

މިދިޔަ ހޮނިހިރު ދުވަހު ބޭއްވުނު ބައި-އިލެކްޝަންތަކުގައި ސަރުކާރަށް ނާކާމިޔާބީއާ ކުރިމަތިލާން ޖެހިފައިވާ ދަނޑިވަޅެއްގައި ސަރުކާރުގެ މަތީ ފަންތީގެ މަގާމުތަކުގައި ތިއްބެވި ބޭފުޅުން ކުއްލި ގޮތަކަށް މިއަދު ވަނީ ވަކިކުރަން ފަށާފައެވެ.

މިގޮތުން ވަކިކުރެއްވި ބޭފުޅުންގެ ތެރޭގައި ރައްޔިތުންގެ މަޖިލީހުގެ މާފަންނު މެދު ދާއިރާގެ ޕީއެންސީ މެންބަރު އަސްމާ ރަޝީދުގެ ދަރިފުޅު، ޔޫއޭއީގައި ހުންނަވާ ދިވެހި ސަފީރު މުހައްމަދު ހުސައިން ޝަރީފު (މުންދު) އާއި، އަސްމާގެ ކޮއްކޮ، ޖެނީވާގައި ހުންނަވާ ދާއިމީ މަންދޫބު ޑރ. ސަލްމާ ރަޝީދު ހިމެނެއެވެ.

ސަފީރުންގެ އިތުރުން، ސަރުކާރުގެ ބައެއް މުހިންމު ކުންފުނިތަކުގެ އިސްވެރިންނަށް ވެސް ވަނީ މި "ބިންހެލުމުގެ" އަސަރުކޮށްފައެވެ. އެގޮތުން ފެނަކަ ކޯޕަރޭޝަންގެ މެނޭޖިންގ ޑިރެކްޓަރާއި، އެގްރޯނެޓްގެ މެނޭޖިންގ ޑިރެކްޓަރުގެ އިތުރުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޑެޕިއުޓީ މެނޭޖިންގ ޑިރެކްޓަރު ވެސް ވަނީ ކުއްލި ގޮތަކަށް މަގާމުން ވަކިކޮށްފައެވެ.