އިސްރާއީލުގެ އިސްތިއުމާރީ ފައުޖުތަކުން ފަލަސްތީނުގެ ނިކަމެތި ރައްޔިތުންނާ ދެކޮޅަށް ހިންގަމުންދާ ލާ އިންސާނީ އަމަލުތައް ފުޅާކޮށް، ވަކިން ޚާއްސަކޮށް ކުޑަކުދިންނަށް އަމާޒުކޮށްދޭ އަނިޔާތައް އިންތިހާއަށް އިތުރުވެފައިވާ ކަމަށް ބައިނަލްއަގުވާމީ ރިޕޯޓުތަކުން ހާމަވެއްޖެއެވެ.

ޣައްޒާ އާއި ހުޅަނގު އައްސޭރީގައި އިސްރާއީލުން ހިންގަމުންދާ އަސްކަރީ އޮޕަރޭޝަންތަކުގައި ކުޑަކުދިން ޝަހީދުކުރުމާއި، ނުޙައްގުން ހައްޔަރުކުރުމުގެ އިތުރުން، ނަފްސާނީ ގޮތުންނާއި ޖިސްމާނީ ގޮތުން ބޮޑެތި އަނިޔާތަކެއް ދެމުންދާކަން އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ދަނީ ފާހަގަކުރަމުންނެވެ.

ފަހަކަށް އައިސް އިސްރާއީލު ސިފައިން ދެމުންދާ ހަމަލާތަކުގައި ޒަޚަމްވާ ކުޑަކުދިންގެ އަދަދު ވަނީ ކުރިއާ އަޅާބަލާއިރު އެތައް ގުނައަކަށް މަތިވެފައެވެ. މީގެ ތެރޭގައި އުމުރުން ދިހަ އަހަރު ނުފުރޭ ތުއްތު ކުދިންނަށް ބަޑީގެ ހަމަލާތައް އަމާޒުކުރުމާއި، ކުޑަކުދިން ތިބޭ ސްކޫލްތަކާއި ހޮސްޕިޓަލްތަކަށް ބޮން އެޅުން ފަދަ ބިރުވެރި އަމަލުތައް ހިމެނެއެވެ.

މިފަދަ ހަމަލާތަކުގެ ސަބަބުން އެތައް ހާސް ކުދިންނެއް ދާއިމީ ނުކުޅެދުންތެރިކަމާ ކުރިމަތިލާން ޖެހިފައިވާއިރު، ގިނަ ކުދިންނަކީ އެކުދިންގެ އާއިލާގެ ހުރިހާ މެންބަރުން ގެއްލި، އެކަނިވެރިވެފައިވާ ކުދިންނެވެ.

ބައިނަލްއަގުވާމީ މުޖުތަމައުން މިކަންކަން ހުއްޓުވުމަށް ގޮވާލަމުންދިޔަ ނަމަވެސް، އިސްރާއީލުގެ ފައުޖުތަކުން ދަނީ އެއްވެސް ރަހުމެއް ނެތި ފަލަސްތީނުގެ މުސްތަގުބަލު ކަމަށްވާ ކުޑަކުދިންނަށް އަމާޒުކޮށް ހަމަލާތައް ވަރުގަދަ ކުރަމުންނެވެ.

މި އަނިޔާވެރިކަމުގެ ސަބަބުން ފަލަސްތީނުގެ ކުޑަކުދިން ދިރިއުޅެމުންދަނީ ބިރުވެރިކަމެއްގެ ތެރޭގައި ކަމަށާއި، މިއީ ބައިނަލްއަގުވާމީ ގާނޫނުތަކާއި ކުޑަކުދިންގެ ހައްގުތަކާ ބެހޭ މުއާހަދާތަކާ ކަނޑައެޅިގެން ޚިލާފު ޖަރީމާތަކެއް ކަމަށް އދ. އިން ވެސް ވަނީ ކަންބޮޑުވުން ފާޅުކޮށްފައެވެ.