ރަނގަޅަށް ނިދި ނުލިބުމުގެ މައްސަލައަކީ މިއަދު ގިނަބަޔަކަށް ދިމާވެފައިވާ ގޮންޖެހުމެކެވެ. އެމެރިކާގެ ސީ.ޑީ.ސީ އިން ހާމަކުރާ ގޮތުގައި ކޮންމެ ތިން ބޮޑުމީހަކުން އެކަކީ އެކަށީގެންވާ މިންވަރަށް ނިދި ނުލިބޭ މީހެކެވެ. ދިރިއުޅުމުގެ އާދަކާދަތައް ކިތަންމެ ރަނގަޅު ކުރި ނަމަވެސް، ނިންޖަކީ ސިއްހަތަށް އެންމެ މުހިންމު އެއް ބަޔެވެ. ނިދި މަދުވުމަކީ ހަމައެކަނި ވަރުބަލިކަން އިހުސާސްވާ ކަމެއް ނޫނެވެ؛ މިއީ ހިތުގެ ބަލިތަކާއި ސިކުނޑީގެ ދުޅަހެޔޮކަމާވެސް ގުޅިފައިވާ ކަމެކެވެ.

ނިދުމުގެ ކުރިން ފޯނު ބޭނުންކުރުން ހުއްޓާލުމާއި، ވަކި ވަގުތެއްގައި ނިދަން އާދަކުރުމުގެ އިތުރުން، ތިރީގައިވާ ކާނާތައް ކެއުމުގައި ހިމެނުމަކީ އަރާމު ނިންޖަކަށް އެހީތެރިވެދޭނެ ކަމެކެވެ.

1. ވޮލްނަޓް (Walnuts)

ވޮލްނަޓަކީ ރޭގަނޑުގެ ކެއުމަށް ފަހު ބޭނުންކުރަން ވަރަށް ރަނގަޅު އެއްޗެކެވެ. ދިރާސާތަކުން ދައްކާގޮތުގައި ވޮލްނަޓް ކެއުމުން ނިދީގެ ފެންވަރު ރަނގަޅުވެ، ދުވާލު ގަޑީގައި ވަރުބަލިވުން ކުޑަކޮށްދެއެވެ. މީގައި ހިމެނޭ 'ޓްރިޕްޓޯފޭން' ނަމަކަށް ކިޔާ އެމިނޯ އެސިޑެއްގެ އެހީގައި ހަށިގަނޑުން 'މެލަޓޯނިން' (ނިދުމަށް އެހީވާ ހޯރމޯން) އުފައްދައިދެއެވެ. މީގެ އިތުރުން މެގްނީޒިއަމް އަދި ވިޓަމިން ބީ ވެސް މީގައި އެކުލެވިގެންވެއެވެ.

2. ޓާޓް ޗެެރީ (Tart cherries)

ޓާޓް ޗެެރީއަކީ ގުދުރަތީ ގޮތުން މެލަޓޯނިން އެންމެ ގިނައިން އެކުލެވޭ އެއް މޭވާއެވެ. މީގެ ޖޫސް ބުއިމަކީ ނިދާ ވަގުތު އިތުރުކޮށްދީ، އަރާމު ނިންޖަކަށް މަގުފަހިކޮށްދޭ ކަމެކެވެ. ނިދުމުގެ ގަޑިއެއް ނުވަތަ ދެގަޑިއިރު ކުރިން ޓާޓް ޗެެރީ ޖޫސް ތައްޓެއް ބުއިން ރަނގަޅެވެ. ނުވަތަ ޔޯގަޓާ އެކުވެސް މި ބޭނުންކުރެވިދާނެއެވެ.

3. ކިވީ (Kiwi)

ކިވީގައި ހިމެނޭ 'ސެރޮޓޯނިން' އަކީ ނިދުމުގެ ނިޒާމު ތަރުތީބުކޮށްދޭ މާއްދާއެކެވެ. ދިރާސާތަކުން ދައްކާ ގޮތުގައި ނިދުމުގެ އެއްގަޑިއިރު ކުރިން ދެ ކިވީ ކެއުމުން، އަވަހަށް ނިދުމަށާއި މެދުކެނޑުމެއް ނެތި ގިނައިރު ނިދުމަށް އެހީތެރިވެދެއެވެ. އަދި މީގައި ހިމެނޭ އެންޓިއޮކްސިޑެންޓްތަކުގެ ސަބަބުން ހަށިގަނޑަށް އަރާމުލިބި، ދުޅަހެޔޮކަން އިތުރުކޮށްދެއެވެ.

4. ހޫނު ކިރު (Warm milk)

ނިދުމުގެ ކުރިން ހޫނު ކިރު ތައްޓެއް ބުއިމަކީ އިހުޒަމާނުއްސުރެ ކުރަމުން އަންނަ ކަމެކެވެ. ކިރުގައި ހިމެނޭ 'ޓްރިޕްޓޯފޭން' އާއި މެގްނީޒިއަމްގެ ސަބަބުން ހަށިގަނޑުގެ މަސްތައް ލުއިކޮށްދީ، ނިދަން ތައްޔާރުކޮށްދެއެވެ. މީގެ އިތުރުން، ހޫނު އެއްޗެއް ބުއިމުން ނަފްސާނީ ގޮތުން ލިބޭ ހަމަޖެހުމަކީވެސް ނިދަން ފަސޭހަވާ ސަބަބެކެވެ.

5. ކަނޑު ފެހި (Seaweed)

ކަނޑު ފެހީގައި ހިމެނޭ 'އަޔޮޑިން' އަކީ ތައިރޮއިޑްގެ މަސައްކަތްތައް ހަމަޖައްސައިދީ، ހަށިގަނޑުގެ ހަކަތަ ހުންނަ މިންވަރު ކޮންޓްރޯލްކޮށްދޭ އެއްޗެކެވެ. މީގެ ސަބަބުން ނިދުމުގެ ނިޒާމަށް ހެޔޮ ބަދަލުތަކެއް އާދެއެވެ. މިއީ މެގްނީޒިއަމްވެސް ގިނަ ކާނާއެކެވެ.

6. ބޮޑުކުދީގެ އޮށް (Pumpkin seeds)

ބޮޑުކުދީގެ އޮށަކީ ނިދުމަށް އެހީތެރިވެދޭ މާއްދާތަކުން މުއްސަނދިވެފައިވާ އެއްޗެކެވެ. މީގައި ގިނަ އަދަދަކަށް މެގްނީޒިއަމް އެކުލެވިގެންވެއެވެ. މިއީ ހަށިގަނޑުން ސެރޮޓޯނިން އާއި މެލަޓޯނިން އުފެއްދުމަށް އެހީވެދޭ 'ޓްރިޕްޓޯފޭން' ލިބޭ ވަސީލަތެއްވެސް މެއެވެ.

ރޭގަނޑުގެ ވަގުތުގައި ކެއުމަށް އިސްކަންދޭ ތަކެތީގެ ސަބަބުން ނިދުމަށް ވަރަށް ބޮޑު ބަދަލެއް އާދެއެވެ. ނަމަވެސް، މި ކާނާތަކާ އެކު ނިދުމުގެ ރަނގަޅު އާދަތައް ހިފެހެއްޓުމަކީ މުހިންމު ކަމެކެވެ. ނިދުމުގެ މައްސަލަ ބޮޑުވާނަމަ، ސިއްހީ މާހިރެއްގެ ލަފާ ހޯދުމަކީ ބުއްދިވެރިކަމެކެވެ.